'എന്തൊരു തുക, എന്‍ടിആറിന്‍റെ സ്റ്റാര്‍ പവര്‍' : റെക്കോഡ് രൂപയ്ക്ക് 'വാര്‍ 2' തെലുങ്ക് അവകാശം വിറ്റുപോയി

ഹൃത്വിക് റോഷനും ജൂനിയർ എൻടിആറും ഒന്നിക്കുന്ന 'വാർ 2' എന്ന ചിത്രത്തിന്റെ തെലുങ്ക് തിയേറ്റർ റൈറ്റ്സ് 80 കോടി രൂപയ്ക്ക് വിറ്റുപോയി. 

മുംബൈ: ബോളിവുഡ് സൂപ്പർതാരം ഹൃത്വിക് റോഷനും തെലുങ്ക് സിനിമയുടെ സൂപ്പര്‍താരം ജൂനിയർ എൻടിആറും ഒന്നിക്കുന്ന 'വാർ 2' എന്ന ആക്ഷൻ ത്രില്ലർ ചിത്രം റിലീസിന് മുമ്പേ തന്നെ വൻ ബിസിനസ് നേടി ശ്രദ്ധേയമാകുകയാണ്. 2025 ഓഗസ്റ്റ് 14-ന് ഹിന്ദി, തമിഴ്, തെലുങ്ക് ഭാഷകളിൽ തിയേറ്ററുകളിൽ എത്താനിരിക്കുന്ന ഈ ചിത്രത്തിന്റെ തെലുങ്ക് തിയേറ്റർ റൈറ്റ്സ് വന്‍ തുകയ്ക്കാണ് വിറ്റുപോയിരിക്കുന്നത്.

നാഗ വംശിയുടെ നേതൃത്വത്തിലുള്ള സിതാര എന്റർടെയ്ൻമെന്റ്സാണ് 80 കോടി രൂപയ്ക്കാണ് തെലുങ്ക് സംസ്ഥാനങ്ങളിലെ വിതരണാവകാശം സ്വന്തമാക്കിയത്. യഷ് രാജ് ഫിലിംസ് (വൈആർഎഫ്) ആദ്യം തെലുങ്ക് വിപണിയിൽ സ്വന്തമായി റിലീസ് ചെയ്യാൻ പദ്ധതിയിട്ടിരുന്നെങ്കിലും, ജൂനിയർ എൻടിആറിന്റെ തെലുങ്ക് സംസ്ഥാനങ്ങളിലെ വൻ ആരാധക പിന്തുണ കണക്കിലെടുത്ത് പ്രാദേശിക വിതരണക്കാരുമായി സഹകരിക്കാൻ തീരുമാനിക്കുകയായിരുന്നു.

തെലുങ്ക് റൈറ്റ്സിനായി ആദ്യം 100 കോടി രൂപയാണ് ആവശ്യപ്പെട്ടിരുന്നതെങ്കിലും, തീവ്രമായ ചർച്ചകൾക്കൊടുവിൽ 80 കോടി രൂപയ്ക്ക് ഡീൽ ഉറപ്പിക്കുകയായിരുന്നു എന്നാണ് വിവരം. 'വാർ 2' യഷ് രാജ് ഫിലിംസിന്റെ സ്‌പൈ യൂണിവേഴ്‌സിന്റെ ഭാഗമായുള്ള ചിത്രമാണ്.

2019-ൽ പുറത്തിറങ്ങിയ 'വാർ' എന്ന ബ്ലോക്ബസ്റ്റർ ചിത്രത്തിന്റെ തുടർഭാഗമായ ഈ സിനിമയിൽ ഹൃത്വിക് റോഷൻ കബീർ എന്ന കഥാപാത്രത്തെ വീണ്ടും അവതരിപ്പിക്കുന്നു. ജൂനിയർ എൻടിആർ വിക്രം എന്ന പ്രധാന കഥാപാത്രത്തെ അവതരിപ്പിക്കും. കിയാര അദ്വാനി നായിക വേഷത്തില്‍ എത്തുന്നുണ്ട് ചിത്രത്തില്‍.

ജൂനിയർ എൻടിആറിന്റെ 42-ാം ജന്മദിനമായ മെയ് 20-ന് പുറത്തിറങ്ങിയ ചിത്രത്തിന്റെ ടീസറും പിന്നീട് വന്ന ക്യാരക്ടര്‍ പോസ്റ്ററുകളും സോഷ്യൽ മീഡിയയിൽ വൈറലായിരുന്നു. ബ്രഹ്മാസ്ത്ര, യേ ജവാനി ഹേ ദിവാനി തുടങ്ങിയ ചിത്രങ്ങളിലൂടെ ശ്രദ്ധേയനായ അയാൻ മുഖർജിയാണ് ചിത്രം സംവിധാനം ചെയ്യുന്നത്.

സിതാര എന്റർടെയ്ൻമെന്റ്സിന്റെ ഈ നീക്കം ജൂനിയർ എൻടിആറിന്റെ താരമൂല്യത്തിന്റെ തെളിവാണ് എന്നാണ് തെലുങ്ക് മാധ്യമങ്ങള്‍ റിപ്പോര്‍ട്ട് ചെയ്യുന്നത്. നേരത്തെ എൻടിആറിന്റെ മറ്റൊരു ചിത്രമായ 'ദേവര'യുടെ തെലുങ്ക് വിതരണാവകാശം 120 കോടി രൂപയ്ക്ക് സ്വന്തമാക്കിയിരുന്നു. 'വാർ 2'ന്റെ ഈ റെക്കോർഡ് ഡീൽ തെലുഗു വിപണിയിൽ ഒരു ഡബ്ബ് ചെയ്ത ചിത്രത്തിന് ലഭിക്കുന്ന ഏറ്റവും വലിയ തുകയാണ്, 2022-ൽ 'കെജിഎഫ് 2' സ്ഥാപിച്ച 80 കോടി രൂപയുടെ റെക്കോർഡിന് സമാനമായി.

ഓഗസ്റ്റ് 14-ന് 'വാർ 2' റിലീസിനെത്തുമ്പോൾ, രജനികാന്തിന്റെ 'കൂലി' എന്ന ചിത്രവുമായി ബോക്സ് ഓഫീസിൽ വൻ മത്സരം പ്രതീക്ഷിക്കുന്നു. എൻടിആറിന്റെ ആരാധക പിന്തുണയും ഹൃത്വികിന്റെ ജനപ്രീതിയും ചേർന്ന് 'വാർ 2' തെലുഗു സംസ്ഥാനങ്ങളിൽ വമ്പൻ ഓപ്പണിംഗ് നേടുമെന്നാണ് ട്രാക്കര്‍മാര്‍ പ്രവചിക്കുന്നത്.