ആരാധകരെ ആശങ്കയിലാഴ്ത്തി നടി സുധാ ചന്ദ്രന്‍റെ വീഡിയോ; പ്രാർത്ഥനയ്ക്കിടെ തീവ്രമായ വൈകാരിക മാറ്റം, പിന്തുണച്ച് കമന്‍റുകൾ

പ്രശസ്ത താരം സുധാ ചന്ദ്രൻ ഒരു മതപരമായ ചടങ്ങിൽ വെച്ച് വികാരാധീനയായി പെരുമാറുന്ന വീഡിയോ സോഷ്യൽ മീഡിയയിൽ വൈറലായി. നിയന്ത്രിക്കാനാവാതെ കരയുന്ന നടിയെ കണ്ട് ആരാധകർ ആശങ്കയിലാണ്. 

ചെന്നൈ: പ്രശസ്ത ചലച്ചിത്ര-സീരിയൽ താരം സുധാ ചന്ദ്രൻ അതീവ വികാരാധീനയായി പെരുമാറുന്ന ഒരു വീഡിയോ സോഷ്യൽ മീഡിയയിൽ വ്യാപകമായി പ്രചരിക്കുന്നു. ഒരു മതപരമായ ചടങ്ങായ 'മാതാ കി ചൗക്കി'യിൽ പങ്കെടുത്തപ്പോഴാണ് സുധയെ നിയന്ത്രിക്കാൻ കഴിയാത്ത വിധം അസ്വസ്ഥയായ നിലയിൽ കണ്ടത്. ഇത് ഏതെങ്കിലും സിനിമയുടെയോ പരമ്പരയുടെയോ ചിത്രീകരണമല്ലെന്ന് ഉറപ്പായതോടെ ആരാധകർ വലിയ ആശങ്കയിലാണ്. വീഡിയോയിൽ സുധാ ചന്ദ്രൻ വല്ലാതെ നിലവിളിക്കുന്നതായും സ്വയം നിയന്ത്രിക്കാൻ പ്രയാസപ്പെടുന്നതായും കാണാം. 

അവിടെയുണ്ടായിരുന്ന ആളുകൾ അവരെ ശാന്തയാക്കാൻ ശ്രമിക്കുന്നുണ്ടെങ്കിലും അവർ എല്ലാവരെയും തള്ളിമാറ്റാൻ ശ്രമിക്കുന്നുണ്ട്. തന്നെ പിടിച്ചുനിർത്താൻ ശ്രമിച്ച ഒരാളെ സുധ കടിക്കാൻ ശ്രമിക്കുന്ന ദൃശ്യങ്ങൾ ആരാധകരെ അമ്പരപ്പിച്ചിരിക്കുകയാണ്. പ്രാർത്ഥനയ്ക്കിടെ ഉണ്ടായ തീവ്രമായ വൈകാരിക മാറ്റമാകാം ഇതിന് കാരണമെന്നാണ് പലരും കരുതുന്നത്. വീഡിയോയ്ക്ക് താഴെ സമ്മിശ്ര പ്രതികരണങ്ങളാണ് വരുന്നത്.

സോഷ്യൽ മീഡിയ പ്രതികരണം

"അവർ വല്ലാതെ വൈകാരികമായി തളർന്നിരിക്കുകയാണ്, അതുകൊണ്ടാണ് ഇങ്ങനെ പെരുമാറുന്നത്," എന്ന് ഒരാൾ കുറിച്ചു. എന്നാൽ മറ്റു ചിലർ ഇത് ഭക്തിയുമായി ബന്ധപ്പെട്ട 'പരകായ പ്രവേശം' ആണെന്നും അത്തരത്തിൽ പെരുമാറുന്ന ആളുകളെ ബഹുമാനിക്കണമെന്നും അഭിപ്രായപ്പെട്ടു. പ്രിയപ്പെട്ട നടി ഇത്തരമൊരു അവസ്ഥയിൽ ഇരിക്കുന്നത് കാണുമ്പോൾ വിഷമം തോന്നുന്നുവെന്നും മറ്റു ചിലർ പ്രതികരിച്ചു.

സത്യാവസ്ഥ അറിയാതെ വീഡിയോ കണ്ട് നടിയെ വിധിക്കരുതെന്നും ഇത്തരം ഭക്തിനിർഭരമായ ചടങ്ങുകളിൽ ആളുകൾക്ക് ഇത്തരത്തിലുള്ള മാനസികാവസ്ഥകൾ ഉണ്ടാകാമെന്നും മറുവിഭാഗം വാദിക്കുന്നു. സുധാ ചന്ദ്രൻ ഇതുവരെ ഈ വിഷയത്തിൽ ഔദ്യോഗികമായി പ്രതികരിച്ചിട്ടില്ല. 'നാഗിൻ', 'യേ ഹേ മൊഹബത്തേൻ', 'ക്യൂങ്കി സാസ് ഭി കഭി ബഹു തി' തുടങ്ങിയ ജനപ്രിയ പരമ്പരകളിലൂടെ മലയാളികൾക്കും ഏറെ സുപരിചിതയാണ് സുധാ ചന്ദ്രൻ.