വെളുത്തുള്ളി

വലിയ പറമ്പുകളോ കൃഷിഭൂമിയോ ആവശ്യമില്ല, കുറഞ്ഞ സ്ഥലത്ത് പോലും വെളുത്തുള്ളി നല്ല രീതിയിൽ വിളവെടുക്കാൻ സാധിക്കും.

വീട്ടിലെ വലിയ വെളുത്തുള്ളി പൊളിച്ച്, ഏറ്റവും വലിപ്പമുള്ള അല്ലികൾ മാത്രം നടാനായി മാറ്റിവെക്കുക.

വെള്ളം കെട്ടിക്കിടക്കാത്ത മണ്ണാണ് ആവശ്യം. മണ്ണിൽ ആവശ്യത്തിന് ചാണകപ്പൊടി ചേർത്ത് ഇളക്കുക.

ചട്ടിയിലാണ് നടുന്നതെങ്കിൽ കുറഞ്ഞത് 6-8 ഇഞ്ച് ആഴം വേണം. നല്ല നീർവാർച്ചയുള്ള പോട്ടിംഗ് മിക്സ് ഉപയോഗിക്കുക.

അല്ലിയുടെ കൂർത്ത ഭാഗം മുകളിലേക്കും പരന്ന ഭാഗം താഴേക്കും വരുന്ന രീതിയിൽ മണ്ണിൽ ഇറക്കി വെക്കുക. അല്ലികൾ തമ്മിൽ 4-6 ഇഞ്ച് അകലം ഉണ്ടായിരിക്കാൻ ശ്രദ്ധിക്കുക.

വളരെ ആഴത്തിൽ നടരുത്, മണ്ണ് മൂടിയാൽ മതി. നല്ല സൂര്യപ്രകാശം ലഭിക്കുന്ന സ്ഥലത്ത് വേണം ചെടി വളർത്താൻ. മണ്ണിൽ നനവ് ഉണ്ടായിരിക്കണം, എന്നാൽ വെള്ളം കെട്ടിനിൽക്കാൻ അനുവദിക്കരുത്.

നടീലിന് ശേഷം മണ്ണിൽ ഉണങ്ങിയ ഇലകളോ വൈക്കോലോ നിരത്തുന്നത് മണ്ണിന്റെ നനവ് നിലനിർത്താനും കളകൾ വളരുന്നത് തടയാനും സഹായിക്കും.

ചെടി വളരുന്ന ഘട്ടത്തിൽ മണ്ണിൽ ചാണകപ്പൊടിക്ക് പുറമെ അല്പം കടലപ്പിണ്ണാക്ക് പുളിപ്പിച്ചത് നേർപ്പിച്ച് ഒഴിച്ചുകൊടുക്കുന്നത് നല്ല വലിപ്പമുള്ള വെളുത്തുള്ളി ലഭിക്കാൻ സഹായിക്കും.

വിളവെടുപ്പിന് രണ്ടാഴ്ച മുൻപ് മുതൽ നനയ്ക്കുന്നത് പൂർണ്ണമായും നിർത്തണം. ഇത് വെളുത്തുള്ളി കേടുകൂടാതെ ഇരിക്കാൻ സഹായിക്കും.

നട്ട് ഏകദേശം 4 മുതൽ 5 മാസം വരെയാകും വിളവെടുപ്പിന് പാകമാവാൻ. ചെടിയുടെ താഴത്തെ ഇലകൾ മഞ്ഞനിറമായി ഉണങ്ങാൻ തുടങ്ങുമ്പോഴാണ് വിളവെടുക്കേണ്ടത്.