വഴുതന

വീട്ടുമുറ്റത്തോ ടെറസ്സിലോ വഴുതന വളർത്താം. കൂടുതൽ വിളവെടുക്കാൻ ചില ടിപ്സ് ഇതാ.

വഴുതനച്ചെടിക്ക് ധാരാളം വെയിൽ ആവശ്യമാണ്. ദിവസം കുറഞ്ഞത് 6 മുതൽ 8 മണിക്കൂർ വരെ നേരിട്ട് വെയിൽ ലഭിക്കുന്ന സ്ഥലം തന്നെ നടാനായി തിരഞ്ഞെടുക്കുക.

വെള്ളം കെട്ടിക്കിടക്കാത്ത, നീർവാർച്ചയുള്ള മണ്ണ് അനുയോജ്യം. ചകിരിച്ചോറ്, ചാണകപ്പൊടി/കമ്പോസ്റ്റ്, അല്പം വേപ്പിൻപിണ്ണാക്ക്, എല്ലുപൊടി എന്നിവ ചേർത്ത് മണ്ണ് നന്നായി ഇളക്കി ഒരുക്കുക.

തൈകൾ തമ്മിൽ കുറഞ്ഞത് 1.5 മുതൽ 2 അടി വരെ അകലം നൽകണം. ഗ്രോ ബാഗിലാണ് നടുന്നതെങ്കിൽ ഒരു ബാഗിൽ ഒരു തൈ മാത്രം നടുന്നതാണ് കൂടുതൽ വളർച്ചയ്ക്കും വിളവിനും നല്ലത്.

മണ്ണിൽ എപ്പോഴും നേരിയ ഈർപ്പം ഉണ്ടായിരിക്കണം. എന്നാൽ വെള്ളം കെട്ടിക്കിടക്കാൻ അനുവദിക്കരുത്. വേനൽക്കാലത്ത് ദിവസവും രാവിലെയും വൈകുന്നേരവും നനയ്ക്കണം.

ചെടി വളർന്നു തുടങ്ങുമ്പോൾ 15-20 ദിവസം കൂടുമ്പോൾ മേൽവളം നൽകണം

വഴുതനയെ പ്രധാനമായും ബാധിക്കുന്നത് തണ്ടുതുരപ്പൻ, കായതുരപ്പൻ, വെള്ളീച്ച എന്നിവയാണ്. ആഴ്ചയിലൊരിക്കൽ വേപ്പെണ്ണ-വെളുത്തുള്ളി മിശ്രിതം/ വേപ്പെണ്ണ-സോപ്പ് ലായനി തളിക്കുക.

വഴുതന വളർന്ന് നിറയെ കായ്കൾ ഉണ്ടാകുമ്പോൾ ഭാരം കാരണം ചെടി മറിഞ്ഞുവീഴാനോ ശാഖകൾ ഒടിയാനോ സാധ്യതയുണ്ട്. അതിനാൽ ചെടിയുടെ കൂടെ ഒരു ചെറിയ മരക്കമ്പ് കുത്തിനിർത്തി കെട്ടിക്കൊടുക്കുക.

മണ്ണോട് ചേർന്നുനിൽക്കുന്ന പഴകിയതും രോഗം ബാധിച്ചതുമായ താഴ്ഭാഗത്തെ ഇലകൾ കൃത്യമായി വെട്ടിമാറ്റുക. ഇത് ചെടിക്ക് നല്ല കാറ്റും വെളിച്ചവും കിട്ടാനും രോഗങ്ങൾ പടരാതിരിക്കാനും സഹായിക്കും.