കല്യാണം വിളിക്കാത്തതിൽ തുടങ്ങിയ തർക്കം: കോട്ടയത്ത് യുവാവ് വെട്ടേറ്റ് മരിച്ചു

ബിനുവിന് ശരീരമാസകലം വെട്ടേറ്റിരുന്നു. കോട്ടയം മെഡിക്കൽ കോളേജിൽ ചികിത്സയിലായിരുന്നു

കോട്ടയം: യുവാവ് വെട്ടേറ്റ് മരിച്ചു. കോട്ടയം കറുകച്ചാലിലാണ് സംഭവം നടന്നത്. കറുകച്ചാൽ ഉമ്പിടി  സ്വദേശി കുറ്റിയാനിക്കൽ ബിനു (36) ആണ് കൊല്ലപ്പെട്ടത്. സംഭവത്തിൽ പ്രതികളായ വിഷ്ണു, സെബാസ്റ്റ്യൻ എന്നിവർ പിന്നീട് പൊലീസ് സ്റ്റേഷനിൽ കീഴടങ്ങി. മുൻ വൈരാഗ്യമാണ് കൊലയ്ക്ക് കാരണമെന്ന് പോലീസ് പറയുന്നു. ഇന്നലെ രാത്രി ഒൻപതു മണിയോടെയായിരുന്നു സംഭവം. ബിനുവിന് ശരീരമാസകലം വെട്ടേറ്റിരുന്നു. കോട്ടയം മെഡിക്കൽ കോളേജിൽ ചികിത്സയിലായിരുന്നു. ഇന്ന് പുലർച്ചെയാണ് മരണം സംഭവിച്ചത്. കല്യാണം വിളിക്കാത്തതിന്റെ പേരിൽ തുടങ്ങിയ തർക്കമാണ് കൊലപാതകത്തിൽ കലാശിച്ചത്. സെബാസ്റ്റ്യൻ തന്റെ കല്യാണത്തിന് ബിനുവിനെ ക്ഷണിച്ചിരുന്നില്ല. ഇതിന്റെ പേരിൽ സെബാസ്റ്റ്യന്റെ വീടിന് ബിനു കല്ലെറിഞ്ഞിരുന്നു. വിഷ്ണുവിനെ ഭാര്യയുടെ മുന്നിൽ വെച്ച് ബിനു ഭീഷണിപ്പെടുത്തിയിരുന്നു. ഇതാണ് ബിനുവിനെ ആക്രമിക്കാൻ കാരണം.

കൊല്ലപ്പെട്ട ബിനുവിന് 36 വയസാണ്. സ്ഥിരമായി ബിനു ഇവരെ ശല്യം ചെയ്യാറുണ്ടായിരുന്നു എന്നാണ് പ്രതികളുടെ മൊഴി. ബിനുവിന്റെ പ്രകോപനത്തെ തുടർന്നാണ് ഇയാളെ വെട്ടിക്കൊലപ്പെടുത്തിയത്. ബിനുവിനെ വിളിച്ചുവരുത്തിയ ശേഷം വടിവാൾ ഉപയോഗിച്ച് വെട്ടുകയായിരുന്നു. ആക്രമിച്ച ശേഷം പ്രതികൾ പൊലീസ് സ്റ്റേഷനിലെത്തി കീഴടങ്ങി.