സവിശേഷതകളിലും വിലയിലും മാറ്റം, ലാവ അഗ്നി 4 ഉടൻ ലോഞ്ച് ചെയ്യും; പ്രധാന വിവരങ്ങൾ ചോർന്നു

ലാവ അഗ്നി 4 ഇന്ത്യയിൽ 25,000 രൂപ വിലയിൽ പുറത്തിറങ്ങുമെന്ന് സൂചന, ഫോണിന്‍റെ ഫീച്ചറുകള്‍ ചോര്‍ന്നു

നോയിഡ: മീഡിയടെക് ഡൈമെൻസിറ്റി 7300എക്സ് ചിപ്പ്, ആക്ഷൻ ബട്ടൺ, പിന്നിലെ മിനി അമോലെഡ് ഡിസ്‌പ്ലേ എന്നിവയോടെ 2024 ഒക്ടോബറിലാണ് ഇന്ത്യന്‍ ബ്രാന്‍ഡായ ലാവ പുത്തന്‍ അഗ്നി 3 സ്‍മാർട്ട്‌ഫോൺ അവതരിപ്പിച്ചത്. ഇപ്പോൾ ലാവ അഗ്നി 4 വികസിപ്പിച്ചുകൊണ്ടിരിക്കുകയാണെന്നാണ് റിപ്പോർട്ടുകൾ. ഇന്ത്യയിൽ ലോഞ്ച് ചെയ്യുന്നതിന് മുന്നോടിയായി ഈ സ്‍മാർട്ട്‌ഫോണിന്‍റെ പ്രധാന സവിശേഷതകൾ, രൂപകൽപ്പന, വില എന്നിവ ഓൺലൈനിൽ ചോർന്നു. അഗ്നി 4 മീഡിയടെക് ഡൈമെൻസിറ്റി 8350 SoC ഉപയോഗിച്ചായിരിക്കും പ്രവർത്തിക്കുന്നത് എന്നാണ് സൂചന.

ലാവ അഗ്നി 4 ഇന്ത്യയിൽ 25,000 രൂപ വിലയിൽ പുറത്തിറങ്ങുമെന്ന് പ്രതീക്ഷിക്കുന്നതായി 91മൊബൈൽസിനെ ഉദ്ദരിച്ച് ഗാഡ്‍ജെറ്റ്സ് ഡോട്ട് കോം റിപ്പോർട്ട് ചെയ്യുന്നു. ചിപ്‌സെറ്റിന്‍റെയും ലാവ അഗ്നി 3-യുടെ മൂല്യത്തിന്‍റെയും അടിസ്ഥാനത്തിലാണ് ഈ വിലനിർണ്ണയം. ഇത് ശരിയാണെങ്കിൽ, അഗ്നി 3-ന്‍റെ അടിസ്ഥാന വേരിയന്‍റിനേക്കാൾ വലിയ വില വർധനവ് അഗ്നി 4-ന് ലഭിക്കും. 8 ജിബി റാമും 128 ജിബി ഓൺബോർഡ് സ്റ്റോറേജുമുള്ള അടിസ്ഥാന വേരിയന്‍റിന് 20,999 രൂപ വിലയിലാണ് കഴിഞ്ഞ വർഷം അഗ്നി 3 ഇന്ത്യയിൽ ലോഞ്ച് ചെയ്തത്. ചാർജർ ഉള്ള അതേ സ്റ്റോറേജ് വേരിയന്‍റിന് 22,999 രൂപ ആയിരുന്നു വില. അതേസമയം, 256 ജിബി ഇന്‍റേണൽ സ്റ്റോറേജും ചാർജറും ഉള്ള ലാവ അഗ്നി 3 24,999 രൂപ വിലയിൽ ലോഞ്ച് ചെയ്തു.

ലാവ അഗ്നി 4-ന്‍റെ ഡിസൈനും റിപ്പോർട്ട് വെളിപ്പെടുത്തി. ടിപ്‌സ്റ്റർ യോഗേഷ് ബ്രാർ ആണ് ഫോണിന്‍റെ റെൻഡർ പങ്കുവെച്ചത്. ക്യാപ്‍സൂൾ ആകൃതിയിലുള്ള ക്യാമറ ഐലൻഡിനുള്ളിൽ തിരശ്ചീനമായി വിന്യസിച്ചിരിക്കുന്ന ഡ്യുവൽ റിയർ ക്യാമറ സജ്ജീകരണം ഫോണിന് ലഭിക്കുമെന്ന് റെൻഡർ ചിത്രങ്ങൾ സൂചിപ്പിക്കുന്നു. രണ്ട് ലെൻസുകൾക്കിടയിൽ, ഒരു എൽഇഡി ഫ്ലാഷും ലഭിക്കുന്നു.

ലാവ അഗ്നി 3-യുടെ ട്രിപ്പിൾ റിയർ ക്യാമറ സജ്ജീകരണത്തിൽ നിന്നും പുതിയ ഫോൺ ഒരുചുവട് പിന്നോട്ടുപോകുന്നതായും റിപ്പോർട്ടുകൾ പറയുന്നു. അതായത് അഗ്‍നി 3 സ്‍മാർട്ട്‌ഫോണിലെ ഒരു ഹൈലൈറ്റായിരുന്ന മിനി അമോലെഡ് സ്‌ക്രീൻ പുതിയ ഫോണിൽ ഉണ്ടാകില്ല എന്നാണ് റിപ്പോർട്ടുകൾ. കൂടാതെ, ഫോണിന്‍റെ വെളുത്ത നിറമുള്ള ബാക്ക് പാനലിനെ യോജിക്കുന്ന വിധത്തിൽ വശങ്ങളിൽ ഒരു മെറ്റൽ ഫ്രെയിമുമായി ലാവ അഗ്നി 4 വരാൻ സാധ്യതയുണ്ടെന്ന് റെൻഡർ സൂചിപ്പിക്കുന്നു. അഗ്നി 3-യുടെ വളഞ്ഞ അരികുകളിൽ നിന്ന് വ്യത്യസ്‍തമായ പരന്ന അരികുകളുമായാണ് റെൻഡറിംഗിലെ അഗ്‍നി 4 കാണപ്പെടുന്നത്. കൂടാതെ, പവർ, വോളിയം നിയന്ത്രണ ബട്ടണുകൾ സ്മാർട്ട്‌ഫോണിന്‍റെ വലതുവശത്ത് നൽകിയേക്കും.

ലാവ അഗ്നി 4-ന്‍റെ പ്രധാന സ്പെസിഫിക്കേഷനുകളും പുറത്തുവന്നിട്ടുണ്ട്. 120 ഹെര്‍ട്സ് റിഫ്രഷ് റേറ്റുള്ള 6.78 ഇഞ്ച് ഫുൾ-എച്ച്ഡി+ ഡിസ്‌പ്ലേയാണ് ഫോണിൽ പ്രതീക്ഷിക്കുന്നത്. 3.35 ജിഗാഹെര്‍ട്സ് പീക്ക് ക്ലോക്ക് സ്പീഡുള്ള 4nm പ്രോസസിൽ നിർമ്മിച്ച മീഡിയടെക് ഡൈമെൻസിറ്റി 8350 ചിപ്പ് ഹാൻഡ്‌സെറ്റിന് കരുത്ത് പകരുമെന്ന് പറയപ്പെടുന്നു. കൂടാതെ യുഎഫ്‌എസ് 4.0 സ്റ്റോറേജും ഇതിൽ ഉൾപ്പെടുന്നു. 50 മെഗാപിക്സലിന്‍റെ രണ്ട് ക്യാമറകളും ഫോണിൽ ഉണ്ടായിരിക്കുമെന്ന് റിപ്പോർട്ടുകൾ ഉണ്ട്. മാത്രമല്ല, 7,000 എംഎഎച്ചിൽ കൂടുതൽ ബാറ്ററി ഈ ഹാൻഡ്‌സെറ്റിൽ ലഭിച്ചേക്കും.

അതേസമയം അഗ്നി 4 ഇന്ത്യയിൽ എന്ന് ലോഞ്ച് ചെയ്യുമെന്ന് ലാവ ഇതുവരെ ഔദ്യോഗികമായി സ്ഥിരീകരിച്ചിട്ടില്ല. ഈ സ്‍മാർട്ട്ഫോണിന്‍റെ വില വിശദാംശങ്ങളോ ഉപഭോക്താക്കൾക്ക് ഫോൺ ലഭ്യമാകുന്ന വിതരണ പ്ലാറ്റ്‍ഫോമുകളോ കമ്പനി ഇതുവരെ സ്ഥിരീകരിച്ചിട്ടില്ല.