എമ്പുരാനിൽ മോഹൻലാലിന്റെ പ്രതിഫലം എത്ര?, സംവിധായകൻ പൃഥ്വിരാജിന്റെ മറുപടി

പൃഥ്വിരാജിന്റെ മറുപടിയാണ് മറുഭാഷയിലെ സിനിമാ താരങ്ങളെയും ഞെട്ടിച്ചിരിക്കുന്നത്.

വൻ ഹൈപ്പിലാണ് മോഹൻലാലിന്റെ എമ്പുരാൻ. എമ്പുരാന്റെ ബജറ്റിനെ കുറിച്ച് നേരത്തെ ചര്‍ച്ചകള്‍ നടന്നിരുന്നു. എമ്പുരാനില്‍ നായകൻ മോഹൻലാലിന്റെ പ്രതിഫലം എത്രയാണ് എന്നതും ആരാധകര്‍ക്ക് കൗതുകമുള്ള കാര്യമായിരിക്കും. എന്നാല്‍ മോഹൻലാലിന്റെ പ്രതിഫലത്തെ കുറിച്ച് സംവിധായകൻ പൃഥ്വിരാജ് വെളിപ്പെടുത്തിയാണ് നിലവില്‍ ശ്രദ്ധയാകര്‍ഷിക്കുന്നത്.

ഒരു രൂപ പോലും എമ്പുരാനായി മോഹൻലാല്‍ പ്രതിഫലം വാങ്ങിച്ചിട്ടില്ല അതിനാലാണ് സിനിമ സാധ്യമായത് എന്നും പൃഥ്വിരാജ് ഒരു അഭിമുഖത്തില്‍ വ്യക്തമാക്കി. നായകന്റെ പ്രതിഫലം 80 കോടി സിനിമ 20 കോടിക്കും എടുത്ത ഒരു 100 കോടി പടമല്ല എമ്പുരാൻ എന്നാണ് പൃഥ്വിരാജ് വ്യക്തമാക്കിയത്. എന്നാല്‍ ബജറ്റ് എത്രയെന്ന് വെളിപ്പെടുത്താൻ സംവിധായകൻ തയ്യാറായില്ല. നിര്‍മാതാവ് ആന്റണി പെരുമ്പാവാരും ബജറ്റിനെ കുറിച്ച് വെളിപ്പെടുത്തിയിരുന്നില്ല.

2025 ജനുവരി 26 നു ആദ്യ ടീസർ പുറത്ത് വിട്ടു കൊണ്ട് പ്രമോഷൻ ജോലികൾ ആരംഭിച്ച ചിത്രത്തിന്റെ, കഥാപാത്രങ്ങളെ പരിചയപ്പെടുത്തുന്ന രീതിയും ഏറെ ശ്രദ്ധ നേടി. ഓരോ അഭിനേതാക്കളും തങ്ങളുടെ കഥാപാത്രങ്ങളെ കുറിച്ച് സംസാരിക്കുന്ന വീഡിയോകൾ പുറത്തു വിടുന്നത് ഫെബ്രുവരി ഒൻപത് മുതൽ ആരംഭിച്ച്, അതവസാനിച്ചത് ഫെബ്രുവരി 26 ന് വന്ന മോഹൻലാലിൻറെ കാരക്ടർ പോസ്റ്റർ, വീഡിയോ എന്നിവയിലൂടെയാണ്. മോഹൻലാൽ അവതരിപ്പിക്കുന്ന സ്റ്റീഫൻ നെടുമ്പള്ളി/ഖുറേഷി അബ്രാം, പൃഥ്വിരാജ് അവതരിപ്പിക്കുന്ന സയ്ദ് മസൂദ് എന്നിവരുടെ കാരക്ടർ പോസ്റ്ററുകളും വീഡിയോകളുമാണ് ഫെബ്രുവരി 26 നെത്തിയത്. ഓരോ ദിവസവും രണ്ട് കഥാപാത്രങ്ങളെന്ന കണക്കിൽ, 18 ദിവസം കൊണ്ട് ചിത്രത്തിലെ 36 കഥാപാത്രങ്ങളെയാണ് പ്രേക്ഷകർക്ക് പരിചയപ്പെടുത്തിയത്.

തെന്നിന്ത്യൻ സിനിമാ പ്രേമികളും ആരാധകരും ഏറെ ആവേശത്തോടെ കാത്തിരിക്കുന്ന, ലൈക്ക പ്രൊഡക്ഷൻസ്, ആശീർവാദ് സിനിമാസ്, ശ്രീ ഗോകുലം മൂവീസ് നിർമ്മിച്ച  മോഹൻലാൽ ചിത്രം എമ്പുരാൻ മാർച്ച് 27നാണ് ആഗോള റിലീസായെത്തുന്നത്. മലയാളം, തമിഴ്, തെലുങ്ക്, ഹിന്ദി, കന്നഡ ഭാഷകളിൽ പാൻ ഇന്ത്യൻ റിലീസായി എത്തുന്ന ചിത്രം സംവിധാനം ചെയ്തിരിക്കുന്നത് പൃഥ്വിരാജ് സുകുമാരനും, രചിച്ചിരിക്കുന്നത് മുരളി ഗോപിയുമാണ്. 2019 ൽ റിലീസ് ചെയ്‍ത ബ്ലോക്ക്ബസ്റ്റർ ചിത്രം ലൂസിഫറിന്റെ രണ്ടാം ഭാഗമായി എത്തുന്ന എമ്പുരാൻ നിർമ്മിച്ചിരിക്കുന്നത്, ലൈക്ക പ്രൊഡക്ഷൻസ്, ആശീർവാദ് സിനിമാസ്, ശ്രീ ഗോകുലം മൂവീസ് എന്നിവയുടെ ബാനറിൽ സുഭാസ്കരൻ, ആന്റണി പെരുമ്പാവൂർ, ഗോകുലം ഗോപാലൻ എന്നിവർ  ചേർന്നാണ്. മൂന്നു ഭാഗങ്ങളായി കഥ പറയുന്ന ഒരു സിനിമാ സീരിസിന്റെ രണ്ടാം ഭാഗമാണ് എമ്പുരാൻ.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക