കനത്ത മഞ്ഞുവീഴ്ച

സൗദിയിൽ കനത്ത മഴയും ശക്തമായ മഞ്ഞുവീഴ്ചയും. മരുഭൂമികള്‍ വെള്ളപുതച്ചു നിൽക്കുന്ന കാഴ്ചയാണ് കാണാനാകുന്നത്. പുണ്യനഗരങ്ങളായ മക്കയിലും മദീനയിലും ശക്തമായ മഴ പെയ്തു. 

ഒമ്പത് പ്രധാന മേഖലകളിൽ റെഡ് അലർട്ട് പ്രഖ്യാപിച്ചിട്ടുണ്ട്. മക്ക, മദീന, റിയാദ്, കിഴക്കൻ പ്രവിശ്യ, ഖസീം, ഹാഇൽ, അസീർ, അൽ ബാഹ, വടക്കൻ അതിർത്തികൾ എന്നിവിടങ്ങളിലാണ് മുന്നറിയിപ്പുള്ളത്.

വരും ദിവസങ്ങളിൽ ജിദ്ദ, റാബിഗ്, ത്വാഇഫ് എന്നീ ഗവർണറേറ്റുകളിലും മഴ ശക്തമാകാൻ സാധ്യതയുണ്ടെന്നും ശനിയാഴ്ച വരെ ഈ സാഹചര്യം തുടരുമെന്നും അധികൃതർ വ്യക്തമാക്കി.

വടക്കൻ മേഖലകളിൽ പ്രകൃതിയുടെ അപൂർവ ദൃശ്യവിരുന്നാണ് ഒരുങ്ങുന്നത്. അൽ ജൗഫ് പ്രവിശ്യയിലെ സ്വർണ്ണനിറത്തിലുള്ള മണൽക്കുന്നുകൾ കനത്ത ആലിപ്പഴ വർഷത്തെത്തുടർന്ന് വെളുത്ത പുതപ്പണിഞ്ഞു.

സകാക്കയിലെ ഖൗവ സെൻ്ററിലും നഫൂദ് മരുഭൂമിയിലും മണൽക്കുന്നുകൾ മഞ്ഞിൽ പൊതിഞ്ഞ നിലയിലാണ്. തബൂക്ക് മേഖലയിലെ ജബൽ അൽ ലൗസ് പൂർണ്ണമായും മഞ്ഞിൽ പുതഞ്ഞു.

മക്കയിലെ മസ്ജിദുൽ ഹറാമിലും പരിസരങ്ങളിലും പെയ്ത മഴ തീർത്ഥാടകർക്കും താമസക്കാർക്കും ഒരുപോലെ ആശ്വാസമായി. മദീനയിൽ ആകാശം ഇപ്പോഴും കാർമേഘാവൃതമായി തുടരുകയാണ്.

അൽ ബദീഅ, ഷഖ്രി, റഹീബ് എന്നിവിടങ്ങളിലും ശക്തമായ ആലിപ്പഴ വർഷം റിപ്പോർട്ട് ചെയ്തു. ഈ അപൂർവ കാഴ്ചകൾ ആസ്വദിക്കാനും പകർത്താനുമായി നിരവധി സഞ്ചാരികളും ഫോട്ടോഗ്രാഫർമാരും ഒഴുകിയെത്തുകയാണ്.