മേലെ പറന്ന ​​'ഗരുഡൻ' താഴെ ഇറങ്ങിയോ ? സുരേഷ് ​ഗോപി ചിത്രം ഇതുവരെ നേടിയത് എത്ര?

എസ്ജി 251 എന്ന് താല്‍കാലികമായി പേര് നല്‍കിയിരിക്കുന്ന സിനിമയുടെ ഷൂട്ടിംഗ് ഉടന്‍ നടക്കും.

സുരേഷ് ​ഗോപി നായകനായി എത്തിയ ഏറ്റവും പുതിയ ചിത്രമാണ് ​'ഗരുഡൻ'. പാപ്പൻ എന്ന സൂപ്പർ ഹിറ്റ് ചിത്രത്തിന് ശേഷം സുരേഷ് ​ഗോപി വീണ്ടും പൊലീസ് കുപ്പായമണിഞ്ഞ ചിത്രത്തിൽ ബിജു മേനോൻ കൂ‌‌ടി എത്തിയതോടെ പ്രേക്ഷകർ ഒന്ന‌ങ്കം ​ഗരുഡനെ അങ്ങേറ്റെടുത്തു. മിഥുൻ മാനുവൽ തോമസിന്റെ രചനയിൽ അരുൺ വർമ സംവിധാനം ചെയ്ത ചിത്രം ആദ്യദിനം മുതൽ ബോക്സ് ഓഫീസിലും മിന്നും പ്രകടനം കാഴ്ചവച്ചിരുന്നു. 

ഇപ്പോഴിതാ രണ്ടാം വാരത്തിലേക്ക് കടക്കുമ്പോൾ സുരേഷ് ​ഗോപി ചിത്രം ഇതുവരെ നേടിയ കളക്ഷൻ വിവരങ്ങളാണ് പുറത്തുവരുന്നത്. ലോകമെമ്പാ‌ടുമായി ആദ്യവാരം സുരേഷ് ​ഗോപി ചിത്രം നേ‌ടിയത് 15.30 കോടിക്കടുത്താണ്. കഴിഞ്ഞ ദിവസം വരെയുള്ള കണക്കാണിത്. രണ്ടാം വെള്ളിയായ ഇന്നലെ ചിത്രം 70 ലക്ഷത്തിന് മേൽ നേടി എന്നാണ് പ്രമുഖ ട്രേഡ് അനലിസ്റ്റുകൾ പറയുന്നത്. 

ഈ ശനിയും ‍ഞായറും കൂ‌ടി കഴിയുമ്പോൾ ​ഗരുഡൻ 20 കോടി അടുപ്പിച്ചോ അതിൽ കവി‍ഞ്ഞോ കളക്ഷൻ നേടാൻ സാധ്യതയുണ്ടെന്നാണ് വിലയിരുത്തലുകൾ. കൂടാതെ തമിഴ് ഉൾപ്പടെയുള്ള പുതിയ സിനിമകൾ കഴിഞ്ഞ ദിവസം റിലീസ് ചെയ്തിട്ടുണ്ട്. ഇതൊരുപക്ഷേ സുരേഷ് ​ഗോപി ചിത്രത്തിന്റെ കളക്ഷനെ ബാധിച്ചേക്കാമെന്നും വിലയിരുത്തലുണ്ട്. 

നവംബർ 3ന് ആണ് ​ഗരുഡൻ റിലീസ് ചെയ്തത്. 12 വർഷത്തിന് ശേഷം ബിജു മേനോനും സുരേഷ് ​ഗോപിയും ഒന്നിച്ച ചിത്രത്തിന് മികച്ച മൗത്ത് പബ്ലിസിറ്റിയും ലഭിച്ചിരുന്നു. തലൈവാസൽ വിജയ്, സിദ്ദിഖ്, അഭിരാമി, നിഷാന്ത് സാ​ഗർ തുടങ്ങിയവരും ചിത്രത്തിൽ പ്രധാന വേഷത്തിൽ എത്തിയിരുന്നു. അഭിരാമി ആയിരുന്നു ചിത്രത്തിലെ നായിക. അതേസമയം, എസ്ജി 251 എന്ന് താല്‍കാലികമായി പേര് നല്‍കിയിരിക്കുന്ന സിനിമയുടെ ഷൂട്ടിംഗ് ഉടന്‍ നടക്കും. രാഹുല്‍ രാമചന്ദ്രനാണ് ചിത്രം സംവിധാനം ചെയ്യുന്നത്. 

ഏഷ്യാനെറ്റ് ന്യൂസ് ലൈവ് വാർത്തകൾ കാണാം..