മികച്ച് വിളവ്

വഴുതന മിക്കവർക്കും ഇഷ്ടപ്പെട്ട ഒരു പച്ചക്കറിയാണ്. വീട്ടിൽ തന്നെ വഴുതന നട്ടുവളർത്താം. മികച്ച് വിളവ് ലഭിക്കാൻ എന്താണ് ചെയ്യേണ്ടത്.

വിത്തിടുമ്പോൾ നല്ല വിളവ് തരുന്ന നീലകണ്ഠ, സൂര്യ (വയലറ്റ് നിറം), ശ്വേത (വെള്ള നിറം), ഹരിത (പച്ച നിറം) തുടങ്ങിയ ഇനങ്ങൾ തിരഞ്ഞെടുക്കുക.

വിത്ത് പാകി മുളച്ച് 4-5 ഇലകൾ വരുമ്പോൾ (ഏകദേശം 30 ദിവസം) തൈകൾ മാറ്റി നടാം. വൈകുന്നേരങ്ങളിൽ നടുന്നതാണ് ഉചിതം.

നടുമ്പോൾ കുഴിയിൽ ചാണകപ്പൊടിയോ കമ്പോസ്റ്റോ ചേർക്കുക. ഒപ്പം അല്പം വേപ്പിൻ പിണ്ണാക്ക് ചേർക്കുന്നത് മണ്ണിലെ കീടങ്ങളെ അകറ്റാൻ സഹായിക്കും.

ചെടി വളരുന്നതിനനുസരിച്ച് 15-20 ദിവസം കൂടുമ്പോൾ കടലപ്പിണ്ണാക്ക് പുളിപ്പിച്ചത് ഒഴിച്ചു കൊടുക്കുന്നത് വഴുതന പെട്ടെന്ന് വളരാൻ സഹായിക്കും.

മാസത്തിൽ രണ്ട് തവണ ഫിഷ് അമിനോ ആസിഡ് നേർപ്പിച്ചത് തളിച്ചു കൊടുക്കുന്നത് കായ്‌പിടുത്തം കൂട്ടും.

വഴുതനയ്ക്ക് നന്നായി വെയിൽ ആവശ്യമാണ്. ദിവസവും കുറഞ്ഞത് 5-6 മണിക്കൂർ സൂര്യപ്രകാശം ലഭിക്കുന്ന ഇടമായിരിക്കണം.

മണ്ണിൽ എപ്പോഴും ഈർപ്പം നിലനിർത്തണം, എന്നാൽ വെള്ളം കെട്ടിക്കിടക്കരുത്. വേനൽക്കാലത്ത് ദിവസവും നനയ്ക്കുക.

കേടുവന്ന തണ്ടുകളും കായ്കളും മുറിച്ചു മാറ്റി നശിപ്പിക്കുക. പ്രതിരോധത്തിന് ആഴ്ചയിലൊരിക്കൽ വേപ്പെണ്ണ വെളുത്തുള്ളി മിശ്രിതം തളിക്കാം. 

ഇലപ്പേൻ, വെള്ളീച്ച എന്നിവ നിയന്ത്രിക്കാൻ മഞ്ഞക്കെണികൾ വെക്കാം. ചെടി വളർന്നു വരുമ്പോൾ താഴത്തെ കരിഞ്ഞ ഇലകൾ നീക്കം ചെയ്യുക. ഇത് ചെടിയിലേക്ക് കാറ്റും വെളിച്ചവും കടക്കാൻ സഹായിക്കും.

പൂക്കൾ വിരിയുന്ന സമയത്ത് പുളിപ്പിച്ച കഞ്ഞിവെള്ളം തെളിച്ചെടുത്ത് ഒഴിച്ചു കൊടുക്കുന്നത് പൂ കൊഴിച്ചിൽ കുറയ്ക്കാൻ സഹായിക്കും.