ഐഫോൺ 18 പ്രോ: ആപ്പിളിന്റെ അടുത്ത വിസ്‍മയം

ആപ്പിളിന്റെ അടുത്ത തലമുറ മോഡലുകളായ ഐഫോൺ 18 പ്രോ, പ്രോ മാക്സ് എന്നിവ സെപ്റ്റംബറിൽ പുറത്തിറങ്ങുമെന്ന് റിപ്പോർട്ട്. പുതിയ A20 പ്രോ ചിപ്പ്, വേരിയബിൾ അപർച്ചർ സിസ്റ്റമുള്ള ക്യാമറ, മെച്ചപ്പെട്ട സിരി എഐ എന്നിവ പ്രധാന ആകർഷണങ്ങളാകും. ഡാർക്ക് ചെറി പോലുള്ള പുതിയ നിറങ്ങളിലും ഫോൺ ലഭ്യമായേക്കും.

ലോകമെമ്പാടുമുള്ള സ്‍മാർട്ട്ഫോൺ പ്രേമികൾ ഓരോ വർഷവും ആപ്പിളിന്റെ പുതിയ ഐഫോൺ അവതരണത്തിനായി കാത്തിരിക്കാറുണ്ട്. കഴിഞ്ഞ വർഷം പുറത്തിറങ്ങിയ ഐഫോൺ 17 സീരീസിന് മികച്ച വിപണി സ്വീകാര്യത ലഭിച്ചതിന് പിന്നാലെ അടുത്ത തലമുറ മോഡലുകളായ ഐഫോൺ 18 പ്രോ, ഐഫോൺ 18 പ്രോ മാക്സ് എന്നിവയുമായി ആപ്പിൾ വീണ്ടും ശ്രദ്ധ നേടാനൊരുങ്ങുകയാണ്. വിവിധ റിപ്പോർട്ടുകൾ പ്രകാരം, ഈ വർഷം സെപ്റ്റംബറിൽ പ്രോ മോഡലുകൾ അവതരിപ്പിക്കാനാണ് കമ്പനിയുടെ പദ്ധതി.

ഡിസൈനിന്റെ കാര്യത്തിൽ വലിയ മാറ്റങ്ങൾ പ്രതീക്ഷിക്കപ്പെടുന്നില്ലെങ്കിലും പുതിയ നിറങ്ങളിലാണ് ആപ്പിൾ പരീക്ഷണങ്ങൾ നടത്തുന്നതെന്നാണ് റിപ്പോർട്ടുകൾ. ഡാർക്ക് ചെറി, ലൈറ്റ് ബ്ലൂ, ഡാർക്ക് ഗ്രേ, സിൽവർ എന്നീ നിറങ്ങൾ ഐഫോൺ 18 പ്രോ സീരീസിൽ ലഭ്യമായേക്കും. ഐഫോൺ 17 പ്രോയിലെ കോസ്മിക് ഓറഞ്ചിന് പകരമായി ഡാർക്ക് ചെറി പ്രധാന ആകർഷണ നിറമാകുമെന്നാണ് സൂചന. പിൻഭാഗവും ഫ്രെയിമും കൂടുതൽ ഒത്തുചേർന്ന രൂപത്തിലാക്കുന്ന ഡിസൈൻ മാറ്റങ്ങളും പ്രതീക്ഷിക്കപ്പെടുന്നു.

ഡിസ്‌പ്ലേയിൽ പുതിയ എൽടിപിഒ പ്ലസ് ഓഎൽഇഡി പാനലുകൾ ഉപയോഗിക്കുമെന്നാണ് റിപ്പോർട്ടുകൾ. കൂടുതൽ ഊർജക്ഷമതയും മികച്ച വർണ കൃത്യതയും നൽകുന്ന ഈ സ്ക്രീനുകൾ ഉപയോക്തൃ അനുഭവം മെച്ചപ്പെടുത്തും. കൂടാതെ ഡൈനാമിക് ഐലൻഡിന്റെ വലുപ്പം കുറയുന്നതോടെ കൂടുതൽ സ്‌ക്രീൻ സ്പേസ് ലഭിക്കും. സ്ക്രീൻ വലുപ്പത്തിൽ മാറ്റമുണ്ടാകില്ലെന്നാണ് വിവരം. ഐഫോൺ 18 പ്രോയ്ക്ക് 6.3 ഇഞ്ചും പ്രോ മാക്സിന് 6.9 ഇഞ്ചും ഡിസ്‌പ്ലേ ലഭിച്ചേക്കും.

പെർഫോമൻസിന്റെ കാര്യത്തിൽ പുതിയ A20 പ്രോ ചിപ്പാണ് പ്രധാന ആകർഷണം. 2 നാനോമീറ്റർ സാങ്കേതികവിദ്യയിൽ നിർമ്മിക്കുന്ന ഈ പ്രോസസർ മുൻതലമുറയെക്കാൾ 15 ശതമാനം കൂടുതൽ വേഗതയും 30 ശതമാനം വരെ മെച്ചപ്പെട്ട ഊർജക്ഷമതയും നൽകുമെന്നാണ് റിപ്പോർട്ടുകൾ. 12GB റാം, പുതിയ C2 മോഡം, മെച്ചപ്പെട്ട സാറ്റലൈറ്റ് കണക്റ്റിവിറ്റി എന്നിവയും ഫോണിന്റെ ഭാഗമാകും.

ക്യാമറ വിഭാഗത്തിലും ശ്രദ്ധേയമായ മാറ്റങ്ങൾ പ്രതീക്ഷിക്കപ്പെടുന്നു. പ്രധാന ക്യാമറയിൽ വേരിയബിൾ അപർച്ചർ സിസ്റ്റം ഉൾപ്പെടുത്താനാണ് ആപ്പിളിന്റെ ശ്രമമെന്നാണ് റിപ്പോർട്ടുകൾ. ഇതിലൂടെ പ്രകാശ നിയന്ത്രണം കൂടുതൽ കൃത്യമാക്കാനും പോർട്രെയ്റ്റ്, ലോ-ലൈറ്റ് ഫോട്ടോഗ്രഫി മെച്ചപ്പെടുത്താനും സാധിക്കും. 48 മെഗാപിക്സൽ പ്രധാന, അൾട്രാവൈഡ്, ടെലിഫോട്ടോ സെൻസറുകൾ അടങ്ങുന്ന ട്രിപ്പിൾ ക്യാമറ സംവിധാനവും തുടരുമെന്നാണ് സൂചന.

ആർട്ടിഫിഷ്യൽ ഇന്റലിജൻസ് രംഗത്തും ആപ്പിൾ വലിയ മുന്നേറ്റത്തിനൊരുങ്ങുകയാണ്. iOS 27 ഓപ്പറേറ്റിങ് സിസ്റ്റത്തോടൊപ്പം എത്തുന്ന പുതിയ സിരി എഐ, ഉപയോക്താവിന്റെ വ്യക്തിഗത സാഹചര്യങ്ങൾ മനസ്സിലാക്കി കൂടുതൽ കാര്യക്ഷമമായി പ്രവർത്തിക്കുമെന്നാണ് കമ്പനി വ്യക്തമാക്കുന്നത്. ഗൂഗിൾ ജെമിനി മോഡലുകളുടെ സഹായത്തോടെയായിരിക്കും പുതിയ സിരി പ്രവർത്തിക്കുക.

വിലയുടെ കാര്യത്തിൽ വർധനവുണ്ടാകുമെന്നാണ് സൂചന. അമേരിക്കയിൽ ഐഫോൺ 18 പ്രോയ്ക്ക് 1,299 ഡോളർ വരെ വിലയാകാമെന്നാണ് റിപ്പോർട്ടുകൾ. ഇന്ത്യയിൽ നിലവിലെ ഐഫോൺ 17 പ്രോയുടെ 1,34,900 രൂപ എന്ന തുടക്കവിലയെക്കാൾ ഉയർന്ന വിലയിലായിരിക്കും പുതിയ മോഡൽ എത്തുകയെന്നാണ് വിലയിരുത്തൽ. എന്നാൽ ആപ്പിൾ ഇതുസംബന്ധിച്ച് ഔദ്യോഗിക പ്രഖ്യാപനം നടത്തിയിട്ടില്ല.