എങ്ങനെ

ഗ്രോബാ​ഗിലും കാരറ്റ് വളർത്താം. എങ്ങനെയാണ് ​ഗ്രോബാ​ഗിൽ ക്യാരറ്റ് വളർത്തി വിളവെടുക്കുന്നത്?

ക്യാരറ്റിന്റെ വേരുകൾ ആഴത്തിൽ ഇറങ്ങാൻ കുറഞ്ഞത് 12–15 ഇഞ്ച് ആഴമുള്ള ഗ്രോബാഗ് തിരഞ്ഞെടുക്കുക. അധികജലം വാർന്നുപോകാൻ ബാഗിന്റെ അടിയിൽ ആവശ്യത്തിന് ദ്വാരങ്ങൾ ഉണ്ടെന്ന് ഉറപ്പാക്കുക.

40% ചകിരിച്ചോർ, 30% ചാണകപ്പൊടി/കമ്പോസ്റ്റ്, 30% മേൽമണ്ണ് അല്ലെങ്കിൽ മണൽ എന്നിവ ചേർത്ത് മിശ്രിതമാക്കുക.

ക്യാരറ്റ് വളഞ്ഞുപോകാതിരിക്കാൻ മണ്ണിലെ കല്ലുകളും കട്ടകളും നീക്കം ചെയ്യുക. വിത്തുകൾ ചെറുതായതിനാൽ അല്പം മണലുമായി ചേർത്ത് വിതറാം. വിതറിയ ശേഷം കാൽ ഇഞ്ച് കനത്തിൽ മുകളിൽ മണ്ണ് വിതറുക.

വിത്തുകൾ ഒഴുകിപ്പോകാതിരിക്കാൻ തുടക്കത്തിൽ സ്പ്രേയർ ഉപയോഗിച്ച് മാത്രം നനച്ചു കൊടുക്കുക. മണ്ണിൽ ഈർപ്പം നിലനിർത്തുക. 10 മുതൽ 14 ദിവസത്തിനകം വിത്തുകൾ മുളച്ചുവരും.

തൈകൾ 2 ഇഞ്ച് ഉയരമെത്തുമ്പോൾ, ആരോഗ്യം കുറഞ്ഞവ പിഴുതുമാറ്റി 2–3 ഇഞ്ച് അകലം ഉറപ്പാക്കുക.

ദിവസവും കുറഞ്ഞത് 5–6 മണിക്കൂർ നേരിട്ട് സൂര്യപ്രകാശം ലഭിക്കുന്ന സ്ഥലത്ത് ഗ്രോബാഗ് വെക്കുക. മണ്ണിൽ എപ്പോഴും നേരിയ ഈർപ്പം നിലനിർത്തുക, എന്നാൽ വെള്ളം കെട്ടിക്കിടക്കാൻ അനുവദിക്കരുത്.

70–90 ദിവസത്തിനുള്ളിൽ ക്യാരറ്റിന്റെ മുകൾഭാഗം മണ്ണിൽ നിന്ന് ഉയർന്നു കാണുമ്പോൾ വിളവെടുക്കാം.