IND vs NZ : ശ്രേയസിന് പിന്നാലെ സാഹ ക്ലാസിക്; കൂറ്റന് വിജയലക്ഷ്യം വച്ചുനീട്ടി ഇന്ത്യ
Synopsis
കാണ്പൂര് ടെസ്റ്റില് രണ്ടിംഗ്സിലും ശ്രേയസ് അയ്യരുടെ ഇന്നിംഗ്സാണ് ടീം ഇന്ത്യക്ക് തുണയായത്
കാണ്പൂര്: കാണ്പൂര് ടെസ്റ്റില്(India vs New Zealand 1st Test) ശ്രേയസ് അയ്യരുടെ(Shreyas Iyer) മാസ്റ്റര് ക്ലാസിന് പിന്നാലെ വാലറ്റവും തിളങ്ങിയപ്പോള് ന്യൂസിലന്ഡിന് മുന്നില് 284 റണ്സിന്റെ കൂറ്റന് വിജയലക്ഷ്യം വച്ചുനീട്ടി ടീം ഇന്ത്യ(Team India). 49 റണ്സിന്റെ ഒന്നാം ഇന്നിംഗ്സ് ലീഡ് നേടി രണ്ടാം ഇന്നിംഗ്സിന് ഇറങ്ങിയ ഇന്ത്യ 234-7 എന്ന നിലയില് ഡിക്ലെയര് ചെയ്തു. രണ്ടാം ഇന്നിംഗ്സിലും ശ്രേയസ് അയ്യരാണ് ഇന്ത്യയുടെ ടോപ് സ്കോറര്. വൃദ്ധിമാന് സാഹ അര്ധ സെഞ്ചുറി നേടി.
കാണ്പൂര് ടെസ്റ്റില് രണ്ടിംഗ്സിലും ശ്രേയസ് അയ്യരുടെ ഇന്നിംഗ്സാണ് ടീം ഇന്ത്യക്ക് തുണയായത്. ഇന്ത്യ ഒന്നാം ഇന്നിംഗ്സില് 345 റണ്സില് പുറത്തായപ്പോള് ശ്രേയസ് 171 പന്തില് 105 റണ്സെടുത്തു. ഇതോടെ അരങ്ങേറ്റ ടെസ്റ്റില് സെഞ്ചുറി നേടുന്ന 16-ാമത്തെ ഇന്ത്യന് താരമെന്ന നേട്ടം സ്വന്തമായി. ശുഭ്മാന് ഗില്(52), രവീന്ദ്ര ജഡേജ(50) എന്നിവരുടെ ഇന്നിംഗ്സിലും ഇന്ത്യക്ക് തുണയായി. നായകന് അജിങ്ക്യ രഹാനെ 35 റണ്സില് വീണു. ന്യൂസിലന്ഡിനായി ടിം സൗത്തി അഞ്ചും കെയ്ല് ജാമീസണ് മൂന്നും അജാസ് പട്ടേല് രണ്ടും വിക്കറ്റ് നേടി.
മറുപടി ബാറ്റിംഗില് അക്സര് പട്ടേലിന്റെ അഞ്ച് വിക്കറ്റ് പ്രകടനത്തിന് മുന്നില് ന്യൂസിലന്ഡ് 296ല് പുറത്തായി. കിവീസ് ഓപ്പണര്മാരുടെ സെഞ്ചുറി കൂട്ടുകെട്ട് പൊളിച്ച് മൂന്നാം ദിനം ശക്തമായ തിരിച്ചുവരവ് കാഴ്ചവെക്കുകയായിരുന്നു ഇന്ത്യന് ബൗളര്മാര്. ഓപ്പണര്മാരായി ഇറങ്ങി 95 റണ്സെടുത്ത ടോം ലാഥമും 89 റണ്സെടുത്ത വില് യങ്ങും മാത്രമാണ് കിവീസ് നിരയില് പിടിച്ചുനിന്നത്. ഓള്റൗണ്ടര് കെയ്ല് ജാമീസണ് 23 റണ്സ് നേടി. അക്സറിന്റെ അഞ്ചിന് പുറമെ രവിചന്ദ്ര അശ്വിന് മൂന്നും ഉമേഷ് യാദവും രവീന്ദ്ര ജഡേജയും ഓരോ വിക്കറ്റും വീഴ്ത്തി.
ഇന്ത്യയുടെ രണ്ടാം ഇന്നിംഗ്സില് മായങ്ക് അഗര്വാള് 17നും ശുഭ്മാന് ഗില് ഒന്നിനും ചേതേശ്വര് പൂജാര 22നും അജിങ്ക്യ രഹാനെ നാലിനും വീണപ്പോള് 125 പന്തില് 65 റണ്സുമായി രണ്ടാം ഇന്നിംഗ്സിലും ശ്രേയസ് പ്രതിഭ കാട്ടി. രണ്ടിന്നിംഗ്സിലും സൗത്തിക്കായിരുന്നു അയ്യരുടെ വിക്കറ്റ്. പൂജാരയും(22), രഹാനെയും(4) വീണ്ടും നാണക്കേടായി. ആദ്യ ഇന്നിംഗ്സില് അര്ധ സെഞ്ചുറി നേടിയ ജഡേജ പൂജ്യത്തിലും മടങ്ങി. ശ്രേയസിന്റെ ഒപ്പം രക്ഷാപ്രവര്ത്തനം നടത്തിയ ആര് അശ്വിന്റെ 35 റണ്സ് നിര്ണായകമായി.
ഇതോടൊപ്പം വാലറ്റത്ത് വൃദ്ധിമാന് സാഹ-അക്സര് പട്ടേല് സഖ്യം ഇന്ത്യന് ലീഡ് 250 കടത്തി. ഇന്ത്യ 234-7 എന്ന നിലയില് ഡിക്ലെയര് ചെയ്യുമ്പോള് സാഹ 126 പന്തില് 61 ഉം അക്സര് 67 പന്തില് 28 ഉം റണ്സുമായി പുറത്താകാതെ നിന്നു.
IND vs NZ : 'അവനെ തഴയാനാവില്ല'; വിരാട് കോലി വരുമ്പോള് മറ്റാരെങ്കിലും പുറത്തുപോകട്ടേയെന്ന് ചോപ്ര
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!