1500ലധികം കലാകാരന്മാര്‍, സുരേഷ് ​ഗോപിയുടെ ഒരൊന്നൊന്നര ഫൈറ്റ്; ഒറ്റക്കൊമ്പൻ അണിയറയിൽ

2024 ഡിസംബറിൽ ആയിരുന്നു ഒറ്റക്കൊമ്പന്റെ ഷൂട്ടിം​ഗ് ആരംഭിച്ചത്. തിരുവനന്തപുരത്തെ പൂജപ്പുര സെൻട്രൽ ജയിലിൽ വച്ചായിരുന്നു ആദ്യ ഷെഡ്യൂൾ. കോട്ടയം, പാല എന്നിവിടങ്ങളിലാണ് ചിത്രത്തിന്റെ പ്രധാന ഷെഡ്യൂളുകൾ നടക്കുക.

സുരേഷ് ​ഗോപിയുടെ ഒരു സിനിമ വരുന്നു. ഈ തലക്കെട്ട് കണ്ടാൽ തന്നെ സിനിമാ പ്രേക്ഷകർക്കൊരു ആവേശമാണ്. മാസ് ഡയലോ​ഗും സ്ക്രീൻ പ്രെസൻസുമെല്ലാം കൊണ്ട് സുരേഷ് ​ഗോപി അങ്ങനെ ബി​ഗ് സ്ക്രീനിൽ നിറഞ്ഞു നിൽക്കും. അതു കാണാൻ തന്നെ സിനിമാ പ്രേമികൾക്ക് നല്ലൊരു ചേലാണ്. അത്തരത്തിലൊരു സിനിമയ്ക്കായി കഴിഞ്ഞ കുറച്ചു നാളായി പ്രേക്ഷകർ ഒന്നടങ്കം കാത്തിരിക്കുകയാണ്. മറ്റൊന്നുമല്ല ഒറ്റക്കൊമ്പൻ ആണ് ആ ചിത്രം. കടുവാക്കുന്നേല്‍ കുറുവച്ചന്‍ എന്ന റിയൽ ലൈഫ് കഥാപാത്രമായി സുരേഷ് ​ഗോപി എത്തുന്ന ചിത്രത്തിന്റെ ഷൂട്ടിം​ഗ് പുരോ​ഗമിക്കുകയാണ്.

ഈ അവസരത്തിൽ ഒറ്റക്കൊമ്പന്റെ ഷൂട്ടിങ്ങുമായി ബന്ധപ്പെട്ട വിവരം പങ്കുവച്ചിരിക്കുകയാണ് സുരേഷ് ​ഗോപി. പാലയിലാണ് നിലവിൽ ഷൂട്ടിം​ഗ് പുരോ​ഗമിക്കുന്നത്. ഇവിടെ വച്ചൊരു മാസ് ഫൈറ്റുണ്ടാകുമെന്നാണ് താരത്തിന്റെ പോസ്റ്റിൽ നിന്നും വ്യക്തമാകുന്നത്. കഴിഞ്ഞ ദിവസം രാത്രി 10 മണി മുതൽ പിറ്റേദിവസം അഞ്ച് മണി വരെ, 1500ലധികം കലാകാരന്മാരുമായിട്ടായിരുന്നു ഷൂട്ടിം​ഗ് പുരോ​ഗമിച്ചതെന്ന് സുരേഷ് ​ഗോപി പറയുന്നുണ്ട്. ഇതിഹാസ കഥയെന്നാണ് ഒറ്റക്കൊമ്പനെ സുരേഷ് ​ഗോപി വിശേഷിപ്പിച്ചത്.

ഏറെ നാളത്തെ അഭ്യൂഹങ്ങൾക്കെല്ലാം ഒടുവിൽ 2024 ഡിസംബറിൽ ആയിരുന്നു ഒറ്റക്കൊമ്പന്റെ ഷൂട്ടിം​ഗ് ആരംഭിച്ചത്. തിരുവനന്തപുരത്തെ പൂജപ്പുര സെൻട്രൽ ജയിലിൽ വച്ചായിരുന്നു ആദ്യ ഷെഡ്യൂൾ. കോട്ടയം, പാല എന്നിവിടങ്ങളിലാണ് ചിത്രത്തിന്റെ പ്രധാന ഷെഡ്യൂളുകൾ നടക്കുക. നവാഗതനായ മാത്യൂസ് തോമസ് സംവിധാനം ചെയ്യുന്ന ചിത്രം ഒരു ഫാമിലി ആക്ഷൻ ഡ്രാമ​ഗണത്തിൽപ്പെടുന്ന ഒന്നാണ്. ശ്രീ ​ഗോകുലം മൂവീസിന്റെ ബാനറിൽ ​ഗോകുലം ​ഗോപാലൻ നിർമിക്കുന്ന ചിത്രത്തിൽ ഇന്ദ്രജിത്ത് സുകുമാരൻ, വിജയരാഘവൻ, ലാലു അലക്സ്, ചെമ്പൻ വിനോദ്, ജോണി ആൻ്റണി ബിജു പപ്പൻ, മേഘന രാജ് തുടങ്ങിയവരും പ്രധാന വേഷത്തിൽ എത്തുന്നു.