ചോറിനൊപ്പം കഴിക്കാന്‍ നല്ല ടേസ്റ്റി മാങ്ങാ മോര് കറി തയ്യാറാക്കാം; റെസിപ്പി

ഏഷ്യാനെറ്റ് ന്യൂസ് ഓണ്‍ലൈനില്‍ ഇത്തവണ വ്യത്യസ്ത തരം മാമ്പഴ വിഭവങ്ങള്‍ അഥവാ മാംഗോ ഫെസ്റ്റ് റെസിപ്പികള്‍. ഇന്ന് അന്‍സ മെറിന്‍ തയ്യാറാക്കിയ പാചകക്കുറിപ്പ്.

'രുചിക്കാലം' വ്യത്യസ്തമായ പാചകക്കുറിപ്പുകളുടെ ഈ ആഘോഷത്തിൽ പങ്കാളിയാവാൻ താൽപ്പര്യമുണ്ടോ? ഉണ്ടെങ്കിൽ നിങ്ങൾ തയ്യാറാക്കിയ വ്യത്യസ്തമായ പാചകക്കുറിപ്പുകൾ നല്ലൊരു ഫോട്ടോയും വിശദമായ വിലാസവും അടക്കം ruchikalamrecipes@gmail.com എന്ന വിലാസത്തിൽ അയക്കുക. യൂ ട്യൂബ് വീഡിയോ ഉണ്ടെങ്കിൽ അതിന്റെ ലിങ്ക് കൂടി അയക്കാം. സബ്ജക്റ്റ് ലൈനിൽ Recipes എന്ന് എഴുതണം. മികച്ച പാചകക്കുറിപ്പുകൾ രുചിക്കാലം പ്രസിദ്ധീകരിക്കും.

മാങ്ങ കാളൻ അഥവാ മാങ്ങ മോര് കറി തേങ്ങ ഇല്ലാതെ വളരെ എളുപ്പത്തിൽ തയ്യാറാക്കിയാലോ? 

വേണ്ട ചേരുവകൾ

എണ്ണ - 1 ടേബിള്‍സ്പൂണ്‍  
തൈര് - ഒരു കപ്പ്
വെള്ളം - 1/2 കപ്പ് 
മാങ്ങ -  1 
കടുക് - 1/2 ടീസ്പൂണ്‍ 
ഉലുവ - 1/4  ടീസ്പൂണ്‍
കുഞ്ഞുള്ളി - 4
ഇഞ്ചി - വെളുത്തുളളി പേസ്റ്റ്- 1/2  ടീസ്പൂണ്‍
വറ്റൽ മുളക് - 2 
മുളക് പൊടി - 1/2  ടീസ്പൂണ്‍
മഞ്ഞൾ പൊടി- 1/4  ടീസ്പൂണ്‍
ഉപ്പ് - ആവശ്യത്തിന് 
കറിവേപ്പില - ഒരു തണ്ട് 

തയ്യാറാക്കുന്ന വിധം

ഒരു ഫ്രൈയിങ് പാൻ ചൂടാക്കി എണ്ണ ഒഴിച്ച ശേഷം കടുക് പൊട്ടിക്കണം. അതിന് ശേഷം ഉലുവയിട്ട് കളർ മാറുമ്പോൾ, വറ്റൽ മുളക് ചേര്‍ത്ത് വറുക്കണം. ഇനി ഇതിലേക്ക് അരിഞ്ഞു വച്ചിരിക്കുന്ന ഉള്ളി ചേര്‍ത്ത് വഴറ്റി, ഇഞ്ചി- വെളുത്തുള്ളി പേസ്റ്റ് ചേർക്കണം. അതിന്റെ പച്ച മണം മാറുമ്പോൾ മഞ്ഞൾ പൊടി, മുളക് പൊടി എന്നിവ ചേര്‍ത്ത് ഒരു മിനിറ്റ് ഇളക്കി,  ഇതിലേയ്ക്ക് അരിഞ്ഞ് വെച്ചിരിക്കുന്ന മാങ്ങയും, രണ്ട് ടേബിൾ സ്പൂണ്‍ വെള്ളവും, കറിവേപ്പിലയും, ആവശ്യത്തിന് ഉപ്പും ചേർത്ത് മാങ്ങ വേവുന്നത് വരെ അടച്ച് വെച്ച് കുക്ക് ചെയ്യണം. പാകമാവുമ്പോൾ തീ ഏറ്റവും കുറച്ചു വെച്ച് വെള്ളം ചേർത്തു ഉടച്ചു വെച്ച തൈര് ഒഴിക്കണം. ഇനി ഒരു മിനിറ്റ് ഇളക്കിയതിന് ശേഷം സ്റ്റവ് ഓഫ് ചെയ്യാം.