ഇന്ത്യന് ക്രിക്കറ്റ് താരങ്ങള്ക്കിനി കാര്യങ്ങള് എളുമപ്പമാവില്ല; യോ-യോ ടെസ്റ്റ് തിരിച്ചുകൊണ്ടുവന്ന് ബിസിസിഐ
Synopsis
താരങ്ങളുടെ ഫിറ്റ്നെസിന്റെ കാര്യത്തില് ഒരു വിട്ടുവീഴ്ച്ചയ്ക്കും ബിസിസിഐ തയ്യാറാവില്ല. ഇന്ത്യയുടെ പ്രധാന താരങ്ങളുടെ വര്ക്ക്ലോഡ് കുറയ്ക്കുന്നതിന്റെ ഭാഗമായി ബിസിസിഐ ഫ്രാഞ്ചൈസികളുമായി ചേര്ന്ന് പ്രവര്ത്തിക്കും.
മുംബൈ: ഏകദിന ലോകകപ്പ് അടുത്തിരിക്കെ ഇന്ത്യന് ക്രിക്കറ്റ് താരങ്ങള്ക്ക് ഫിറ്റ്നെസ് കര്ശനമാക്കുന്നു. ഫിറ്റ്നെസ് തെളിയിക്കാന് യോ-യോ ടെസ്റ്റ് തിരിച്ചുകൊണ്ടുവന്നിരിക്കുകയാണ് ബിസിസിഐ. യോ-യോ ടെസ്റ്റ് ജയിച്ചാല് മാത്രമേ, ടീമില് ഉള്പ്പെടുത്തൂ. ഡെക്സയും ജയിക്കണം. ഇന്ന് മുംബൈ ചേര്ന്ന യോഗത്തിലാണ് തീരുമാനം. പരിശീലകന് രാഹുല് ദ്രാവിഡ്, ക്യാപ്റ്റന് രോഹിത് ശര്മ, ചീഫ് സെലകറ്റര് ചേതന് ശര്മ, നാഷണല് ക്രിക്കറ്റ് അക്കാദമി തലവന് വിവിഎസ് ലക്ഷ്മണ് എന്നിവര് പങ്കെടുത്തു. ബിസിസിഐ പ്രസിഡന്റ് റോജര് ബിന്നി വീഡിയോ കോണ്ഫറെന്സിലൂടേയും ഭാഗമായി.
താരങ്ങളുടെ ഫിറ്റ്നെസിന്റെ കാര്യത്തില് ഒരു വിട്ടുവീഴ്ച്ചയ്ക്കും ബിസിസിഐ തയ്യാറാവില്ല. ഇന്ത്യയുടെ പ്രധാന താരങ്ങളുടെ വര്ക്ക്ലോഡ് കുറയ്ക്കുന്നതിന്റെ ഭാഗമായി ബിസിസിഐ ഫ്രാഞ്ചൈസികളുമായി ചേര്ന്ന് പ്രവര്ത്തിക്കും. താരങ്ങളെ കളിപ്പിക്കുന്ന കാര്യത്തില് ബിസിസിഐ ഇടപെടും. പരിക്കേല്ക്കാന് സാധ്യതയുള്ള ഇന്ത്യന് താരങ്ങള് ഐപിഎല്ലില് നിന്ന് വിട്ടുനില്ക്കണമെന്നും നിര്ദേശമുണ്ട്. മാത്രമല്ല, ഈ വര്ഷം നടക്കുന്ന ഏകദിന ലോകകപ്പിന്റെ ഭാഗമാവാന് സാധ്യതയുള്ള താരങ്ങളുടെ പട്ടികയും ബിസിസിഐ തയ്യാറാക്കി. 20 താരങ്ങളുടെ പേരുകളാണ് ലിസ്റ്റിലുള്ളത്.
എന്നാല് താരങ്ങള് ആരൊക്കെയെന്ന് പുറത്തുവിട്ടിട്ടില്ല. തിരഞ്ഞെടുത്ത താരങ്ങളെ റൊട്ടേറ്റ് ചെയ്ത് കളിപ്പിക്കുമെന്നാണ് ബിസിസിഐ പറയുന്നത്. ബിസിസിഐയുടെ പട്ടികയില് മലയാളി താരം സഞ്ജു സാംസണ് ഉള്പ്പെട്ടിട്ടുണ്ടാവുമോ എന്നാല് ക്രിക്കറ്റ് ആരാധകര് അന്വേഷിക്കുന്നത്. ഈ മാസം പത്തിന് ശ്രീലങ്കയ്ക്കെതിരായ പരമ്പരയോടെയാണ് ഇന്ത്യയുടെ ഏകദിന മത്സരങ്ങള് ആരംഭിക്കുന്നത്. എന്നാല് സഞ്ജുവിനെ ടീമില് ഉള്പ്പെടുത്തിയിരുന്നില്ല. ടി20 ടീമില് അവസരം ലഭിക്കുകയും ചെയ്തു.
ഏകദിന പരമ്പരയ്ക്കുള്ള ഇന്ത്യന് സ്ക്വാഡ്: രോഹിത് ശര്മ (ക്യാപ്റ്റന്), ശുഭ്മാന് ഗില്, വിരാട് കോലി, സൂര്യകുമാര് യാദവ്, ശ്രേയസ് അയ്യര്, കെ എല് രാഹുല് (വിക്കറ്റ് കീപ്പര്), ഇഷാന് കിഷന് (വിക്കറ്റ് കീപ്പര്), ഹാര്ദിക് പാണ്ഡ്യ (വൈസ് ക്യാപ്റ്റന്), വാഷിംഗ്ടണ് സുന്ദര്, യുസ്വേന്ദ്ര ചാഹല്, കുല്ദീപ് യാദവ്, അക്സര് പട്ടേല്, മുഹമ്മദ് ഷമി, മുഹമ്മദ് സിറാജ്, ഉമ്രാന് മാലിക്, അര്ഷ്ദീപ് സിംഗ്.