കറിവേപ്പില

ഗ്രോ ബാഗിലും ചെറിയ പാത്രത്തിലും വരെ കറിവേപ്പില കാടുപോലെ വളർത്താം. എന്തൊക്കെയാണ് ശ്രദ്ധിക്കേണ്ടത്?

ഗ്രോബാഗിലാണ് നടുന്നതെങ്കില്‍ കുറഞ്ഞത് 12x12 വലുപ്പമുള്ള ബാഗ് തിരഞ്ഞെടുക്കുക.

മേൽമണ്ണ്, ചാണകപ്പൊടി, ചകിരിച്ചോറ് എന്നിവ സമമായി കലർത്തി തയാറാക്കുക. അല്പം വേപ്പിൻപിണ്ണാക്ക് ചേർത്താൽ വേരുചീയൽ തടയാം.

ദിവസവും കുറഞ്ഞത് 5–6 മണിക്കൂർ നേരിട്ട് വെയിൽ കിട്ടുന്ന സ്ഥലത്ത് വെക്കുക.

മുകളിലെ മണ്ണ് ഉണങ്ങുമ്പോൾ മാത്രം നനയ്ക്കുക. വെള്ളം കെട്ടിനിന്നാൽ വേരുകൾ ചീഞ്ഞുപോകും!

വളർന്നു വരുന്ന തലപ്പുകൾ കൃത്യമായി നുള്ളിക്കൊടുത്താൽ വശങ്ങളിൽ നിന്ന് പുതിയ ഒട്ടേറെ ശാഖകൾ വന്ന് ചെടി കാടുപോലെ വളരും.

നല്ലപോലെ പുളിച്ച മോര് 10 ഇരട്ടി വെള്ളം ചേർത്ത് തളിച്ചുകൊടുക്കുന്നതും ഒഴിച്ചുകൊടുക്കുന്നതും ചെടി പെട്ടെന്ന് വളരാനും ഇലകൾക്ക് നല്ല പച്ചപ്പുണ്ടാകാനും സഹായിക്കും.

കടലപ്പിണ്ണാക്ക് 3-4 ദിവസം വെള്ളത്തിലിട്ട് പുളിപ്പിച്ച ശേഷം അതിലേക്ക് കൂടുതൽ വെള്ളം ചേർത്ത് നേർപ്പിച്ച് ആഴ്ചയിൽ അല്ലെങ്കിൽ രണ്ടാഴ്ചയിലൊരിക്കൽ ഒഴിച്ചു കൊടുക്കുക.

വെളുത്ത കുത്തുകളും പുഴുക്കളും തടയാൻ വെളുത്തുള്ളി-വേപ്പെണ്ണ മിശ്രിതം അല്ലെങ്കിൽ സോപ്പു ലായനി ഇലകളുടെ ഇരുവശത്തും തളിച്ചു കൊടുക്കാം.