മണ്ണു വേണ്ട, മനസ്സു മതി: വിക്ക് സിസ്റ്റത്തിലൂടെ വീട്ടിലൊരു 'സ്മാർട്ട്' പച്ചക്കറിത്തോട്ടം!

മണ്ണോ വൈദ്യുതിയോ ഇല്ലാതെ വീട്ടിൽ ചെടികൾ വളർത്താനുള്ള ലളിതമായ ഹൈഡ്രോപോണിക്സ് രീതിയാണ് വിക്ക് സിസ്റ്റം. ഒരു തിരി ഉപയോഗിച്ച് പോഷകലായനി ചെടികളുടെ വേരുകളിലേക്ക് എത്തിക്കുന്ന ഈ വിദ്യയിലൂടെ ചീര, മല്ലിയില പോലുള്ളവ എളുപ്പത്തിൽ കൃഷി ചെയ്യാം.

സ്ഥലമില്ലെന്ന പരാതിക്കും മണ്ണിലെ പണികൾ മടുക്കുന്നവർക്കും ഒരു അടിപൊളി പരിഹാരമാണ് ഹൈഡ്രോപോണിക്സ്. കേൾക്കുമ്പോൾ വലിയ 'ഹൈടെക്' ആണെന്ന് തോന്നുമെങ്കിലും, വീട്ടിലെ പഴയ കുപ്പികളും കുറച്ച് പോഷകലായനിയും ഉണ്ടെങ്കിൽ ആർക്കും തുടങ്ങാവുന്ന ഒന്നാണിത്. ഇതിൽ ഏറ്റവും ലളിതമായ 'വിക്ക് സിസ്റ്റം' (Wick System) പരിചയപ്പെടാം. മോട്ടോറോ വൈദ്യുതിയോ ഇല്ലാതെ പ്രവർത്തിക്കുന്ന ഈ രീതി, ചെടികൾക്ക് സ്വയം വെള്ളം കുടിക്കാൻ ഒരു 'സ്ട്രോ' ഇട്ടു കൊടുക്കുന്നത് പോലെയാണ്!

എന്താണ് ഈ വിക്ക് സിസ്റ്റം?

മണ്ണെണ്ണ വിളക്കിലെ തിരി എണ്ണ വലിച്ചെടുത്ത് കത്തുന്നത് കണ്ടിട്ടില്ലേ? അതേ സാങ്കേതികവിദ്യ, കപ്പിലറി ആക്ഷൻ (Capillary Action) തന്നെയാണ് ഇവിടെയും ഉപയോഗിക്കുന്നത്. താഴെയുള്ള പാത്രത്തിലെ വെള്ളം ഒരു തിരി വഴി മുകളിലെ ചെടിയിലേക്ക് എത്തുന്നു. ചെടിക്ക് ആവശ്യമുള്ളപ്പോൾ മാത്രം വെള്ളവും വളവും ഇതിലൂടെ വലിച്ചെടുക്കാം.

വേണ്ടിവരുന്ന സാധനങ്ങൾ

1. ​ചെടി നടാന് പഴയ പ്ലാസ്റ്റിക് കുപ്പികളോ കപ്പുകളോ മതി.
2. ​പോഷക ലായനി നിറയ്ക്കാൻ പാകത്തിന് വെള്ളം പുറത്തുപോകാത്ത ഒരു പാത്രം.
3. ​നല്ലപോലെ വെള്ളം വലിച്ചെടുക്കുന്ന കോട്ടൺ തുണിയോ നൈലോൺ കയറോ ഇതിനായി ഉപയോഗിക്കാം.
4. ​ചെടി വേരുകൾക്ക് നിൽക്കാൻ ചകിരിച്ചോറോ ചെറിയ ചരൽക്കല്ലുകളോ ഉപയോഗിക്കാം.
5. ​ഹൈഡ്രോപോണിക്സിന് ആവശ്യമായ NPK അടങ്ങിയ പ്രത്യേക വളം

എന്തു ചെയ്യണം?

തിരി ഘടിപ്പിക്കാം: ചെടി നടുന്ന പാത്രത്തിന്‍റെ അടിയിൽ ഒരു ചെറിയ ദ്വാരമിട്ട് അതിലൂടെ തിരി കടത്തുക. തിരിയുടെ പകുതി ഭാഗം പാത്രത്തിനുള്ളിലും പകുതി പുറത്തും വരണം.

മീഡിയം നിറയ്ക്കാം: പാത്രത്തിനുള്ളിൽ ചകിരിച്ചോറോ കല്ലുകളോ നിറയ്ക്കുക. തിരി ഇതിന്‍റെ ഇടയിലൂടെ മുകൾഭാഗം വരെ എത്തുന്നുണ്ടെന്ന് ഉറപ്പാക്കണം. എങ്കിലേ മുകളിലുള്ള വേരുകൾക്ക് ഈർപ്പം കിട്ടൂ.

തൈകൾ നടാം: ചീരയോ മല്ലിയിലയോ പോലുള്ള ചെറിയ തൈകൾ ഇതിലേക്ക് പതുക്കെ മാറ്റി നടുക.

പോഷകലായനി: താഴെയുള്ള പാത്രത്തിൽ വെള്ളം നിറച്ച് അതിൽ ഹൈഡ്രോപോണിക് വളം കലർത്തുക.

സെറ്റിംഗ്സ്: ചെടി നട്ട പാത്രം വെള്ളമുള്ള പാത്രത്തിന് മുകളിൽ ഉറപ്പിക്കുക. പുറത്തേക്ക് തൂങ്ങിക്കിടക്കുന്ന തിരിയുടെ അറ്റം താഴെ വെള്ളത്തിൽ മുങ്ങിക്കിടക്കണം.

ചീര, പുതിന, മല്ലിയില, തുളസി എന്നിവ ഈ രീതിയിൽ തഴച്ചു വളരും. പോഷക ലായനി ഇരിക്കുന്ന പാത്രം സുതാര്യമല്ലെങ്കിൽ പായൽ വളരാൻ സാധ്യതയുണ്ട്. അതുകൊണ്ട് കറുത്ത പെയിന്‍റോ കവറോ ഉപയോഗിച്ച് പാത്രം മൂടുന്നത് പായലിനെ അകറ്റും. രണ്ടാഴ്ചയിലൊരിക്കൽ പഴയ വെള്ളം മാറ്റി പുതിയ പോഷകങ്ങൾ കലർത്തുന്നത് ചെടിക്ക് നല്ല ഉന്മേഷം നൽകും.