ഐഫോൺ 18 പ്രോയിൽ ചെറിയ ഡൈനാമിക് ഐലൻഡ്: ആപ്പിളിന്റെ പുതിയ ഡിസൈൻ തന്ത്രം
Synopsis
വരാനിരിക്കുന്ന ഐഫോൺ 18 പ്രോ മോഡലുകളിൽ ഡൈനാമിക് ഐലൻഡിന്റെ വലിപ്പം കുറയ്ക്കാൻ ആപ്പിൾ ഒരുങ്ങുന്നു. പൂർണ്ണമായും പുതിയ ഡിസൈനിലേക്ക് മാറുന്നതിന് പകരം, നിലവിലെ കട്ട്ഔട്ട് ചെറുതാക്കി ഉപയോക്തൃ അനുഭവം മെച്ചപ്പെടുത്താനാണ് കമ്പനി ലക്ഷ്യമിടുന്നത്. ഇതിനൊപ്പം പുതിയ A20 പ്രോ ചിപ്പ്, മെച്ചപ്പെട്ട ബാറ്ററി, ക്യാമറ തുടങ്ങിയ ഹാർഡ്വെയർ നവീകരണങ്ങളും പ്രതീക്ഷിക്കുന്നു.
കാലിഫോര്ണിയ: ആപ്പിളിന്റെ വരാനിരിക്കുന്ന ഐഫോൺ 18 പ്രോ മോഡലുകളിലെ ഡിസൈൻ മാറ്റങ്ങളെക്കുറിച്ചുള്ള പുതിയ റിപ്പോർട്ടുകൾ ടെക് ലോകത്ത് വലിയ ചർച്ചകൾക്ക് വഴിവെക്കുന്നു. ഇപ്പോഴുള്ള ഡൈനാമിക് ഐലൻഡ് സംവിധാനത്തെ പൂർണ്ണമായും മാറ്റാതെ, അതിന്റെ വലിപ്പം കുറയ്ക്കുന്നതിലേക്കാണ് ആപ്പിൾ ശ്രദ്ധ കേന്ദ്രീകരിക്കുന്നത് എന്നാണ് പുതിയ ലീക്കുകൾ നൽകുന്ന സൂചനകൾ. ഹോൾ-പഞ്ച് ഡിസൈനിലേക്ക് മാറുമെന്ന മുൻകാല റിപ്പോർട്ടുകൾക്കു വിപരീതമായി, കമ്പനി നിലവിലെ പിൽ-ആകൃതിയിലുള്ള കട്ട്ഔട്ട് നിലനിർത്താനാണ് സാധ്യത എന്നും പുതിയ റിപ്പോട്ടുകൾ പറയുന്നു.
ഐഫോൺ 18 പ്രോ: അപ്ഗ്രേഡുകള് ഇവയെന്ന് സൂചന
ചൈനീസ് സോഷ്യൽ മീഡിയ പ്ലാറ്റ്ഫോമായ വെയ്ബോയിൽ ഉപയോക്താവായ വാങ് ടെങ്സിയാവോ പങ്കുവെച്ച ഒരു പോസ്റ്റാണ് പുതിയ ഐഫോൺ മോഡലിന്റെ ഡിസൈൻ രഹസ്യങ്ങൾ വെളിപ്പെടുത്തിയിരിക്കുന്നത്. ഐഫോൺ 18 പ്രോ സീരീസിൽ ട്രൂഡെപ്ത് ക്യാമറയും ഫേസ് ഐഡി സംവിധാനവും ഉൾക്കൊള്ളുന്ന കട്ട്ഔട്ട് ഇപ്പോൾ ഉള്ളതിനെക്കാൾ ചെറുതായിരിക്കും എന്ന് ഈ പോസ്റ്റ് വ്യക്തമാക്കുന്നു. നിലവിലെ മോഡലുകളിൽ ഏകദേശം 20.76 മില്ലീമീറ്റർ വലിപ്പമുള്ള ഈ ഭാഗം, പുതിയ മോഡലുകളിൽ ഏകദേശം 13.49 മില്ലീമീറ്ററായി ചുരുങ്ങാനാണ് സാധ്യത. ചില ഫേസ് ഐഡി ഘടകങ്ങൾ, പ്രത്യേകിച്ച് ഫ്ലഡ് ഇല്യൂമിനേറ്റർ, സ്ക്രീൻ കീഴിലേക്ക് മാറ്റുന്നതിലൂടെ ഈ മാറ്റം സാധ്യമാകുമെന്നാണ് വിലയിരുത്തൽ.
അതേസമയം, അണ്ടർ-ഡിസ്പ്ലേ സാങ്കേതികവിദ്യയിൽ ആപ്പിള് ഇപ്പോഴും ചില വെല്ലുവിളികൾ നേരിടുന്നതായും റിപ്പോർട്ടുകൾ സൂചിപ്പിക്കുന്നു. പൂർണ്ണമായും കട്ട്-ഔട്ട് ഇല്ലാത്ത ഫുൾ-സ്ക്രീൻ ഐഫോൺ അവതരിപ്പിക്കാൻ കൂടുതൽ സമയം എടുക്കാൻ സാധ്യതയുണ്ട്. അതിനാൽ, നിലവിലുള്ള ഡിസൈൻ മെച്ചപ്പെടുത്തുന്നതിനുള്ള ഇടത്തരം പരിഹാരമാണ് കമ്പനി തിരഞ്ഞെടുത്തിരിക്കുന്നത് എന്നാണ് റിപ്പോട്ടുകൾ.
ചില റിപ്പോർട്ടുകൾ ഈ മാറ്റം പ്രോ മോഡലുകൾക്ക് മാത്രമായിരിക്കും എന്ന് പറയുന്നു. എന്നാല് മറ്റ് ചില റിപ്പോട്ടുകൾ മുഴുവൻ ഐഫോൺ 18 ശ്രേണിയിലും ചെറിയ കട്ട്ഔട്ട് ഉണ്ടാകുമെന്ന് അവകാശപ്പെടുന്നു. എങ്കിലും മൊത്തത്തിലുള്ള ബെസൽ വലിപ്പത്തിൽ വലിയ മാറ്റങ്ങളില്ലെന്ന് ഇരു റിപ്പോട്ടുകളും സമ്മതിക്കുന്നു. ഹാർഡ്വെയർ ഭാഗത്ത്, ഐഫോൺ 18 പ്രോ മോഡലുകളിൽ പുതിയ 2nm A20 പ്രോ ചിപ്പ്, 5000mAh-ൽ കൂടുതലുള്ള ബാറ്ററി, കൂടുതൽ മെച്ചപ്പെടുത്തിയ ക്യാമറ സംവിധാനങ്ങൾ എന്നിവ പ്രതീക്ഷിക്കപ്പെടുന്നു. സെപ്റ്റംബർ മാസത്തിൽ ലോഞ്ച് പ്രതീക്ഷിക്കുന്ന ഈ സീരീസിനൊപ്പം ഐഫോൺ 18 പ്രോ മാക്സ് മോഡലും എത്തും. കൂടാതെ, ഏറെ പ്രതീക്ഷയുള്ള ഫോൾഡബിൾ ഐഫോൺ പിന്നീട് വിപണിയിൽ എത്താൻ സാധ്യത ഉണ്ടെന്നും റിപ്പോർട്ടുകൾ പറയുന്നു.
വലിയ ഡിസൈൻ മാറ്റങ്ങൾക്ക് പകരം ചെറിയതും കാര്യക്ഷമവുമായ പരിഷ്കരണങ്ങളിലൂടെ ഉപയോക്തൃ അനുഭവം മെച്ചപ്പെടുത്താനുള്ള തന്ത്രം ആപ്പിൾ തുടരുകയാണ് എന്നാണ് റിപ്പോട്ടുകൾ.