ഉടനെത്തുന്ന ആ ടാറ്റ എസ്‌യുവി ആരായിരിക്കും? സഫാരി പെട്രോളോ അതോ..?!

ഇത് സഫാരി എസ്‌യുവിയുടെ പെട്രോൾ പതിപ്പോ ജനപ്രിയ ടാറ്റ എസ്‌യുവിയുടെ പ്രത്യേക പതിപ്പോ ആയിരിക്കുമെന്ന് പ്രതീക്ഷിക്കുന്നതായിട്ടാണ് റിപ്പോര്‍ട്ടുകള്‍.

ടാറ്റ മോട്ടോഴ്‌സ് അടുത്തതായി വരാനിരിക്കുന്ന ഒരു എസ്‌യുവി മോഡലിന്റെ ടീസർ വീഡിയോ പുറത്തിറക്കി. ഈ പുതിയ ടാറ്റ എസ്‌യുവി ഓഗസ്റ്റ് 27- ന് , അതായത് ഉത്സവ സീസണിന് തൊട്ടുമുമ്പ് വിൽപ്പനയ്‌ക്കെത്തും എന്നാണ് റിപ്പോര്‍ട്ടുകള്‍. അതേസമയം പുതിയ മോഡലിന്റെ പേരും വിശദാംശങ്ങളും വാഹന നിർമ്മാതാവ് ഇതുവരെ വെളിപ്പെടുത്തിയിട്ടില്ല. എങ്കിലും, ഇത് സഫാരി എസ്‌യുവിയുടെ പെട്രോൾ പതിപ്പോ ജനപ്രിയ ടാറ്റ എസ്‌യുവിയുടെ പ്രത്യേക പതിപ്പോ ആയിരിക്കുമെന്ന് പ്രതീക്ഷിക്കുന്നതായിട്ടാണ് റിപ്പോര്‍ട്ടുകള്‍.

വാഹന നിർമ്മാതാവ് കഴിഞ്ഞ കുറച്ച് മാസങ്ങളായി ടാറ്റ സഫാരി പെട്രോൾ പരീക്ഷിച്ചുവരികയാണ് . റിപ്പോർട്ടുകൾ വിശ്വസിക്കാമെങ്കിൽ, മോഡലിന് ബ്രാൻഡിന്റെ പുതിയ 1.5 ലിറ്റർ ടർബോചാർജ്ഡ് പെട്രോൾ എഞ്ചിൻ ലഭിച്ചേക്കാം. നെക്‌സോണിൽ ലഭ്യമായ 1.2L ടർബോ പെട്രോൾ യൂണിറ്റിന്റെ കൂടുതൽ ശക്തമായ പതിപ്പായിരിക്കും പുതിയ ഗ്യാസോലിൻ എഞ്ചിന്‍

സഫാരി പെട്രോൾ 160 ബിഎച്ച്പി പവറും 250 എൻഎം ടോർക്കും വാഗ്ദാനം ചെയ്യും. ഇത് ആറ് സ്പീഡ് മാനുവൽ ഗിയർബോക്‌സ് അല്ലെങ്കിൽ ആറ് സ്പീഡ് ടോർക്ക് കൺവെർട്ടർ അല്ലെങ്കിൽ ഡിസിടി ഓട്ടോമാറ്റിക് ഗിയർബോക്‌സ് എന്നിവയ്‌ക്കൊപ്പം ഉണ്ടായിരിക്കാം. ടാറ്റ ഹാരിയർ എസ്‌യുവി മോഡൽ ലൈനപ്പിലും ഇതേ എഞ്ചിൻ-ഗിയർബോക്‌സ് കോംബോ വാഗ്ദാനം ചെയ്യും.

വരും ദിവസങ്ങളിൽ ഷോറൂമുകളിൽ എത്താനിരിക്കുന്ന പുതിയ ടാറ്റ എസ്‌യുവി ഒരു പ്രത്യേക പതിപ്പായിരിക്കാനും സാധ്യതയുണ്ട്. കമ്പനിയുടെ 'ന്യൂ ഫോർ എവർ' തന്ത്രത്തിന് കീഴിൽ പുതിയ മോഡലുകളും നിലവിലുള്ള മോഡലുകളുടെ പ്രത്യേക പതിപ്പും അവതരിപ്പിക്കാനുള്ള പദ്ധതി നേരത്തെ വാഹന നിർമ്മാതാവ് വെളിപ്പെടുത്തിയിരുന്നു. അതിന്റെ ജനപ്രിയ എസ്‌യുവികളുടെ ഡാർക്ക് എഡിഷൻ, ഗോൾഡ് എഡിഷൻ, കാസിരംഗ എഡിഷൻ എന്നിവ ഇതിനകം അവതരിപ്പിച്ചു. സഫാരി, ഹാരിയർ, പഞ്ച്, നെക്‌സോൺ എന്നിവയുൾപ്പെടെയുള്ള ഇംപാക്റ്റ് 2.0 ഡിസൈൻ ഭാഷയാണ് ടാറ്റയുടെ 'ന്യൂ ഫോറെവർ' ശ്രേണിയിൽ അവതരിപ്പിക്കുന്നത്.

ടാറ്റയില്‍ നിന്നുള്ള മറ്റ് വാര്‍ത്തകളിൽ, ടാറ്റ മോട്ടോഴ്‌സ് 2023-ൽ ഷോറൂമുകളിൽ എത്താൻ പോകുന്ന ഹാരിയർ ഫെയ്‌സ്‌ലിഫ്റ്റിനായി പ്രവർത്തിക്കുന്നതായി റിപ്പോര്‍ട്ടുകള്‍ ഉണ്ട്. അടുത്തിടെ, ടാറ്റ നെക്‌സോൺ സബ്‌കോംപാക്റ്റ് എസ്‌യുവിയുടെയും ആൾട്രോസ് ഹാച്ച്‌ബാക്കിന്റെയും പരീക്ഷണ പതിപ്പുകള്‍ എമിഷൻ ടെസ്റ്റിംഗ് ഉപകരണങ്ങളുമായി ക്യാമറയിൽ കുടുങ്ങിയിരുന്നു. ഈ രണ്ട് മോഡലുകളും ഈ വർഷം അവസാനത്തോടെ ലോഞ്ച് ചെയ്യാൻ സാധ്യതയുണ്ട്.