Actress Attack Case : അക്രമിക്കപ്പെട്ട നടിക്ക് പിന്തുണയുമായി മോഹൻലാലും; അതിജീവിതയോട് ബഹുമാനമെന്ന് താരം

മമ്മൂട്ടിയും ദുൽഖറും നടിക്ക് പിന്തുണയുമായി രം​ഗത്തെത്തിയിട്ടുണ്ട്. നിന്നോടൊപ്പം എന്നാണ് പോസ്റ്റ് പങ്കുവച്ച് മമ്മൂട്ടി കുറിച്ചത്.   

അക്രമിക്കപ്പെട്ട നടിക്ക് പിന്തുണയുമായി കൂടുതൽ സിനിമാ താരങ്ങൾ രം​ഗത്ത്. മോഹൻലാലും(Mohanlal) നടിക്ക് പിന്തുണ അറിയിച്ച് രം​ഗത്തെത്തി. ബഹുമാനം എന്ന കുറിപ്പോടെ ഇൻസ്റ്റാ​ഗ്രാം സ്റ്റോറിയിലാണ് പിന്തുണയുമായി മോഹൻലാൽ എത്തിയത്. ഇരയാക്കപ്പെടലില്‍ നിന്നും അതിജീവനത്തിലേക്കുള്ള തന്‍റെ യാത്രയെക്കുറിച്ച് നടി പങ്കുവച്ച പോസ്റ്റും ഇതിനൊപ്പം താരം ചേർത്തിട്ടുണ്ട്. 

മമ്മൂട്ടിയും ദുൽഖറും നടിക്ക് പിന്തുണയുമായി രം​ഗത്തെത്തിയിട്ടുണ്ട്. നിന്നോടൊപ്പം എന്നാണ് പോസ്റ്റ് പങ്കുവച്ച് മമ്മൂട്ടി കുറിച്ചത്. ഇരയാക്ക‌പ്പെടലിൽ നിന്നും അതിജീവനത്തിലേക്കുള്ള യാത്ര എളുപ്പമായിരുന്നിലെന്ന് കുറിച്ചു കൊണ്ട് ഇന്ന് രാവിലെയാണ് നടി രംഗത്തെത്തിയത്. 

"അഞ്ച് വർഷമായി എന്റെ പേരും വ്യക്തിത്വവും എനിക്ക് സംഭവിച്ച അക്രമത്തിനടിയിൽ അടിച്ചമർത്തപ്പെട്ടിരിക്കുകയാണ്. കുറ്റം ചെയ്തത് ഞാൻ അല്ലെങ്കിലും എന്നെ അവഹേളിക്കാനും കുറ്റപ്പെടുത്താനും ഒറ്റപ്പെടുത്താനും ഒരു പാട് ശ്രമങ്ങൾ ഉണ്ടായിട്ടുണ്ട്. എന്നാൽ അപ്പോഴൊക്കെയും ചിലരൊക്കെ നിശബ്ദത ഭേ​ദിച്ച് മുന്നോട്ട് വന്നു. എനിക്ക് വേണ്ടി സംസാരിക്കാൻ എന്റെ ശബ്ദം നിലയ്ക്കാതിരിക്കാൻ.ഇന്ന് എനിക്ക് വേണ്ടി നിലകൊള്ളുന്ന ഇത്രയും ശബ്ദങ്ങൾ കേൾക്കുമ്പോൾ തനിച്ചല്ലെന്ന് ഞാൻ തിരിച്ചറിയുന്നു. നീതി പുലരാനും തെറ്റ് ചെയ്തവർ ശിക്ഷിക്കപ്പെടാനും ഇങ്ങനെ ഒരു അനുഭവം മറ്റൊരാൾക്കും ഉണ്ടാകാതിരിക്കാനും ഞാൻ ഈ യാത്ര തുടർന്നുകൊണ്ടേ ഇരിക്കും.കൂടെ നിൽക്കുന്ന എല്ലാവരുടേയും സ്നേഹത്തിന് ഹൃദയംനിറഞ്ഞ നന്ദി" എന്നായിരുന്നു നടി കുറിച്ചത്.