കോവൽ

അടുക്കളത്തോട്ടത്തിൽ വളരെ എളുപ്പത്തിൽ ആർക്കും കൃഷി ചെയ്യാവുന്ന ഒന്നാണ് കോവൽ. പ്രകൃതിദത്ത ഇൻസുലിൻ എന്നറിയപ്പെടുന്ന കോവയ്ക്കക്ക് നല്ല വിപണി സാധ്യതയുണ്ട്.

നല്ല നീർവാർച്ചയുള്ള മണൽ കലർന്ന മണ്ണിൽ കോവൽ കൃഷി ചെയ്താൽ ദീർഘകാലം ചെടി നിലനിൽക്കും. സൂര്യപ്രകാശം ധാരാളം കിട്ടുന്നിടത്താകണം കൃഷി.

മണ്ണിലേക്ക് കുറച്ച് കുമ്മായം ചേർത്ത് ഒരു ദിവസമെങ്കിലും യോജിക്കാനുളള സാവകാശം നൽകുക. ശേഷം ചകിരിച്ചോറ്, ചാണകപ്പൊടി, കരിയിലകൾ എന്നിവ തുല്യ അനുപാതത്തിൽ ചേർത്തുകൊടുക്കുക

നാലോ അഞ്ചോ മുട്ടുകൾ ഉള്ള ഒരടി നീളമുള്ള തണ്ടുകളാണ് നടേണ്ടത്. ഒരു കുഴിയിൽ മൂന്നോ നാലോ തണ്ടുകൾ നടാം.

കൂടുതൽ ശിഖരങ്ങൾ ഉണ്ടാകാനായി അഗ്രമുകുളങ്ങൾ ചെറുതായി പ്രൂൺ ചെയ്യണം. കോവൽ തണ്ടുകളുടെ കീഴ്ഭാഗം 'വി' ആകൃതിയിൽ മുറിക്കുന്നത് അവ മണ്ണിൽ ഉറച്ച് നിൽക്കുന്നതിന് സഹായകരമാകും.

നട്ട് ഒരു മാസം കഴിഞ്ഞ് 750 ഗ്രാം യൂറിയയും 50 ഗ്രാം പൊട്ടാഷും നൽകുക. ദിവസവും ആവശ്യത്തിന് വെളളമൊഴിക്കുക.

ഇത് പടർന്ന് വളരുന്നതിനാൽ പന്തൽ ഇട്ട് കൊടുക്കേണ്ടത് അത്യാവശ്യമാണ്. രണ്ട് മീറ്റർ ഉയരത്തിൽ പന്തലിട്ട് വള്ളികൾ പടർത്താം.

തൈകൾ നട്ട കുഴികളിൽ മറ്റ് കളകൾ വളരാൻ അനുവദിക്കരുത്. കോവയ്ക്ക അധികം മൂക്കുന്നതിന് മുമ്പ് വിളവെടുക്കുന്നതാണ് നല്ലത്. ഇല്ലെങ്കിൽ സ്വാദിന് മാറ്റം വരും.