ചാമ്പ്യൻസ് ലീഗിൽ വൻ ജയങ്ങളോടെ മാഞ്ചസ്റ്റർ യുണൈറ്റഡും ബയേൺ മ്യൂണിക്കും; റെക്കോർഡ് തിളക്കത്തിൽ ജർമ്മൻ കരുത്തർ

മറ്റൊരു മത്സരത്തിൽ ജർമ്മൻ കരുത്തരായ ബയേൺ മ്യൂണിക്ക് എതിരില്ലാത്ത അഞ്ച് ഗോളുകൾക്ക് നോർവീജിയൻ ക്ലബ് ബോഡോ ഗ്ലിംറ്റിനെ ത തകർത്തെറിഞ്ഞു.

ലണ്ടൻ: യുവേഫ ചാമ്പ്യൻസ് ലീഗ് ഫുട്ബോളിന്‍റെ പുതിയ സീസണിന് വമ്പൻ ജയങ്ങളോടെ തുടക്കമിട്ട് മാഞ്ചസ്റ്റർ യുണൈറ്റഡും ബയേൺ മ്യൂണിക്കും. സ്വന്തം തട്ടകമായ ഓൾഡ് ട്രഫോർഡിൽ നടന്ന മത്സരത്തിൽ എതിരില്ലാത്ത നാല് ഗോളുകൾക്ക് അസർബൈജാൻ ക്ലബ്ബായ സബാ എഫ്കെയെ തകർത്ത് മാഞ്ചസ്റ്റർ യുണൈറ്റഡ് തങ്ങളുടെ ചാമ്പ്യൻസ് ലീഗ് തിരിച്ചുവരവ് ഗംഭീരമാക്കി. മത്തേയൂസ് കുൻഹ, ക്യാപ്റ്റൻ ബ്രൂണോ ഫെർണാണ്ടസ്, ബെഞ്ചമിൻ ഷെഷ്കോ, ലിസാൻഡ്രോ മാർട്ടിനെസ് എന്നിവരാണ് യുണൈറ്റഡിനായി വലകുലുക്കിയത്. യൂറോപ്യൻ പോരാട്ടങ്ങളിലെ അടുത്ത ഘട്ടത്തിൽ ശക്തരായ അത്‌ലറ്റിക്കോ മാഡ്രിഡ് ആണ് യുണൈറ്റഡിന്‍റെ അടുത്ത എതിരാളികൾ.

മറ്റൊരു മത്സരത്തിൽ ജർമ്മൻ കരുത്തരായ ബയേൺ മ്യൂണിക്ക് എതിരില്ലാത്ത അഞ്ച് ഗോളുകൾക്ക് നോർവീജിയൻ ക്ലബ് ബോഡോ ഗ്ലിംറ്റിനെ ത തകർത്തെറിഞ്ഞു. അലയൻസ് അരീനയിൽ നടന്ന ഏകപക്ഷീയമായ മത്സരത്തിൽ ജമാൽ മുസിയാല, ഹാരി കെയ്ൻ, അൽഫോൺസോ ഡേവിസ് എന്നിവർക്കൊപ്പം ഇരട്ട ഗോൾ നേടിയ മൈക്കൽ ഒലീസെയും ബയേണിന്റെ ജയം അനായാസമാക്കി.

ഈ മിന്നുന്ന ജയത്തോടെ ഒരു അപൂർവ്വ നേട്ടവും ബയേൺ മ്യൂണിക്ക് സ്വന്തമാക്കി. ചാമ്പ്യൻസ് ലീഗ് (യൂറോപ്യൻ കപ്പ്) ചരിത്രത്തിൽ 900 ഗോളുകൾ തികയ്ക്കുന്ന രണ്ടാമത്തെ മാത്രം ടീമായി ബയേൺ മാറി. സ്പാനിഷ് വമ്പന്മാരായ റയൽ മാഡ്രിഡ് മാത്രമാണ് ഇതിന് മുൻപ് ഈ നാഴികക്കല്ല് പിന്നിട്ടിട്ടുള്ളത്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക