​ഗോൾഡൻ വിസയും ദുബായിൽ ആഢംബര ഫ്ലാറ്റും; ഒടുവിൽ വെളിപ്പെടുത്തി അനീഷ്

ദുബായിൽ ആഢംബര ഫ്ലാറ്റും ഗോൾഡൻ വിസയും ലഭിച്ചെന്ന വാര്‍ത്തകളില്‍ പ്രതികരിച്ച് ബിഗ് ബോസ് മലയാളം സീസൺ 7 റണ്ണറപ്പ് അനീഷ്. മൈജിയിൽ നിന്ന് ഗൃഹോപകരണങ്ങളും വിലയേറിയ മൊബൈൽ ഫോണും അദ്ദേഹത്തിന് സമ്മാനമായി ലഭിച്ചിട്ടുണ്ട്.

​ഗ്രാന്റ് ഫിനാലെ കഴിഞ്ഞ് ദിവസങ്ങൾ കഴിഞ്ഞെങ്കിലും ബി​ഗ് ബോസ് മലയാളം സീസൺ 7നുമായി ബന്ധപ്പെട്ട കാര്യങ്ങൾ സോഷ്യൽ മീഡിയയിൽ നിറഞ്ഞു നിൽക്കുകയാണ്. വിജയികളായവരുടെ വീടുകളും അവരുടെ ഓരോ വാക്കുകളും അഭിമുഖങ്ങളുമൊക്കെ ഏറെ ശ്രദ്ധനേടുന്നുണ്ട്. അക്കൂട്ടത്തിലായിരുന്നു ഫസ്റ്റ് റണ്ണറപ്പായ അനീഷിന് ദുബായിൽ ​ആഢംബര ഫ്ലാറ്റും ​ഗോൾഡൻ വിസയും ലഭിച്ചെന്ന തരത്തിൽ വാർത്തകൾ വന്നത്. ദുബായിൽ പ്രോപ്പർട്ടി കൺസൽട്ടന്റായ മുഹമ്മദ് അസ്റുദ്ദീൻ ആയിരുന്നു ഇക്കാര്യം പറഞ്ഞ് വീഡിയോ പങ്കിട്ടതെന്നായിരുന്നു വാര്‍ത്ത. ഇത് ഏറെ ശ്രദ്ധനേടുകയും ചെയ്തിരുന്നു.

ഇപ്പോഴിതാ ഇക്കാര്യത്തിലെ സത്യാവസ്ഥ വെളുപ്പെടുത്തി രം​ഗത്ത് എത്തിയിരിക്കുകയാണ് അനീഷ്. വ്യാജ വാർത്തയാണിതെന്നും ആഢംബര ഫ്ലാറ്റോ ​ഗോൾഡൻ വിസയോ തനിക്ക് ലഭിച്ചിട്ടില്ലെന്നും അനീഷ് വ്യക്തമാക്കുന്നുണ്ട്. തന്റെ സോഷ്യൽ മീഡിയ പേജിലൂടെയാണ് അനീഷ് വ്യക്തത വരുത്തിയിരിക്കുന്നത്.

"സോഷ്യൽ മീഡിയയിൽ ഇപ്പോൾ പ്രചരിച്ച് കൊണ്ടിരിക്കുന്ന ഒരു കാര്യത്തിന്റെ സത്യാവസ്ഥ നിങ്ങളുമായി പങ്കുവയ്ക്കാനാണ് വന്നത്. ദുബായിൽ ആഢംബര ഫ്ലാറ്റും ​ഗോൾഡൻ വിസയൊക്കെ കിട്ടിയില്ലേന്ന് പറഞ്ഞത് ഒരുപാട് പേര് മെസേജ് അയച്ച് ചോദിക്കുന്നുണ്ട്. സത്യാവസ്ഥ എന്തെന്നാൽ, വസ്തുതാപരമായ കാര്യമല്ല ഈ പ്രചരിക്കുന്നത്. ആഢംബര ഫ്ലാറ്റോ ​ഗോൾഡൻ വിസയോ എനിക്ക് കിട്ടിയിട്ടില്ല. അതൊരു വ്യാജ വാർത്തയാണ്", എന്നായിരുന്നു അനീഷിന്റെ വാക്കുകൾ. ‌

പത്ത് വർഷത്തേക്ക് ​ഫ്രീ ​ഗോൾഡൻ വിസയും ഫ്ലാറ്റും അനീഷിന് നൽകുമെന്നും വേണമെങ്കിൽ ഈ വീട് വാടകയ്ക്ക് കൊടുത്ത് 60 മുതൽ 70 ലക്ഷം രൂപ വരെ സമ്പാദിക്കാമെന്ന തരത്തിലുമായിരുന്നു വീഡിയോ പുറത്തുവന്നത്. അതേസമയം, ഫസ്റ്റ് റണ്ണറപ്പായ അനീഷിന്റെ വീട്ടിലേക്ക് ആവശ്യമായ എല്ലാ ​ഗൃഹോപകരണങ്ങളും ഫ്രീയായി നൽകുമെന്ന് മൈജി അറിയിച്ചിട്ടുണ്ട്. അതോടൊപ്പം ഏകദേശം 2 ലക്ഷം രൂപ വിലമതിക്കുന്ന ഗ്യാലക്സി ഫോൾഡ് 7 മൊബൈലും അനീഷിന് ബി​ഗ് ബോസ് ​ഗ്രാന്റ് ഫിനാലെ വേദിയിൽ വച്ച് നൽകിയിരുന്നു.