പാണ്ഡ്യ സഹോദരങ്ങൾക്കിടയിൽ ഭിന്നത?, ഹാർദിക്കിന്‍റെ വിജയത്തിൽ ക്രുനാലിന് മൗനം; കാരണമായത് മഹീകയുടെ വരവ്

മാർച്ച് 8-ന് ഇന്ത്യ ലോകകപ്പ് നേടിയപ്പോൾ ഹാർദിക്കിനെ അഭിനന്ദിച്ചുകൊണ്ട് ക്രുനാൽ പാണ്ഡ്യയോ ഭാര്യ പംഖുരിയോ ഒരു പോസ്റ്റ് പോലും പങ്കുവെച്ചില്ല എന്നത് ആരാധകരെ അമ്പരപ്പിച്ചു.

മുംബൈ: ഇന്ത്യ ടി20 ലോകകപ്പില്‍ കിരീടം നേടിയതിന് പിന്നാലെ ചര്‍ച്ചയായി ഹാര്‍ദ്ദിക് പാണ്ഡ്യയും സഹോദരന്‍ ക്രുനാല്‍ പാണ്ഡ്യയും തമ്മിലുള്ള വ്യക്തിപരമായ അകല്‍ച്ച. ഇന്ത്യയുടെ കിരീടനേട്ടത്തില്‍ പ്രമുഖരെല്ലാം അഭിനന്ദനസന്ദേശങ്ങള്‍ പോസ്റ്റ് ചെയ്തപ്പോള്‍ സഹോദരന്‍റെ വിജയത്തില്‍ ക്രുനാല്‍ പാണ്ഡ്യ ഒരു അഭിനന്ദന പോസ്റ്റ് പോലും ചെയ്യാതെ നിശബ്ദത പാലിച്ചതാണ് ആരാധകര്‍ ചര്‍ച്ചയാക്കുന്നത്. ഹാർദിക്കിന്‍റെ നേട്ടങ്ങളില്‍ എന്നും അഭിമാനിച്ചിരുന്ന സഹോദരൻ ക്രുനാൽ പാണ്ഡ്യയും ഭാര്യ പംഖുരി ശർമ്മയും ഇത്തവണ സോഷ്യൽ മീഡിയയിൽ പുലർത്തിയ മൗനം ഇരുവരും തമ്മിലുള്ള ബന്ധത്തിൽ വിള്ളൽ വീണുവെന്ന സൂചനകളാണെന്നാണ് വിലയിരുത്തല്‍.

മാർച്ച് 8-ന് ഇന്ത്യ ലോകകപ്പ് നേടിയപ്പോൾ ഹാർദിക്കിനെ അഭിനന്ദിച്ചുകൊണ്ട് ക്രുനാൽ പാണ്ഡ്യയോ ഭാര്യ പംഖുരിയോ ഒരു പോസ്റ്റ് പോലും പങ്കുവെച്ചില്ല എന്നത് ആരാധകരെ അമ്പരപ്പിച്ചു. മുൻകാലങ്ങളിൽ ഹാർദിക്കിന്റെ എല്ലാ നേട്ടങ്ങളിലും ഒപ്പം നിന്നിരുന്ന ക്രുണാൽ ഇത്തവണ സ്റ്റേഡിയത്തിലും എത്തിയിരുന്നില്ല. ഹാർദിക്കിന്റെ സമീപകാല പോസ്റ്റുകൾക്ക് ക്രുണാൽ ലൈക്ക് ചെയ്യാത്തതും ഇരുവരും തമ്മിലുള്ള 'ഡിജിറ്റൽ അകൽച്ച' വ്യക്തമാക്കുന്നു.

ഈ കലഹത്തിന് പിന്നിൽ ഹാർദിക്കിന്‍റെ പുതിയ പ്രണയബന്ധമാണെന്നാണ് സോഷ്യൽ മീഡിയയിലെ സംസാരം. മോഡലും നടിയുമായ മഹീക ശർമ്മ ടൂർണമെന്‍റിലുടനീളം ഹാർദിക്കിന് പിന്തുണയുമായി ഒപ്പമുണ്ടായിരുന്നു. ഹാർദിക്കിന്‍റെ മകൻ അഗസ്ത്യയെ സ്റ്റേഡിയത്തിൽ ആശ്വസിപ്പിക്കുന്ന മഹീകയുടെ ചിത്രങ്ങൾ വൈറലായിരുന്നു. മഹീക ജീവിതത്തിലേക്ക് വന്നതിന് ശേഷം താൻ വിജയങ്ങൾ മാത്രമാണ് കാണുന്നതെന്ന് ലോകകപ്പ് നേട്ടത്തിനുശേഷം ഹാര്‍ദ്ദിക് പറഞ്ഞിരുന്നു. അവൾ എന്‍റെ ലക്കി ചാം ആണ്, എന്‍റെ മിസ്സിസ് ആണ് എന്നായിരുന്നു ഹാര്‍ദ്ദിക്കിന്‍റെ പ്രതികരണം.

ഹാർദിക്കിന്റെ ഈ വെളിപ്പെടുത്തലാണ് കുടുംബത്തിനുള്ളിലെ അസ്വാരസ്യങ്ങൾ വർദ്ധിപ്പിച്ചത് എന്നാണ് റിപ്പോർട്ടുകൾ. 2024 ജൂലൈയിൽ നതാഷ സ്റ്റാൻകോവിച്ചുമായുള്ള വിവാഹമോചനത്തിന് ശേഷം ക്രുനാലും ഭാര്യയും ഇപ്പോഴും നതാഷയുമായി അടുത്ത സൗഹൃദം പുലർത്തുന്നുണ്ട്. നതാഷയ്ക്കും അഗസ്ത്യയ്ക്കുമൊപ്പം ക്രുനാലിനെ പലപ്പോഴും കാണാറുണ്ട്. എന്നാൽ ഹാർദിക് മഹീകയ്‌ക്കൊപ്പം പുതിയ ജീവിതം തുടങ്ങിയതോടെ കുടുംബം രണ്ട് തട്ടിലായി. മഹീകയുടെ വരവോടെ ഹാർദിക് കുടുംബത്തിൽ നിന്ന് മാറി താമസിക്കാൻ തുടങ്ങിയെന്നും സോഷ്യൽ മീഡിയയിൽ വിമർശനങ്ങൾ ഉയരുന്നുണ്ട്.

ബറോഡയിലെ തെരുവുകളിൽ നിന്ന് ഒരുമിച്ച് ക്രിക്കറ്റ് സ്വപ്നം കണ്ടു വളർന്ന പാണ്ഡ്യ സഹോദരങ്ങൾക്കിടയിലെ ഈ വിള്ളൽ ആരാധകർക്ക് വലിയ നിരാശയാണ് നൽകുന്നത്. 4 കോടി രൂപയുടെ തട്ടിപ്പ് കേസിൽ ഇരുവരുടെയും അപരസഹോദരൻ വൈഭവ് പാണ്ഡ്യ അറസ്റ്റിലായപ്പോൾ കാണിച്ച ആ ഒത്തൊരുമ ഇപ്പോൾ ഇരുവരും തമ്മിലില്ല എന്നത് വ്യക്തമാണ്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക