വീട്ടിൽ തന്നെ

വീട്ടിലെ ആവശ്യങ്ങൾക്കുള്ള ഇഞ്ചിക്കെന്തിന് കടയിൽ പോണം? വീട്ടിൽ തന്നെ വളർത്തിയെടുത്താലോ? എന്തൊക്കെ ശ്രദ്ധിക്കാം?

കടയിൽ നിന്ന് വാങ്ങുന്ന ഇഞ്ചി ഉപയോഗിച്ച് തന്നെ നടാം. ഒന്നിലധികം മുളകളുള്ള, ഉണങ്ങിപ്പോകാത്ത, വലിപ്പമുള്ള ഇഞ്ചി കഷ്ണങ്ങൾ തിരഞ്ഞെടുക്കുക. 

ഇഞ്ചി താഴേക്ക് എന്നതിനേക്കാൾ വശങ്ങളിലേക്കാണ് പടർന്ന് വളരുന്നത്. അതിനാൽ ആഴത്തേക്കാൾ വീതികൂടിയ ചട്ടികളോ പ്ലാസ്റ്റിക് ചാക്കുകളോ തിരഞ്ഞെടുക്കുക. ദ്വാരങ്ങൾ ഉണ്ടെന്ന് ഉറപ്പാക്കണം.

വെള്ളക്കെട്ട് ഇഞ്ചിക്ക് വില്ലനാണ്. അതിനാൽ ചകിരിച്ചോറ്, ചാണകപ്പൊടി/കമ്പോസ്റ്റ്, നല്ല നനവുള്ള മണ്ണ്, കുറച്ച് മണൽ എന്നിവ സമമായി കലർത്തി പോട്ടിംഗ് മിക്സ് തയ്യാറാക്കുക.

ഇഞ്ചിക്കഷ്ണങ്ങൾ മണ്ണിൽ 1 മുതൽ 2 ഇഞ്ച് വരെ മാത്രം താഴ്ത്തി വെക്കുക. മുളകൾ മേൽപോട്ട് നിൽക്കുന്ന രീതിയിൽ വേണം നടാൻ. മുകളിൽ നേരിയ അളവിൽ മണ്ണ് തട്ടി മൂടുക.

കടുത്ത നേരിട്ടുള്ള വെയിൽ ആവശ്യമില്ല. ഭാഗികമായ തണലുള്ള സ്ഥലങ്ങളാണ് അനുയോജ്യം. ദിവസവും 2-5 മണിക്കൂർ മാത്രം വെയിൽ കിട്ടുന്ന ജനലരികുകൾ, ബാൽക്കണി, മരത്തണലുകൾ മികച്ചതാണ്.

മണ്ണിലെപ്പോഴും നേരിയ ഈർപ്പം ഉണ്ടായിരിക്കണം. വെള്ളം കെട്ടിക്കിടക്കാൻ പാടില്ല. മണ്ണിലെ മുകൾഭാഗം ഉണങ്ങുമ്പോൾ മാത്രം നനയ്ക്കുക. ഓരോ മാസവും കുറച്ച് ജൈവവളമോ അല്പം ചാരമോ ഇട്ടുകൊടുക്കാം.

ഇഞ്ചി നട്ടശേഷം ഉണങ്ങിയ ഇലകളോ, വൈക്കോലോ മുകളിൽ വിതറി മൂടാം. ഈര്‍പ്പം നിലനില്‍ക്കും. കളകള്‍ വളരില്ല. 8-10 മാസത്തിനുള്ളിൽ ഇഞ്ചി ഇലകൾ മഞ്ഞനിറമായി ഉണങ്ങാൻ തുടങ്ങുമ്പോൾ വിളവെടുക്കാം.