കറിവേപ്പില

അടുക്കളത്തോട്ടത്തിലെയോ, ചട്ടിയില്‍ വച്ചതോ ആയ കറിവേപ്പില തീരെ നന്നാവുന്നില്ലേ? തഴച്ചുവളരാൻ ഇതാ ചില ടിപ്സുകൾ

കറിവേപ്പിലയുടെ വളർച്ചയ്ക്ക് ഏറ്റവും മികച്ച ഒന്നാണ് പുളിച്ച മോര്. ഒരല്പം പുളിച്ച മോരോ തൈരോ വെള്ളത്തിൽ നന്നായി ലയിപ്പിച്ച് കറിവേപ്പിലയുടെ ചുവട്ടിൽ ഒഴിച്ചുകൊടുക്കുക.

കഞ്ഞിവെള്ളം കളയാതെ മാറ്റിവെച്ച് രണ്ടോ മൂന്നോ ദിവസം പുളിപ്പിക്കുക. ഇതിലേക്ക് അത്രയും തന്നെ വെള്ളം ചേർത്ത് കറിവേപ്പിലയുടെ ചുവട്ടിൽ ഒഴിക്കാം.

കറിവേപ്പില മുകളിലേക്ക് മാത്രം നീണ്ടുപോകാതെ വശങ്ങളിലേക്ക് പടർന്നു പന്തലിക്കാൻ തലപ്പുകൾ നുള്ളി വിടുന്നത് വളരെ നല്ലതാണ്.

കറിവേപ്പിലയ്ക്ക് നന്നായി സൂര്യപ്രകാശം ലഭിക്കേണ്ടതുണ്ട്. ദിവസവും കുറഞ്ഞത് 5-6 മണിക്കൂറെങ്കിലും നേരിട്ട് വെയിൽ ലഭിക്കുന്ന സ്ഥലത്തായിരിക്കണം ഇത് നടേണ്ടത്.

മണ്ണിൽ എപ്പോഴും ഈർപ്പം വേണമെങ്കിലും വെള്ളം കെട്ടിക്കിടക്കാൻ അനുവദിക്കരുത്. വേരുകൾ ചീഞ്ഞുപോകാൻ ഇത് കാരണമാകും. മുകളിലെ മണ്ണ് ഉണങ്ങിയതിനു ശേഷം മാത്രം അടുത്ത തവണ നനയ്ക്കുക.

ഒരു ലിറ്റർ വെള്ളത്തിൽ ഒരു ടീസ്പൂൺ എപ്സം സാൽറ്റ് ലയിപ്പിച്ച് മാസം ഒരിക്കൽ ഇലകളിൽ തളിച്ചു കൊടുക്കുകയോ ചുവട്ടിൽ ഒഴിക്കുകയോ ചെയ്യാം.

ഉപയോഗിച്ച ശേഷം കഴുകി ഉണക്കിയ ചായപ്പൊടിയും നന്നായി പൊടിച്ച മുട്ടത്തോടും കറിവേപ്പിലയുടെ ചുവട്ടിലെ മണ്ണിൽ ഇളക്കി ചേർക്കുന്നത് ചെടിക്ക് ആവശ്യമായ നൈട്രജനും കാത്സ്യവും നൽകും.

കറിവേപ്പിലയെ ബാധിക്കുന്ന കീടങ്ങളെ അകറ്റാനും ചെടിയുടെ ആരോഗ്യത്തിനും കായം കലക്കിയ വെള്ളം മികച്ചതാണ്.

മാസത്തിലൊരിക്കൽ കറിവേപ്പിലയുടെ ചുവട്ടിലെ മണ്ണ് ചെറുതായി ഇളക്കി കുറച്ച് വേപ്പിൻപിണ്ണാക്കും എല്ലുപൊടിയും ചേർത്തു കൊടുക്കുക. രോഗങ്ങളിൽ നിന്നും പ്രാണികളിൽ നിന്നും ചെടിയെ സംരക്ഷിക്കും.