ഓസീസിനെതിരായ ഏകദിനത്തിനിടെ വാക്കുതര്ക്കത്തില് ഏര്പ്പെട്ട് ക്വിന്റണ് ഡി കോക്കും ടെംബ ബാവുമയും; വീഡിയോ വൈറല്
Synopsis
ഓസ്ട്രേലിയക്കെതിരായ രണ്ടാം ഏകദിനത്തിൽ ദക്ഷിണാഫ്രിക്കയ്ക്ക് 32 റൺസിന്റെ ഉജ്ജ്വല വിജയം. ഡേവിഡ് മില്ലറുടെയും ടെംബ ബാവുമയുടെയും സെഞ്ച്വറികളാണ് വിജയത്തിന് അടിസ്ഥാനമായത്. ഇതിനിടെ ഡിആർഎസ് റിവ്യൂ എടുക്കുന്നതുമായി ബന്ധപ്പെട്ട് ബാവുമയും ഡി കോക്കും തമ്മിലുണ്ടായ വാക്കുതർക്കത്തിന്റെ വീഡിയോ വൈറലായി.
കേപ്ടൗണ്: ഡേവിഡ് മില്ലറുടെയും ക്യാപ്റ്റന് ടെംബ ബാവുമയുടെയും തകര്പ്പന് സെഞ്ച്വറികളുടെ മികവില് ഓസ്ട്രേലിയക്കെതിരായ രണ്ടാം ഏകദിനത്തില് ദക്ഷിണാഫ്രിക്കയ്ക്ക് 32 റണ്സിന്റെ ഉജ്ജ്വല വിജയമാണ് നേടിയത്. ഈ ജയത്തോടെ മൂന്ന് മത്സരങ്ങളുടെ പരമ്പര ദക്ഷിണാഫ്രിക്ക സ്വന്തമാക്കി (2-0). മത്സരത്തില് ആദ്യം ബാറ്റ് ചെയ്ത ദക്ഷിണാഫ്രിക്ക നിശ്ചിത 50 ഓവറില് 9 വിക്കറ്റ് നഷ്ടത്തില് 365 റണ്സാണ് നേടിയത്. മറുപടി ബാറ്റിംഗിനിറങ്ങിയ ഓസ്ട്രേലിയ അവസാന ഓവറില് 333 റണ്സിന് പുറത്തായി.
തകര്പ്പന് ബാറ്റിംഗിങ് പുറത്തെടുത്ത ഡേവിഡ് മില്ലര് 93 പന്തില് നിന്ന് 12 ഫോറുകളും 9 സിക്സറുകളും സഹിതം പുറത്താകാതെ 142 റണ്സ് നേടി. കരിയറിലെ എട്ടാം ഏകദിന സെഞ്ച്വറിയാണ് താരം കുറിച്ചത്. ടെംബ ബാവുമ 103 റണ്സ് നേടി തന്റെ ആറാം ഏകദിന സെഞ്ച്വറിയും സ്വന്തമാക്കി. രണ്ട് പേരും ചേര്ന്ന് നേടിയ 156 റണ്സിന്റെ കൂട്ടുകെട്ടാണ് ദക്ഷിണാഫ്രിക്കന് ഇന്നിംഗ്സിന് അടിത്തറയിട്ടത്. ഓസ്ട്രേലിയക്കായി ജാക്ക് എഡ്വേര്ഡ്സ് 5 വിക്കറ്റും ജോഷ് ഹേസല്വുഡ് 3 വിക്കറ്റും വീഴ്ത്തി.
ഇതിനിടെ ദക്ഷിണാഫ്രിക്കന് ക്യാപ്റ്റന് ടെംബ ബാവുമയും വിക്കറ്റ് കീപ്പര് ക്വിന്റണ് ഡി കോക്കും തമ്മിലുണ്ടായ ചെറിയ വാക്കുതര്ക്കം ശ്രദ്ധേയമായി. ഓസ്ട്രേലിയന് താരം സേവ്യര് ബാര്ട്ട്ലെറ്റിനെതിരായ ഡിആര്എസ് റിവ്യൂ എടുക്കുന്നതുമായി ബന്ധപ്പെട്ടാണ് ഇരുവരും തമ്മില് അഭിപ്രായവ്യത്യാസമുണ്ടായത്. ഇന്നിംഗ്സിന്റെ 48-ാം ഓവറിലായിരുന്നു സംഭവം. റിവ്യൂ എടുക്കാന് തീരുമാനിച്ചതിന് ശേഷം ബാവുമ ദേഷ്യത്തോടെ എന്തോ ഡി കോക്കിനോട് പറയുന്നത് കാണാമായിരുന്നു.
ഇതില് അസംതൃപ്തനായ ഡി കോക്കും തിരിച്ചും പ്രതികരിച്ചു. മൈതാനത്ത് ഇരുവരും തമ്മില് ചെറിയൊരു വാക്കുതര്ക്കം നടക്കുന്നതിനിടെ സഹതാരങ്ങളായ മാര്ക്കോ യാന്സനും ഡേവിഡ് മില്ലറും ഇത് കണ്ട് പുഞ്ചിരിക്കുന്നതും ദൃശ്യങ്ങളില് വ്യക്തമായിരുന്നു. വീഡിയോ...
The exchange between Temba Bavuma and de Kock. He has to respect Bavuma as a captain. pic.twitter.com/zo8KBKNiNA
— Ngqanga Nentsiba Zayo (@Intengu_drongo) September 27, 2026
മറുപടി ബാറ്റിംഗില് ഓസ്ട്രേലിയക്കായി ക്യാപ്റ്റന് മിച്ചല് മാര്ഷ് (84), ട്രാവിസ് ഹെഡ് (84) എന്നിവര് മികച്ച തുടക്കം നല്കിയെങ്കിലും, ദക്ഷിണാഫ്രിക്കന് സ്പിന്നര്മാരായ കേശവ് മഹാരാജ്, എയ്ഡന് മാര്ക്രം എന്നിവരുടെ പക്കല് ഓസ്ട്രേലിയന് ബാറ്റിംഗ് നിര വീഴുകയായിരുന്നു. മധ്യഓവറുകളില് റണ്റേറ്റ് നിലനിര്ത്താന് കഴിയാതെ വന്നതും സ്പിന് ആക്രമണത്തിന് മുന്നില് പതറിയതുമാണ് ഓസ്ട്രേലിയക്ക് തിരിച്ചടിയായത്. അവസാന ഓവറുകളില് സേവ്യര് ബാര്ട്ട്ലെറ്റ് (28 പന്തില് 50) നടത്തിയ ചെറുത്തുനില്പ്പ് പരാജയഭാരം കുറയ്ക്കാന് സഹായിച്ചു.
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!