ട്രെൻഡ്

നമ്മുടെ കയ്യിൽ കാശില്ലെങ്കിലും സുഹൃത്തുക്കളുടെയും മറ്റും മുന്നിൽ അത് കാണിക്കാതെ കാര്യങ്ങൾ നടത്തുന്നവരാണ് നമ്മിലധികവും. എന്നാൽ, ആ രീതി മാറി ലൗഡ് ബജറ്റിംഗ് ട്രെൻഡായി മാറുകയാണത്രെ.

പുറമെ സമ്പന്നരാണ് എന്ന് കാണിക്കാൻ വേണ്ടി അനാവശ്യമായി പണം ചിലവാക്കുന്ന രീതി അവസാനിപ്പിച്ച്, സാമ്പത്തിക പരിമിതികളെക്കുറിച്ചും ലക്ഷ്യങ്ങളെക്കുറിച്ചും തുറന്നു പറയുന്ന രീതിയാണിത്.

ലൂക്കാസ് ബാറ്റിൻ എന്ന ടിക് ടോക് താരമാണ് ഈ വാക്ക് ആദ്യമായി സോഷ്യൽ മീഡിയയിൽ ഉപയോഗിച്ചത്. 'നിശബ്ദമായ ആഡംബരം' (Quiet Luxury) എന്ന പഴയ ട്രെൻഡിന് വിപരീതമായാണ് ഇത് പ്രചരിക്കുന്നത്.

സുഹൃത്തുക്കൾ വിലകൂടിയ ഹോട്ടലിലോ യാത്രയ്ക്കോ വിളിക്കുമ്പോൾ, പണമില്ലെന്ന കാര്യം മറച്ചുവെച്ച് കടം വാങ്ങി പോകുന്ന ശീലം ഇവിടെയില്ല. പറ്റിയ അവസ്ഥയല്ലെന്ന് തുറന്ന് സമ്മതിക്കുന്നു.

ക്രെഡിറ്റ് കാർഡുകളെയും വായ്പകളെയും ആശ്രയിച്ച് ആഡംബര ജീവിതം നയിക്കുന്ന പ്രവണത കുറയ്ക്കാൻ ഈ ട്രെൻഡ് സഹായിക്കും.

സാമ്പത്തിക സ്ഥിതി മറച്ചുവെക്കുന്നതു മൂലമുണ്ടാകുന്ന മാനസിക സമ്മർദ്ദം (Financial Anxiety) കുറക്കാൻ ഇത്തരം തുറന്നുപറച്ചിലുകൾ സഹായിക്കുമെന്ന് വിദഗ്ധർ പറയുന്നു.

വീട് വാങ്ങുക, പഠനം, അല്ലെങ്കിൽ നിക്ഷേപങ്ങൾ തുടങ്ങുക തുടങ്ങിയ വലിയ ലക്ഷ്യങ്ങൾക്കായി ചെറിയ ആഗ്രഹങ്ങൾ മാറ്റിവെക്കുന്നു എന്ന് മറ്റുള്ളവരെ ബോധ്യപ്പെടുത്താൻ ഇതിലൂടെ സാധിക്കുന്നു.

സുഹൃത്തുക്കൾക്കിടയിൽ പണത്തെക്കുറിച്ചുള്ള തുറന്ന സംസാരം ഇതുവഴി നടക്കുന്നു. എല്ലാവർക്കും താങ്ങാനാവുന്ന തരത്തിലുള്ള പാർട്ടികളും യാത്രകളുമെല്ലാം കൂട്ടുകാർക്കിടയിൽ നടക്കുന്നു.

യുവാക്കൾക്കിടയിൽ ലൗഡ് ബജറ്റിംഗ് വ്യാപകമായാൽ ഭാവിയിൽ ആഡംബര ബ്രാൻഡുകൾക്കും സേവനങ്ങൾക്കും വരും കാലങ്ങളിൽ വലിയ വെല്ലുവിളി നേരിടേണ്ടി വരുമെന്നാണ് വിലയിരുത്തൽ.