തക്കാളി

വീട്ടിലെ അടുക്കളത്തോട്ടത്തിലോ ഗ്രോ ബാഗുകളിലോ വളർത്തുന്ന തക്കാളിച്ചെടിയിൽ നിന്ന് തക്കാളി കിട്ടുന്നില്ലേ? ഇതാ ശ്രദ്ധിക്കാൻ കുറച്ച് കാര്യങ്ങൾ.

തക്കാളി പിടിക്കണമെങ്കിൽ നല്ല സൂര്യപ്രകാശം വേണം. ദിവസം കുറഞ്ഞത് 6 മുതൽ 8 മണിക്കൂർ വരെ നേരിട്ട് സൂര്യപ്രകാശം ലഭിക്കുന്ന സ്ഥലത്ത് ചെടികൾ വെക്കാം.

കൃത്യമായ ഇടവേളകളിൽ നനയ്ക്കേണ്ടത് അത്യാവശ്യമാണ്. മണ്ണ് എപ്പോഴും ഈർപ്പമുള്ളതായിരിക്കണം, എന്നാൽ വെള്ളം കെട്ടിക്കിടക്കരുത്. രാവിലെ നനയ്ക്കുന്നതാണ് ഉചിതം.

ചുവട്ടിലേക്ക് നേരിട്ട് വെള്ളം ഒഴിക്കുക. ഇലകളിലും തണ്ടിലും വെള്ളം വീഴുന്നത് ഫംഗസ് രോഗങ്ങൾ വരാൻ കാരണമാകും.

ചെടി വരുമ്പോൾ തന്നെ ശക്തമായ കമ്പോ വടിയോ ഉപയോഗിച്ച് താങ്ങ് കൊടുക്കുക. തക്കാളിയുടെ ഭാരം കാരണം തണ്ടുകൾ ഒടിഞ്ഞു പോകാതിരിക്കാനും, കായ്കൾ മണ്ണിൽ മുട്ടി ചീഞ്ഞുപോകാതിരിക്കാനും സഹായിക്കും.

നടീൽ മിശ്രിതത്തിൽ നല്ലപോലെ ചാണകപ്പൊടിയോ കമ്പോസ്റ്റോ ചേർക്കണം. ചെടി വളരുമ്പോള്‍ 15 ദിവസത്തിലൊരിക്കൽ കടലപ്പിണ്ണാക്ക്, വേപ്പിൻപിണ്ണാക്ക്, കഞ്ഞിവെള്ളം നേർപ്പിച്ചു ഒഴിച്ചു കൊടുക്കാം.

ചെടിയുടെ ചുവട്ടുഭാഗത്തുള്ള, മണ്ണോട് ചേർന്നു നിൽക്കുന്ന ഇലകൾ മുറിച്ചു മാറ്റുക. ഇത് മണ്ണിൽ നിന്നുള്ള ഫംഗസ് ബാധ തടയും. 

പാത്രങ്ങളിൽ വളർത്തുമ്പോൾ പരാഗണം നടക്കാൻ കാറ്റോ തേനീച്ചകളോ കുറവാണെങ്കിൽ, പൂക്കൾ വിരിഞ്ഞു നിൽക്കുന്ന ശാഖകളിൽ രാവിലെ പതുക്കെ ഒന്ന് വിരൽ കൊണ്ട് തട്ടി കൊടുക്കുക.

കാൽസ്യത്തിന്റെ കുറവ് ഒഴിവാക്കാൻ ചെടി നടുമ്പോഴും ഇടയ്ക്കും അല്പം കുമ്മായം അല്ലെങ്കിൽ മുട്ടത്തോട് പൊടിച്ചത് മണ്ണിൽ ചേർത്തു കൊടുക്കുന്നത് നല്ലതാണ്.

തക്കാളിയെ ബാധിക്കുന്ന പ്രധാന വില്ലനാണ് ഇലച്ചുരുട്ടലും വെള്ളീച്ചകളും. തടയാൻ ആഴ്ചയിലൊരിക്കൽ വേപ്പെണ്ണ-വെളുത്തുള്ളി മിശ്രിതം അല്ലെങ്കിൽ സോപ്പ് ലായനി ഇലകളുടെ ഇരുവശത്തും തളിക്കാം.