ചിത്രത്തിലെ 27-ാമന്‍ ആരെന്നുളള ചര്‍ച്ചകള്‍ സോഷ്യല്‍ മീഡിയയില്‍ പൊടിപൊടിക്കുന്നതിനിടെയാണ് പൃഥ്വിരാജ് സര്‍പ്രൈസ് പുറത്ത് വിട്ടത്.
കൊച്ചി: ആരാധകര്‍ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് പൃഥ്വിരാജ് സുകുമാരന്‍റെ സംവിധാനത്തിലൊരുങ്ങുന്ന ലൂസിഫര്‍. മോഹന്‍ലാല്‍ നായകാനായെത്തുന്ന ചിത്രത്തിന്റെ 27-ാമത്തെ ക്യാരക്ടര്‍ പോസ്റ്ററാണ് ഇപ്പോള്‍ പുറത്തുവിട്ടിരിക്കുന്നത്. ലൂസിഫറില്‍ പൃഥ്വിരാജ് അഭിനയിക്കുന്നു എന്നുളളതാണ് ഏറ്റവും പുതിയ വിവരം. ഇന്ന് പുറത്തിറങ്ങിയ ചിത്രത്തിന്റെ അവസാന ക്യാരക്ടര്‍ പോസ്റ്ററിലാണ് ആരാധകര്‍ക്കായി പൃഥ്വിരാജ് സൂക്ഷിച്ച സര്‍പ്രൈസ് പുറത്താകുന്നത്. പൃഥ്വി തന്നെയാണ് ഫേസ്ബുക്കിലൂടെ ഈ വിവരം പുറത്തുവിട്ടത്. സയെദ് മസൂദ് എന്ന കഥാപാത്രത്തെയാണ് ലൂസിഫറില്‍ പൃഥ്വിരാജ് അവതരിപ്പിക്കുക.
മാര്‍ച്ച് 28ന് റിലീസ് ചെയ്യുന്ന ലൂസിഫറിന്‍റെ പ്രമോഷന്‍ പരിപാടികളുടെ ഭാഗമായി 26 ദിവസങ്ങളിലായി 26 കഥാപാത്രങ്ങളുടെ ക്യാരക്ടര്‍ പോസ്റ്ററുകള്‍ പുറത്തിറക്കിയത് വലിയ ശ്രദ്ധ നേടിയിരുന്നു. ഇപ്പോഴിതാ ആരും പ്രതീക്ഷിക്കാത്ത വമ്പന്‍ ട്വിസ്റ്റുമായി എത്തിയിരിക്കുകയാണ് ചിത്രത്തിന്റെ അണിയറ പ്രവര്‍ത്തകര്‍. ചിത്രത്തിലെ 27-ാമന്‍ ആരെന്നുളള ചര്‍ച്ചകള്‍ സോഷ്യല്‍ മീഡിയയില്‍ പൊടിപൊടിക്കുന്നതിനിടെയാണ് പൃഥ്വിരാജ് സര്‍പ്രൈസ് പുറത്ത് വിട്ടത്.
പൃഥ്വിരാജ് സംവിധായകനായി അരങ്ങേറ്റം കുറിക്കുന്ന ചിത്രത്തില്‍ സ്റ്റീഫന്‍ നെടുമ്പള്ളി എന്ന രാഷ്ട്രീയ പ്രവര്‍ത്തകനായാണ് മോഹന്‍ലാല്‍ എത്തുന്നത്. മുരളി ഗോപി തിരക്കഥയൊരുക്കുന്ന ചിത്രത്തില്‍ പ്രതിനായകനാവുന്നത് വിവേക് ഒബ്റോയ് ആണ്. പൊളിറ്റിക്കല്‍ ത്രില്ലര്‍ ഗണത്തില്‍പ്പെടുത്താവുന്ന ലൂസിഫറില്‍ മോഹന്‍ലാല്‍ കഥാപാത്രത്തിന്റെ സഹായിയായി കലാഭവന്‍ ഷാജോണ്‍ എത്തുന്നു.ഇന്ദ്രജിത്ത്, ടൊവീനോ തോമസ്, സംവിധായകന്‍ ഫാസില്‍, മംമ്ത മോഹന്‍ദാസ്, ജോണ്‍ വിജയ് എന്നിങ്ങനെ വന്‍ താരനിര ചിത്രത്തില്‍ അണിനിരക്കുന്നു.
ആദ്യമായാണ് പൃഥ്വിരാജും മോഹന്‍ലാലും ഒരുമിച്ച് അഭിനയിക്കുന്നത്. തിയേറ്റര്‍ കീഴടക്കാന്‍ മോഹന്‍ലാലിനൊപ്പം പൃഥിയും എത്തുന്നെന്ന വാര്‍ത്ത ആഘോഷമാക്കുകയാണ് ആരാധകര്‍.