ഐഫോണ്‍ 16ല്‍ നിന്ന് എന്തൊക്കെ മാറ്റങ്ങളുണ്ടാകും ഐഫോണ്‍ 17ന്? ഇതാണ് പുറത്തുവന്ന വിവരങ്ങള്‍

ഡിസൈൻ മുതൽ സ്പെസിഫിക്കേഷനുകൾ വരെ പുതിയ ഐഫോൺ 17 നിലവിലെ ഐഫോണ്‍ 16ല്‍ നിന്ന് എങ്ങനെ വ്യത്യാസപ്പെട്ടിരിക്കാമെന്ന് പരിശോധിക്കാം

കാലിഫോര്‍ണിയ: ആപ്പിൾ ഐഫോൺ 17 സീരീസ് സെപ്റ്റംബർ 9ന് പുറത്തിറക്കാനിരിക്കുന്നു. ഐഫോൺ 17 സ്റ്റാര്‍ഡേര്‍ഡ് മോഡല്‍ എന്ത് വാഗ്‌ദാനം ചെയ്യുമെന്നതിനെക്കുറിച്ച് പലവിധ കിംവദന്തികൾ പ്രചരിക്കുന്നുണ്ട്. കഴിഞ്ഞ രണ്ട് വർഷങ്ങളിലെ പതിപ്പുകളിൽ നിന്ന് വ്യത്യസ്‍തമായി, കമ്പനിയുടെ വരാനിരിക്കുന്ന സ്‍മാർട്ട്‌ഫോൺ നിര പുതിയ ഡിസൈൻ, ചിപ്‌സെറ്റ്, പുനർരൂപകൽപ്പന ചെയ്‌ക ലിക്വിഡ് ഗ്ലാസ് ഇന്‍റര്‍ഫേസ് തുടങ്ങിയവയാൽ കാര്യങ്ങൾ അടിമുടി മാറ്റുമെന്ന് പ്രതീക്ഷിക്കുന്നു. നിലവിൽ ലഭ്യമായ ഐഫോൺ 16-നേക്കാൾ ഐഫോൺ 17 എങ്ങനെ വ്യത്യസ്‍തമായിരിക്കുമെന്ന് പല ഐഫോൺ പ്രേമികളും ആലോചിക്കുന്നുണ്ടാകണം.

ഡിസൈനും ഡിസ്‍പ്ലേയും

വരാനിരിക്കുന്ന വാനില ഐഫോൺ 17 നിലവിലെ ഐഫോണ്‍ 16ന് സമാനമായി തോന്നുമെങ്കിലും, ആപ്പിൾ ഈ വർഷം സ്‌ക്രീൻ വലുപ്പം 6.1 ഇഞ്ചിൽ നിന്ന് 6.3 ഇഞ്ചായി ഉയർത്തുമെന്നാണ് റിപ്പോര്‍ട്ടുകള്‍. കൂടാതെ, പ്രോ-മോഷൻ 120 ഹെര്‍ട്‌സ് റിഫ്രഷ് റേറ്റിലുള്ള ഒഎൽഇഡി സ്‌ക്രീൻ ലഭിക്കുന്ന ആദ്യത്തെ നോൺ-പ്രൊ മോഡൽ ആയിരിക്കും ഐഫോൺ 17 ബേസ് മോഡൽ എന്നും റിപ്പോർട്ടുകൾ പറയുന്നു. ഐഫോൺ 17-നായി ആപ്പിൾ സാംസങ്ങിന്‍റെ എം14 ഒഎൽഇഡി പാനൽ ഉപയോഗിച്ചേക്കുമെന്നും റിപ്പോർട്ടുകൾ പറയുന്നു. ഇത് തെളിച്ചം വർധിപ്പിക്കാനും പവർ ഡ്രോൺ കുറയ്ക്കാനും ഡിസ്പ്ലേ കൂടുതൽ നേരം നിലനിൽക്കാനും സഹായിക്കും.

പെർഫോമൻസ്

ഐഫോൺ 17 ആപ്പിൾ സ്വന്തമായി വികസിപ്പിച്ചെടുത്ത എ19 ചിപ്‌സെറ്റുമായി വരുമെന്ന് പ്രതീക്ഷിക്കുന്നു. ഇത് TSMC-യുടെ 2nm പ്രോസസിൽ നിർമ്മിച്ചതായിരിക്കുമെന്ന് മുമ്പ് അഭ്യൂഹമുണ്ടായിരുന്നു. എന്നാൽ ഇത് 3 എൻഎം നോഡ് ഉപയോഗിക്കുമെന്നാണ് ഇപ്പോഴത്തെ സൂചനകള്‍. എങ്കിലും പുതിയ ചിപ്‌സെറ്റിന് ഇപ്പോഴും മികച്ച പ്രകടന വർധനവ് ലഭിക്കുകയും എഐ ജോലികളിൽ കാര്യക്ഷമത മെച്ചപ്പെടുത്തുകയും ചെയ്യും. അതുപോലെ ആപ്പിൾ ഔദ്യോഗികമായി റാമിന്‍റെ അളവ് വെളിപ്പെടുത്തിയിട്ടില്ലെങ്കിലും, ഐഫോൺ 17-ന് 12 ജിബി റാം ഉണ്ടായിരിക്കാമെന്ന് വിവിധ റിപ്പോർട്ടുകൾ സൂചിപ്പിക്കുന്നു.

ലിക്വിഡ് ഗ്ലാസുള്ള ഐഒഎസ് 26

ഐഫോൺ 17-ൽ വരുന്ന മറ്റൊരു പ്രധാന അപ്‌ഗ്രേഡ് ആപ്പിളിന്‍റെ ലിക്വിഡ് ഗ്ലാസ് ഡിസൈൻ ഭാഷ ആയിരിക്കും. ഈ വർഷം ആദ്യം WWDC-യിൽ, ആപ്പിൾ ഐഫോണുകൾക്കായുള്ള പുതിയതും പുതുമയുള്ളതുമായ ഓപ്പറേറ്റിംഗ് സിസ്റ്റമായ ഐഒഎസ് 26 അവതരിപ്പിച്ചു. അത് അർധസുതാര്യമായ രൂപകൽപ്പനയോടെയാണ് വരുന്നത്. ദൃശ്യ മാറ്റങ്ങൾക്ക് പുറമേ, ആപ്പിൾ ക്യാമറ ആപ്പ് പുനർരൂപകൽപ്പന ചെയ്യുകയും കോൾ സ്ക്രീനിംഗ്, ലൈവ് ട്രാൻസ്‌ലേറ്റ് പോലുള്ള ചില പുതിയ സവിശേഷതകൾ അവതരിപ്പിക്കുകയും ചെയ്യും.

ക്യാമറ

ഐഫോൺ 17-ൽ നിലവിലെ തലമുറ മോഡലിന്‍റെ അതേ ഡ്യുവൽ ക്യാമറ സജ്ജീകരണമാണ് ലഭിക്കുന്നതെന്നാണ് റിപ്പോർട്ടുകൾ. അതായത്, 12 എംപി അൾട്രാവൈഡ് ലെൻസിന് പുറമേ നിങ്ങൾക്ക് 48 എംപി പ്രൈമറി സെൻസറും ലഭിക്കും. വരാനിരിക്കുന്ന ഫോണിൽ കഴിഞ്ഞ വർഷത്തെ അതേ ഹാർഡ്‌വെയർ ഉണ്ടായിരിക്കും. പുതിയ ചിപ്‌സെറ്റ് മെച്ചപ്പെട്ട ഇമേജ് സിഗ്നൽ പ്രോസസിംഗ് വാഗ്‍ദാനം ചെയ്തേക്കാം. ഇത് മികച്ച ചിത്രങ്ങൾ എടുക്കാൻ സഹായിക്കും. ഐഫോൺ 17ന് നവീകരിച്ച 24 എംപി സെൽഫി ക്യാമറ ഉണ്ടാകുമെന്നും റിപ്പോർട്ടുകൾ ഉണ്ട്. ഇത് ഐഫോൺ 16ന്‍റെ 12 എംപി ഫ്രണ്ട് ഷൂട്ടറിൽ നിന്ന് ഒരു വലിയ ചുവടുവയ്പ്പായിരിക്കും.

ചാർജിംഗും ബാറ്ററിയും

ഐഫോൺ 17നെ അതിന്‍റെ മുൻഗാമികളിൽ നിന്ന് വ്യത്യസ്‍തമാക്കിയേക്കാവുന്ന മറ്റൊരു ഘടകം ബാറ്ററി ലൈഫ് ആണ്. വരാനിരിക്കുന്ന ഐഫോണിന് വലിയ ബാറ്ററി ലഭിക്കുക മാത്രമല്ല ഇത് റിവേഴ്‌സ് വയർലെസ് ചാർജിംഗിനെ പിന്തുണയ്ക്കുകയും ചെയ്യുമെന്നാണ് റിപ്പോർട്ടുകൾ. അതായത് ഇനിമുതൽ ഐഫോൺ ഉപയോക്താക്കൾക്ക് ചാർജർ ഇല്ലാതെ തന്നെ എയർപോഡുകൾ, ആപ്പിൾ വാച്ച് തുടങ്ങിയ ആക്‌സസറികൾ ചാർജ് ചെയ്യാൻ കഴിഞ്ഞേക്കും.