മോഹൻലാൽ സർ ഇതിഹാസം, ഒരുമിച്ചൊരു സിനിമ ചെയ്യാനിരുന്നതാണ്, പക്ഷേ..; വിജയ് സേതുപതി

കേരളത്തിലും എനിക്ക് ഒത്തിരി ആരാധകരുണ്ട്. അവരുടെ മെസേജുകൾ തനിക്ക് കിട്ടാറുണ്ടെന്നും വിജയ് സേതുപതി.

മലയാളികളുടെ സ്വകാര്യ അഹങ്കാരമാണ് മോഹൻലാൽ. വർഷങ്ങൾ നീണ്ട അഭിനയ ജീവിതത്തിൽ എന്നും ഓർത്തുവയ്ക്കാൻ ഒരുപിടി മികച്ച സിനിമകളാണ് അദ്ദേഹം സമ്മാനിച്ചു കഴിഞ്ഞത്. ഇന്നും തന്റെ അഭിനയപാടവത്തിലൂടെ മലയാളികളെ അമ്പരപ്പിക്കുന്ന മോഹൻലാലിനെ കുറിച്ച് തമിഴ് നടൻ വിജയ് സേതുപതി പറഞ്ഞ വാക്കുകളാണ് ശ്രദ്ധനേടുന്നത്. 

മോഹൻലാൽ ഇതിഹാസമാണെന്ന് പറഞ്ഞ വിജയ് സേതുപതി, അദ്ദേഹത്തോടൊപ്പം സിനിമ ചെയ്യാനിരുന്നതാണെന്നും എന്നാൽ ഡേറ്റ്  പ്രശ്നം കാരണം അത് നടന്നില്ലെന്നും പറയുന്നു. ഒരു യുട്യൂബ് ചാനലിന് നൽകിയ പഴയൊരു അഭിമുഖത്തിൽ ആയിരുന്നു സേതുപതിയുടെ പ്രതികരണം. ഇതിന്റെ വീഡിയോ പാൻ പേജുകളിൽ പ്രചരിക്കുന്നുണ്ട്. 

വിജയ് സേതുപതിയുടെ വാക്കുകൾ

കേരളത്തിലും എനിക്ക് ഒത്തിരി ആരാധകരുണ്ട്. അവരുടെ മെസേജുകൾ എനിക്ക് കിട്ടാറുമുണ്ട്. അവർ എന്നെ വളയധികം സനേഹിക്കുന്നു. വളരെ കുറച്ച് മലയാള സിനിമകൾ മാത്രമെ ഞാൻ കണ്ടിട്ടുള്ളൂ. തന്മാത്ര എനിക്ക് ഒത്തിരി ഇഷ്ടമാണ്. ഭ്രമരവും. വളരെ മികച്ച നടനാണ് മോഹൻലാൽ സർ. അദ്ദേഹവുമായി ഫോണിൽ സംസാരിച്ചിട്ടുണ്ട്. ഒരുമിച്ച് ഒരു സിനിമ ചെയ്യാനിരുന്നതാണ്. പക്ഷേ ഡേറ്റ് കാരണം മിസ്സായി പോയി. അദ്ദേഹം ഇതിഹാസമാണ്. ഇതിഹാസത്തോടൊപ്പം അഭിനയിക്കാൻ ലഭിച്ച അവസരങ്ങളൊന്നും ആരും പാഴാക്കില്ല. തന്മാത്രയിൽ ഓഫീസിൽ നിന്നും വരുന്ന മോഹൻലാൽ സർ കുളിക്കുന്നൊരു രം​ഗം ഉണ്ട്. അതെനിക്ക് കാണ്ടിരിക്കാൻ പറ്റിയില്ല. പഠിക്കാനായാണ് ഞാൻ ആ സിനിമ കാണുന്നതെന്ന് എനിക്കറിയാം. പക്ഷേ ആ രം​ഗം എനിക്ക് കണ്ടിരിക്കാൻ സാധിച്ചില്ല. മെമ്മറി ലോസ് വന്നിട്ടുള്ള ബെഡ്റൂം സീനുണ്ട്. അതൊന്നും ഒരു രക്ഷയും ഇല്ല. 

അതേസമയം, മലൈക്കോട്ടൈ വാലിബന്‍ എന്ന ചിത്രത്തിലാണ് മോഹന്‍ലാല്‍ ഇപ്പോള്‍ അഭിനയിച്ചു കൊണ്ടിരിക്കുന്നത്. ലിജോ ജോസ് പെല്ലിശ്ശേരിയാണ് സംവിധാനം. രാജസ്ഥാനില്‍ ചിത്രീകരണം ആരംഭിച്ച ചിത്രത്തിന്‍റെ ആദ്യ ഷെഡ്യൂള്‍ അടുത്തിടെ അവസാനിച്ചിരുന്നു.