പിതാവിന്‍റെ ഓർമ്മകൾക്ക് മുന്നിൽ ഗോളടിച്ചും ഗോളടിപ്പിച്ചും മെസി, ഇന്‍റർ മയാമിക്ക് സമനില

26-ാം മിനിറ്റിൽ മെസിയിലൂടെ മയാമി വീണ്ടും വലകുലുക്കി. പെനാൽറ്റി ബോക്സിന് വെളിയിൽ നിന്ന് തന്‍റെ പ്രിയപ്പെട്ട ഇടങ്കാലുകൊണ്ട് തൊടുത്ത മനോഹരമായ കർവിങ് ഷോട്ട് പോസ്റ്റിന്‍റെ വിദൂര കോണിലേക്ക് തുളച്ചുകയറി.

മയാമി: പിതാവ് ഹോര്‍ഹെ മെസിയുടെ വിയോഗത്തിനു ശേഷമുള്ള തന്‍റെ ആദ്യ ഗോളുമായി അർജന്‍റീന നായകൻ ലയണൽ മെസി. യുഎസ് മേജർ ലീഗ് സോക്കറിൽ (എംഎൽഎസ്) ഫിലാഡൽഫിയ യൂണിയനെതിരായ മത്സരത്തിൽ ഇന്‍റർ മയാമി 2-2 സമനില വഴങ്ങിയ മത്സരത്തിൽ ഒരു ഗോളും അസിസ്റ്റും സ്വന്തമാക്കിയാണ് മെസി തിളങ്ങിയത്.

സൂബാറു പാർക്കിൽ നടന്ന പോരാട്ടത്തിന്‍റെ 21-ാം മിനിറ്റിൽ ഡാനിയൽ പിന്‍റെറിലൂടെ മയാമിയാണ് ആദ്യം മുന്നിലെത്തിയത്. മെസി നൽകിയ മനോഹരമായ ക്രോസ് ലൂയിസ് സുവാരസ് തലകൊണ്ട് പിന്‍ററിലേക്ക് മറിച്ചുനൽകുകയും താരം അത് ഗോളാക്കി മാറ്റുകയുമായിരുന്നു. തൊട്ടുപിന്നാലെ 26-ാം മിനിറ്റിൽ മെസിയിലൂടെ മയാമി വീണ്ടും വലകുലുക്കി. പെനാൽറ്റി ബോക്സിന് വെളിയിൽ നിന്ന് തന്‍റെ പ്രിയപ്പെട്ട ഇടങ്കാലുകൊണ്ട് തൊടുത്ത മനോഹരമായ കർവിങ് ഷോട്ട് പോസ്റ്റിന്‍റെ ഇടതു മൂലയിലേക്ക് തുളച്ചുകയറി. ഓഗസ്റ്റ് 8-ന് അന്തരിച്ച പിതാവിനുള്ള ആദരവായി ആകാശത്തേക്ക് വിരൽ ചൂണ്ടിക്കൊണ്ടാണ് മെസി ഈ ഗോൾ ആഘോഷിച്ചത്.

MAGIC from Messi as @InterMiamiCF take the lead over the Union! 🪄 pic.twitter.com/lJ5tpDMUIA

— Major League Soccer (@MLS) August 20, 2026

തുടർന്ന് രണ്ടാം പകുതിയിൽ ഇൻഡ്യാന വാസിലേവിലൂടെയും 18-കാരനായ ഡിഫൻഡർ നീൽ പിയറിയിലൂടെയും തിരിച്ചടിച്ച ഫിലാഡൽഫിയ മത്സരം സമനിലയിലാക്കുകയായിരുന്നു. ഈ സീസണിൽ 17 മത്സരങ്ങളിൽ നിന്ന് 13 ഗോളുകളും 9 അസിസ്റ്റുകളും നേടിയ മെസി, ടോപ് സ്കോറർമാർക്കുള്ള ഗോൾഡൻ ബൂട്ട് പോരാട്ടത്തിൽ നിലവിൽ രണ്ടാം സ്ഥാനത്തുണ്ട്. ഇഞ്ചുറി ടൈമിൽ യാനിക് ബ്രൈറ്റും കവൻ സുള്ളിവനും ചുവപ്പ് കാർഡ് കണ്ട് പുറത്തായതോടെ സംഘർഷഭരിതമായാണ് മത്സരം അവസാനിച്ചത്. ഈ സമനിലയോടെ തുടർച്ചയായ മൂന്ന് തോൽവികൾക്ക് മയാമി വിരാമമിട്ടെങ്കിലും, കഴിഞ്ഞ നാല് മത്സരങ്ങളായി വിജയം കണ്ടെത്താൻ സാധിക്കാത്തത് പോയിന്റ് പട്ടികയിൽ അവർക്ക് തിരിച്ചടിയായി.

Messi is not human. 😭 pic.twitter.com/9tmgZku2UN

— RUTH 🇨🇦 (@it_Rutie) August 20, 2026

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക