ബംഗ്ലാദേശിന് മുന്നില്‍ പ്രസിസന്ധി

സുരക്ഷാ കാരണങ്ങൾ പറഞ്ഞ് 2026 ടി20 ലോകകപ്പിൽ നിന്ന് പിന്മാറാനുള്ള തീരുമാനം ബംഗ്ലാദേശ് ക്രിക്കറ്റ് ബോർഡിനെ വലിയ സാമ്പത്തിക പ്രതിസന്ധിയിലേക്ക് തള്ളിവിടും.

കായികപരമായ തിരിച്ചടിക്കപ്പുറം, കോടിക്കണക്കിന് രൂപയുടെ നഷ്ടമാണ് ബംഗ്ലാദേശ് ക്രിക്കറ്റിനെ കാത്തിരിക്കുന്നത്.

ഗ്രൂപ്പ് ഘട്ടത്തിൽ മാത്രം പങ്കെടുക്കുന്നതിലൂടെ ലഭിക്കേണ്ട ഏകദേശം 2.7 കോടി മുതൽ 4.57 കോടി രൂപ വരെയുള്ള 'പാർട്ടിസിപ്പേഷൻ ഫീ' ബംഗ്ലാദേശിന് ഇതിനോടകം നഷ്ടമായിക്കഴിഞ്ഞു.

മതിയായ കാരണങ്ങളില്ലാതെ വിട്ടുനിന്നതിന് ഐസിസി മെംബർ പാർട്ടിസിപ്പേഷൻ കരാർ പ്രകാരം 18.3 കോടി രൂപ വരെ പിഴ ഈടാക്കാൻ സാധ്യതയുണ്ട്.

ഐസിസിയുടെ സെൻട്രൽ റവന്യൂ പൂളിൽ നിന്ന് ലഭിക്കേണ്ട വിഹിതം തടഞ്ഞാൽ ഏകദേശം 24.7 കോടി രൂപയുടെ നഷ്ടമുണ്ടാകും. ബംഗ്ലാദേശ് ക്രിക്കറ്റ് ബോർഡിന്‍റെ വാർഷിക വരുമാനത്തിന്റെ 60 ശതമാനത്തോളം വരും.

തങ്ങളുടെ നിലപാടിൽ ഉറച്ചുനിൽക്കാൻ ഈ തുകയത്രയും നഷ്ടപ്പെടുത്താൻ തയ്യാറാണെന്ന് ബിസിബി നേരത്തെ അറിയിച്ചിരുന്നെങ്കിലും ഇത് രാജ്യത്തെ ക്രിക്കറ്റ് വികസനത്തെ സാരമായി ബാധിക്കും.

ബോർഡിന് മാത്രമല്ല, വ്യക്തിഗതമായി കളിക്കാർക്കും സാമ്പത്തിക ആഘാതം നേരിട്ടു തുടങ്ങി. പല ഇന്ത്യൻ സ്പോർട്സ് കമ്പനികളും ബംഗ്ലാദേശ് താരങ്ങളുമായുള്ള സ്പോൺസർഷിപ്പ് കരാറുകൾ റദ്ദാക്കുകയാണ്.

പ്രമുഖ കായിക ഉപകരണ നിർമ്മാതാക്കളായ എസ്.ജി ഉൾപ്പെടെയുള്ള കമ്പനികൾ ബംഗ്ലാദേശ് താരങ്ങളുമായുള്ള കരാറുകൾ അവസാനിപ്പിച്ചതായാണ് റിപ്പോർട്ടുകൾ.