വീണ്ടുമൊരു റീ റിലീസ്, രജനികാന്തിന്റെ ആ ഹിറ്റ് ചിത്രം വീണ്ടും തിയറ്ററുകളിലേക്ക്

രജനികാന്തിന്റെ ഹിറ്റ് ചിത്രം വീണ്ടും തിയറ്ററുകളിലേക്ക് എത്തുന്നു.

റീ റിലീസുകളുടെ കാലമാണ് ഇപ്പോള്‍. നിരവധി ചിത്രങ്ങളാണ് റീ റിലുസുകളായെത്തി വൻ വിജയം കൈവരിക്കുന്നത്. തമിഴകത്ത് നിന്ന് പുതിയ ഒരു റീ റിലീസിന് കൂടി തയ്യാറെടുക്കുകയാണ്. രജനികാന്ത് നായകനായ ഹിറ്റ് ചിത്രം അണ്ണാമലൈയാണ് റീ റിലീസിന് തയ്യാറെടുക്കുന്നത്.

അണ്ണാമലൈ ഡിസംബര്‍ 12നാണ് വീണ്ടും തിയറ്ററുകളില്‍ എത്തുക. 1992ലാണ് അണ്ണാമലൈ ആദ്യം പ്രദര്‍ശനത്തിനെത്തിയത്. സുരേഷ് കൃഷ്‍ണയാണ് സംവിധാനം നിര്‍വഹിച്ചത്. രജനികാന്ത് ടൈറ്റില്‍ കഥാപാത്രമായ അണ്ണാമലൈയായിയെത്തിയ ചിത്രത്തില്‍ ഖുശ്‍ബു, ശരത് ബാബു, രേഖ, രാധാ രവി, ജനനരാജ്, നിഴല്‍ഗള്‍ രവി, പ്രഭാകര്‍, വിനു ചക്രവര്‍ത്തി, മനോരമ, വൈഷ്‍ണവി എന്നിവരും പ്രധാന വേഷങ്ങളില്‍ എത്തിയപ്പോള്‍ വൻ വിജയമായിരുന്നു നേടിയിരുന്നത്.

രജനികാന്ത് നായകനായി ഏറ്റവുമൊടുവില്‍ പ്രദര്‍ശനത്തിന് വന്നത് കൂലിയാണ്. ലോകേഷ് കനകരാജാണ് സംവിധാനം നിര്‍വഹിച്ചത്. കൂലിയുടെ തിരക്കഥ ഒരുക്കിയിരിക്കുന്നത് ലോകേഷും ചന്ദ്രു അൻപഴകനും ചേര്‍ന്നാണ്. അനിരുദ്ധ് രവിചന്ദറാണ് സംഗീത സംവിധാനം. ഗിരീഷ് ഗംഗാധരന്‍ ഛായാഗ്രഹണവും നിര്‍വ്വഹിച്ചിരിക്കുന്നു. നാഗാര്‍ജുന, സൗബിന്‍ ഷാഹിര്‍, ഉപേന്ദ്ര, ശ്രുതി ഹാസന്‍, സത്യരാജ് എന്നിവര്‍ ചിത്രത്തിലെ പ്രധാന കഥാപാത്രങ്ങളെ അവതരിപ്പിച്ചിരിക്കുമ്പോള്‍ ആമിര്‍ ഖാൻ സുപ്രധാന അതിഥി കഥാപാത്രമായും എത്തിയിരിക്കുന്നു.

ഇന്ത്യൻ സിനിമയില്‍ റീ റിലീസായെത്തി ഏറ്റവും കൂടുതല്‍ കളക്ഷൻ നേടിയത് ബാഹുബലി ഫ്രാഞ്ചസിയാണ്. ബാഹുബലി രണ്ട് ഭാഗങ്ങളും ചേര്‍ത്ത് രാജമൗലിയുടെ മേല്‍നോട്ടത്തില്‍ റീ എഡിറ്റിംഗും റീമാസ്റ്ററിംഗും നടത്തിയ ചിത്രം ബാഹുബലി: ദി എപിക് എന്ന പേരിലാണ് എത്തിയത്. നവംബര്‍ 2 നായിരുന്നു ഈ റീ റിലീസ്. രണ്ട് ഭാഗങ്ങളും ചേര്‍ത്തപ്പോള്‍ 3.45 മണിക്കൂര്‍ ആണ് ചിത്രത്തിന്‍റെ ദൈര്‍ഘ്യം. എന്നാല്‍ സിനിമയുടെ ഈ നീളക്കൂടുതലൊന്നും ബാഹുബലി ആരാധകരെ പിന്നോട്ട് വലിച്ചില്ല. മറിച്ച് കണ്ടവരില്‍ നിന്ന് മികച്ച മൗത്ത് പബ്ലിസിറ്റിയാണ് ചിത്രത്തിന് ലഭിച്ചത്. അത് ബോക്സ് ഓഫീസിലും പ്രതിഫലിക്കുകയാണ്. ആഭ്യന്തര മാര്‍ക്കറ്റില്‍ മാത്രമല്ല, റിലീസ് ചെയ്യപ്പെട്ട മറ്റ് വിദേശ മാര്‍ക്കറ്റുകളിലും. ബാഹുബലി: ദി എപിക് ആഗോളതലത്തില്‍ നിന്ന് ആകെ 51 കോടിയിലധികം നേടിയിരുന്നു.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക