സന്താനം നായകനായ "അതിസയ പിറവി" ഫസ്റ്റ് ലുക്ക് പുറത്ത്; നിർമ്മാണം വീനസ് ഇൻഫോടെയ്ൻമെന്റ്, കെ7 സ്റ്റുഡിയോസ്

സന്താനം നായകനാകുന്ന പുതിയ ചിത്രം.

തമിഴ് താരം സന്താനത്തെ നായകനാക്കി നവാഗതനായ സുദാമൻ കൃഷ്‍ണ സംവിധാനം ചെയ്യുന്ന പുതിയ ചിത്രം ‘അതിസയ പിറവി’ ഫസ്റ്റ് ലുക്ക് പുറത്ത്. വീനസ് ഇൻഫോടെയ്ൻമെന്റിന്റെയും കെ7 സ്റ്റുഡിയോസിന്റെയും ബാനറുകളിൽ കെ.ജെ. ഗണേഷും വിജയ് കെ. ചെല്ലിയയും ചേർന്നാണ് ചിത്രം നിർമ്മിക്കുന്നത്. ജി.വി. പ്രകാശ് കുമാർ സംഗീതം ഒരുക്കുന്ന ചിത്രത്തിന്റെ ഫസ്റ്റ് ലുക്ക്, സയൻസ് ഫിക്ഷൻ, കോമഡി, മിസ്റ്ററി എന്നിവ സമന്വയിപ്പിക്കുന്ന വ്യത്യസ്തമായൊരു സിനിമാനുഭവത്തിലേക്കാണ് സൂചന നൽകുന്നത്. ഗോപിക രമേഷ് ആണ് ചിത്രത്തിലെ നായിക.

നീല നിറത്തിലുള്ള നിഗൂഢമായ ചുഴിക്കുള്ളിൽ അകപ്പെട്ട സന്താനത്തിന്റെ കഥാപാത്രത്തെയാണ് ഫസ്റ്റ് ലുക്ക് പോസ്റ്ററിൽ അവതരിപ്പിച്ചിരിക്കുന്നത്. ആംബുലൻസുമായി ബന്ധപ്പെട്ട ദൃശ്യങ്ങളും അസാധാരണമായ പശ്ചാത്തലവും ചിത്രത്തിന്റെ കഥാപരിസരത്തെക്കുറിച്ച് ആകാംക്ഷ ഉയർത്തുന്നു. ഓരോ നിമിഷവും കാര്യങ്ങൾ മാറിമറിയുന്ന അസാധാരണമായൊരു യാത്രയായിരിക്കും ചിത്രമെന്ന സൂചനയും അണിയറപ്രവർത്തകർ പങ്കുവെച്ചിട്ടുണ്ട്. എന്നാൽ കഥയുടെ വിശദാംശങ്ങളോ സയൻസ് ഫിക്ഷൻ ഘടകങ്ങൾ എങ്ങനെയാണ് സിനിമയിൽ അവതരിപ്പിക്കുന്നതെന്നോ ഇതുവരെ വെളിപ്പെടുത്തിയിട്ടില്ല.

ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക

സന്താനത്തിന്റെ ഇരുപതാമത്തെ ചിത്രമായാണ് ‘അതിസയ പിറവി’ ഒരുങ്ങുന്നത്. കോമഡി കഥാപാത്രങ്ങളിലൂടെ ശ്രദ്ധ നേടിയ സന്താനം പിന്നീട് നായകനായും നിരവധി ചിത്രങ്ങളിൽ അഭിനയിച്ചിട്ടുണ്ട്. ഈ ചിത്രത്തിലൂടെ കോമഡിക്കൊപ്പം സയൻസ് ഫിക്ഷനും നിഗൂഢതയും ചേർന്ന കഥാപരിസരത്തിലേക്കാണ് താരം എത്തുന്നത്. വെറ്റ്രി, സ്മൃതി വെങ്കട്ട്, ജെൻസൺ ദിവാകർ, റെഡിൻ കിംഗ്സ്ലി, ജോർജ് മരിയൻ , പ്രദീപ് ആന്റണി, ഫൂസി, ടി.എസ്.ആർ. എന്നിവരും പ്രധാന വേഷങ്ങളിലുണ്ട്.

ടൈറ്റിലും ഫസ്റ്റ് ലുക്ക് പോസ്റ്ററും പുറത്തുവന്നതോടെ ചിത്രത്തിന്റെ റിലീസ് തീയതിയും കൂടുതൽ വിവരങ്ങളും അറിയാനുള്ള കാത്തിരിപ്പിലാണ് പ്രേക്ഷകർ. റിലീസ് തീയതി സംബന്ധിച്ച ഔദ്യോഗിക പ്രഖ്യാപനം ഇതുവരെ ഉണ്ടായിട്ടില്ല. രചന, സംവിധാനം: സുദാമൻ കൃഷ്‍ണ, നിർമ്മാണം: കെ.ജെ. ഗണേഷ് (വീനസ് ഇൻഫോടെയ്ൻമെന്റ്), വിജയ് കെ. ചെല്ലിയ (കെ7 സ്റ്റുഡിയോസ്), സംഗീതം: ജി.വി. പ്രകാശ് കുമാർ, ഛായാഗ്രഹണം: റിച്ചാർഡ് എം. നാഥൻ, എഡിറ്റിംഗ്: പ്രവീൺ കെ.എൽ., ആർട്ട് ഡയറക്ഷൻ: ജാക്കി, സംഘട്ടനം: ദിലീപ് സുബ്ബരായൻ, കോസ്റ്റ്യൂം ഡിസൈനർ : പ്രിയ രവി, പിആർഒ: ശബരി.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക