ഡിസംബർ 10

ഇന്ന് ഡിസംബർ 10 ലോക മനുഷ്യാവകാശ ദിനം. 1948 ഡിസംബർ 10 -ന് ഐക്യരാഷ്ട്രസഭയുടെ പൊതുസഭ അംഗീകരിച്ച സാർവത്രിക മനുഷ്യാവകാശ പ്രഖ്യാപനത്തെ കുറിച്ചുള്ള ഓർമ്മപ്പെടുത്തലാണ് ഈ ദിനം.

മനുഷ്യാവകാശ സംരക്ഷണത്തിനായി ആഗോളതലത്തിൽ അംഗീകരിക്കപ്പെടുന്ന ആദ്യത്തെ സുപ്രധാന രേഖയാണ് സാർവത്രിക മനുഷ്യാവകാശ പ്രഖ്യാപനം.

ജീവിതം, സ്വാതന്ത്ര്യം, വിദ്യാഭ്യാസം, ജോലി, വിവേചനത്തിൽ നിന്നുള്ള സ്വാതന്ത്ര്യം എന്നിവ ഉൾപ്പെടെ ഓരോ വ്യക്തിക്കും അർഹമായ മൗലികാവകാശങ്ങളെ കുറിച്ച് പ്രഖ്യാപനത്തിൽ പരാമർശിക്കുന്നു.

അന്തസോടെയും സുരക്ഷയോടെയും നാം ഓരോരുത്തർക്കും ഈ ലോകത്ത് ജീവിക്കാനുള്ള അവകാശമാണ് മനുഷ്യാവകാശം.

വംശ, ലിംഗ മത, ദേശീയ ഭേദങ്ങൾ ഒന്നുമില്ലാതെ എല്ലാ മനുഷ്യരും തുല്യരാണെന്ന് ഉറപ്പാക്കുകയാണ് മനുഷ്യാവകാശ ദിനത്തിന്‍റെ ലക്ഷ്യം.

ഓരോ വ്യക്തിയുടെയും അവകാശങ്ങൾ മാനിക്കപ്പെടേണ്ടതും സംരക്ഷിക്കപ്പെടേണ്ടതുമാണെന്ന് ഓർമ്മിപ്പിക്കാനാണ് മനുഷ്യാവകാശ ദിനം ആചരിക്കുന്നത്.

ആളുകളെ അവരുടെ സ്വന്തം അവകാശങ്ങളെക്കുറിച്ച് ബോധവാന്മാരാക്കാനും സമത്വവും നീതിയും മുന്നോട്ട് കൊണ്ടുപോകുന്നതിൽ സജീവമായ പങ്ക് വഹിക്കാനും ഇത് ലക്ഷ്യമിടുന്നു.

ഓരോ വർഷവും ഓരോ ലക്ഷ്യത്തിലൂന്നിയാണ് മനുഷ്യാവകാശദിനം ആചരിക്കുന്നത്. ഇത്തവണത്തെ തീം ഓരോ ദിവസവും മനുഷ്യർക്കുള്ള മനുഷ്യാവകാശത്തെ കുറിച്ചുള്ളതാണ്.

ലോകത്തിന്റെ പല ഭാ​ഗങ്ങളിലും ജാതിയുടെയും മതത്തിന്റെയും ജെൻഡറിന്റെയും യുദ്ധങ്ങളുടെയും പേരിൽ മനുഷ്യാവകാശം ഇന്നും ലംഘിക്കപ്പെടുന്നുണ്ട്. അവിടെ മനുഷ്യാവകാശമെന്ന പദം കൂടുതൽ പ്രധാനമാണ്.