കെഎസ്ആര്‍ടിസിക്ക് ഇലക്ട്രിക് ബസെത്തുന്നത് മഹാരാഷ്ട്രയില്‍ നിന്നും

മഹാരാഷ്ട്ര ആസ്ഥാനമായ മഹാവോയേജ് എന്ന കമ്പനിയില്‍ നിന്നും കെഎസ്ആര്‍ടിസിക്ക് ഇലക്ട്രിക്ക് ബസെത്തും. സ്‌കാനിയ ബസുകള്‍ വാടകയ്ക്കു നല്‍കിയ കമ്പനിയാണ് മഹാവോയേജ്. കിലോമീറ്ററിന് 43.20 രൂപ നിരക്കില്‍ പത്ത് ഇലക്ട്രിക് ബസുകളാണ് വാടകയ്‌ക്കെടുക്കുന്നതെന്നാണ് റിപ്പോര്‍ട്ടുകള്‍.

കെഎസ്ആര്‍ടിസി പരീക്ഷിച്ച ഗോള്‍ഡ് സ്റ്റോണ്‍ കമ്പനിയുടെ ഇലക്ട്രിക് ബസുകളാണ് വാടകയ്‌ക്കെടുത്തത്. ബി.വൈ.ഡി. എന്ന ചൈനീസ് കമ്പനിയുടെ സാങ്കേതികവിദ്യയിലാണ് ബസുകള്‍ നിര്‍മിച്ചിട്ടുള്ളത്. 15-ന് ബസുകള്‍ കെഎസ്ആര്‍ടിസിക്കു ലഭിക്കും.

ഒരു കിലോമീറ്റര്‍ ഓടുന്നതിന് 0.8 യൂണിറ്റ് വൈദ്യുതിയാണ് വേണ്ടത്. നാലു മണിക്കൂര്‍കൊണ്ട് ബാറ്ററി ഫുള്‍ ചാര്‍ജ്ജാകും. ബസുകള്‍ ചാര്‍ജ്ജുചെയ്യുന്നതിനുള്ള സൗകര്യം ഒരുക്കിയിട്ടുണ്ട്. ഒരു കിലോമീറ്ററിന് ഡീസല്‍ എ.സി. ബസുകള്‍ക്ക് 31 രൂപ ചെലവു വരുമ്പോള്‍ വൈദ്യുതി ബസുകള്‍ക്ക് നാലു രൂപ മാത്രമാണ് വേണ്ടിവരുന്നത്.

ഇതുസംബന്ധിച്ചു ധാരണാപത്രം ഒപ്പിട്ടു. ഇ-ടെന്‍ഡര്‍ വഴിയാണ് മഹാരാഷ്ട്ര കമ്പനിയുമായി കരാറിലേര്‍പ്പെട്ടത്. ഏറ്റവും കുറഞ്ഞ നിരക്കിലാണ് ടെന്‍ഡര്‍ ഉറപ്പിച്ചിട്ടുള്ളതെന്ന് മാനേജ്മെന്റ് വ്യക്തമാക്കി.  എന്‍സിപി നേതാവിന്റെ ബിനാമി കമ്പനിയാണ് മഹാവോയേജ് എന്ന് നേരത്തേ ആരോപണമുയര്‍ന്നിരുന്നു.