കേട്ടതൊക്കെ സത്യമോ? ഷാരൂഖും മോഹൻലാലും രജനിയും ഒറ്റ ഫ്രെയിമിൽ; 'ജയിലർ 2' അപ്‌ഡേറ്റ്

ആദ്യ ഭാഗത്തിന്റെ വൻ വിജയത്തിന് ശേഷം രജനികാന്ത് നായകനായി എത്തുന്ന 'ജയിലർ 2' വിന്റെ ചിത്രീകരണം പുരോഗമിക്കുകയാണ്. മോഹൻലാൽ, ഷാരൂഖ് ഖാൻ തുടങ്ങിയ ഇന്ത്യൻ സിനിമയിലെ വലിയ താരനിരയും ചിത്രത്തിൽ ഒന്നിക്കുമെന്ന അഭ്യൂഹങ്ങൾ ശക്തമാണ്. Jailer 2

തെന്നിന്ത്യൻ പ്രേക്ഷകർ പ്രതീക്ഷയോടെ കാത്തിരിക്കുന്ന ചിത്രമാണ് രജനികാന്ത്- നെൽസൺ കൂട്ടുകെട്ടിൽ പുറത്തിറങ്ങുന്ന ജയിലർ 2. ആദ്യ ഭാഗത്തിന്റെ വമ്പൻ വിജയത്തിന് ശേഷം മുത്തുവേൽ പാണ്ഡ്യൻ എന്ന കഥാപാത്രമായി രജനികാന്ത് വീണ്ടുമെത്തുമ്പോൾ വലിയ പ്രതീക്ഷയോടെയാണ് പ്രേക്ഷകർ ഒന്നടങ്കം കാത്തിരിക്കുന്നത്. രജനിക്കൊപ്പം ജയിലർ 2 ൽ ഇന്ത്യൻ സിനിമയിലെ വമ്പൻ താരങ്ങൾ ഒന്നിക്കുന്നുവെന്ന് നേരത്തെ തന്നെ റിപ്പോർട്ടുകളുണ്ടായിരുന്നു. ഇപ്പോഴിതാ ജയിലർ ആദ്യ ഭാഗത്തിന് വേണ്ടി മോഹൻലാലിന്റെ കോസ്റ്റ്യൂം ഡിസൈനറായിരുന്ന ജിഷാദ് ഷംസുദ്ധീൻ ഇൻസ്റ്റയിൽ പങ്കുവച്ച പോസ്റ്റാണ് ചർച്ചയാവുന്നത്.

മോഹൻലാലും രജനിയും ഷാരുഖ് ഖാനും ശിവരാജ് കുമാറും ഉള്ള ഒരു എ.ഐ ചിത്രമാണ് ജിഷാദ് തന്റെ ഇൻസ്റ്റാഗ്രാം സ്റ്റോറിൽ പങ്കുവച്ചിരിക്കുന്നത്. എന്തായാലും ജയിലർ രണ്ടാം ഭാഗത്തിൽ മുത്തുവേൽ പാണ്ഡ്യാനൊപ്പം മോഹൻലാലും ഷാരുഖും ഒന്നിക്കും എന്ന് തന്നെയാണ് പ്രേക്ഷകർ പ്രതീക്ഷിക്കുന്നത്. ആദ്യ ഭാഗത്തിലെ പ്രതിനായകനായി എത്തിയ വിനായകൻ രണ്ടാം ഭാഗത്തിലുമുണ്ടെന്ന് നേരത്തെ താരം പറഞ്ഞിരുന്നു. അതുപോലെ തന്നെ വിജയ് സേതുപതിയും ചിത്രത്തിൽ ഒരു പ്രധാന വേഷത്തിലെത്തുന്നുണ്ട്.

മുത്തുവേൽ പാണ്ഡ്യനായി ഗംഭീര പ്രകടനം നടത്തിയ രജിനിയുടെ കരിയറിലെ ഏറ്റവും സ്റ്റൈലിഷ് കഥാപാത്രങ്ങളിൽ ഒന്ന് കൂടിയായിരുന്നു സിനിമയിലേത്. ചിത്രത്തിന്റെ രണ്ടാം ഭാഗം ചിത്രീകരണം പുരോഗമിച്ചുകൊണ്ടിരിക്കുകയാണ്. തമിഴ് സിനിമയില്‍ ഏറ്റവും വലിയ ഓപണിം​ഗ് വരാന്‍ സാധ്യതയുള്ള അപ്കമിം​ഗ് പ്രോജക്റ്റുമാണ് ജയിലര്‍ 2. അനിരുദ്ധ് രവിചന്ദര്‍ തന്നെയാണ് രണ്ടാം ഭാഗത്തിന്‍റെയും സംഗീത സംവിധാനം നിര്‍വ്വഹിക്കുന്നത്. ആദ്യ ഭാഗം പോലെതന്നെ ആക്ഷന്‍ രംഗങ്ങളാല്‍ സമ്പന്നമായിരിക്കും രണ്ടാം ഭാഗവും. അതേസമയം, രണ്ടാം ഭാഗം വരുമ്പോൾ മലയാളികള്‍ക്ക് അറിയാന്‍ ഏറ്റവും ആഗ്രഹമുള്ളത് ചിത്രത്തില്‍ മോഹന്‍ലാലിന്‍റെ മാത്യു എന്ന ഡോണ്‍ കഥാപാത്രം ഉണ്ടാവുമോ എന്നാണ്. ഇക്കാര്യത്തില്‍ ഔദ്യോഗിക വിശദീകരണങ്ങള്‍ ഒന്നും തന്നെ വന്നിട്ടില്ല. ആഗോള ബോക്സ് ഓഫീസ് കളക്ഷനായി 600 കോടിയിലധികമാണ് ആദ്യ ഭാഗം നേടിയത്.