മോട്ടോ ജി മാക്സ്, റിയൽമി, വൺപ്ലസ്: മികച്ച 5ജി ഫോൺ ഏതാണ്?

പുതിയ മോട്ടോ ജി മാക്സ് 5ജി ഫോൺ വിപണിയിലെത്തി. റിയൽമി 16എക്സ് 5ജി, വൺപ്ലസ് നോർഡ് സിഇ 6 ലൈറ്റ് എന്നിവയുമായി ഈ ഫോണിനെ താരതമ്യം ചെയ്യുകയാണ് ഇവിടെ. വില, ക്യാമറ, പ്രോസസർ, ബാറ്ററി തുടങ്ങിയ പ്രധാന ഘടകങ്ങൾ പരിശോധിച്ച് ഏത് ഫോണാണ് നിങ്ങൾക്ക് അനുയോജ്യമെന്ന് കണ്ടെത്താം.

ഇന്ത്യയിലെ മിഡ് റേഞ്ച് 5ജി സ്‍മാർട്ട്ഫോൺ വിപണിയിൽ പുതിയ മോഡലായി മോട്ടോ ജി മാക്സ് എത്തി. 6.72 ഇഞ്ച് ഡിസ്പ്ലേയും സ്നാപ്ഡ്രാഗൺ 6എസ് ജെൻ 4 ചിപ്സെറ്റുമാണ് ഫോണിന്റെ പ്രധാന പ്രത്യേകതകൾ. റിയൽമി 16എക്സ് 5ജി, വൺപ്ലസ് നോർഡ് സിഇ 6 ലൈറ്റ് എന്നിവയാണ് മോട്ടോ ജി മാക്സിന്റെ പ്രധാന എതിരാളികൾ. മൂന്ന് ഫോണുകളിലും 7,000 എംഎഎച്ച് ബാറ്ററി, 50 മെഗാപിക്സൽ പിൻക്യാമറ, 5ജി കണക്റ്റിവിറ്റി എന്നിവയുണ്ട്. എന്നാൽ പ്രോസസർ, ഡിസ്പ്ലേ, ക്യാമറ സംവിധാനം, ചാർജിങ് വേഗത എന്നിവയിൽ വ്യത്യാസങ്ങളുണ്ട്.

മോട്ടോ ജി മാക്സ്; വില 27,999 രൂപ മുതൽ

മോട്ടോ ജി മാക്സിന്റെ 6 ജിബി റാം + 128 ജിബി സ്റ്റോറേജ് പതിപ്പിന് 27,999 രൂപയാണ് വില. പാന്റോൺ അലാസ്കൻ ബ്ലൂ, പാന്റോൺ മലാഗ, പാന്റോൺ സ്റ്റാർഗേസർ എന്നീ നിറങ്ങളിൽ ഫോൺ ലഭിക്കും. റിയൽമി 16എക്സ് 5ജിയുടെ 4 ജിബി + 128 ജിബി പതിപ്പിന് 25,999 രൂപയാണ് വില. 6 ജിബി + 128 ജിബി പതിപ്പിന് 27,999 രൂപയും 6 ജിബി + 256 ജിബി പതിപ്പിന് 30,999 രൂപയുമാണ് വില. എൻഡുറൻസ് ബ്രൗൺ, ഗ്ലോറി വൈറ്റ് നിറങ്ങളിലാണ് ഫോൺ ലഭിക്കുന്നത്. വൺപ്ലസ് നോർഡ് സിഇ 6 ലൈറ്റിന്റെ 6 ജിബി + 128 ജിബി പതിപ്പിന് 20,999 രൂപയാണ് വില. 8 ജിബി + 128 ജിബി പതിപ്പിന് 22,999 രൂപയും 8 ജിബി + 256 ജിബി പതിപ്പിന് 25,999 രൂപയുമാണ് വില. ഹൈപ്പർ ബ്ലാക്ക്, വിവിഡ് മിന്റ് നിറങ്ങളിൽ ഫോൺ ലഭിക്കും.

ഡിസ്പ്ലേയിൽ ആരാണ് മുന്നിൽ?

മോട്ടോ ജി മാക്സിൽ 6.72 ഇഞ്ച് ഫുൾ എച്ച്ഡി പ്ലസ് എൽസിഡി ഡിസ്പ്ലേയാണ് നൽകിയിരിക്കുന്നത്. 120 ഹെർട്സ് റിഫ്രഷ് റേറ്റും 120 ഹെർട്സ് ടച്ച് സാംപ്ലിങ് റേറ്റുമുണ്ട്. പരമാവധി 1,050 നിറ്റ്സ് തെളിച്ചവും കോർണിങ് ഗൊറില്ല ഗ്ലാസ് 7ഐ സംരക്ഷണവും ലഭിക്കും. ആൻഡ്രോയിഡ് 16 അടിസ്ഥാനമാക്കിയുള്ള ഹെലോ യുഐയിലാണ് ഫോൺ പ്രവർത്തിക്കുന്നത്. റിയൽമി 16എക്സ് 5ജിയിൽ 6.8 ഇഞ്ച് എച്ച്ഡി പ്ലസ് എൽസിഡി പാനലാണ്. 144 ഹെർട്സ് വരെ റിഫ്രഷ് റേറ്റും 180 ഹെർട്സ് ടച്ച് സാംപ്ലിങ് റേറ്റും ലഭിക്കും. 1,200 നിറ്റ്സ് വരെ തെളിച്ചമുണ്ട്. ആൻഡ്രോയിഡ് 16 അടിസ്ഥാനമാക്കിയ റിയൽമി യുഐ 7.0 ആണ് ഓപ്പറേറ്റിങ് സിസ്റ്റം. വൺപ്ലസ് നോർഡ് സിഇ 6 ലൈറ്റിൽ 6.72 ഇഞ്ച് ഫുൾ എച്ച്ഡി പ്ലസ് എൽസിഡി ഡിസ്പ്ലേയാണുള്ളത്. 144 ഹെർട്സ് റിഫ്രഷ് റേറ്റും 1,000 നിറ്റ്സ് വരെ പരമാവധി തെളിച്ചവും ലഭിക്കും. ആൻഡ്രോയിഡ് 16 അടിസ്ഥാനമാക്കിയ ഓക്സിജൻഒഎസ് 16 ആണ് സോഫ്റ്റ്‌വെയർ.

പ്രോസസറും ബാറ്ററിയും

മോട്ടോ ജി മാക്സിൽ 4 നാനോമീറ്റർ സ്നാപ്ഡ്രാഗൺ 6എസ് ജെൻ 4 ചിപ്സെറ്റാണ് ഉപയോഗിച്ചിരിക്കുന്നത്. 6 ജിബി എൽപിഡിഡിആർ5എക്സ് റാമും 128 ജിബി യുഎഫ്എസ് 3.1 സ്റ്റോറേജുമുണ്ട്. 7,000 എംഎഎച്ച് ബാറ്ററിക്കൊപ്പം 30 വാട്ട് ടർബോപവർ ചാർജിങ് പിന്തുണയുമുണ്ട്. റിയൽമി 16എക്സ് 5ജിയിൽ മീഡിയടെക് ഡൈമെൻസിറ്റി 6300 ചിപ്സെറ്റാണ്. 6 ജിബി വരെ റാമും 256 ജിബി വരെ സ്റ്റോറേജും ലഭിക്കും. 7,000 എംഎഎച്ച് ബാറ്ററിയിൽ 45 വാട്ട് ഫാസ്റ്റ് ചാർജിങ് പിന്തുണയുണ്ട്. ബൈപാസ് ചാർജിങ്, റിവേഴ്സ് ചാർജിങ് സൗകര്യങ്ങളും ഫോണിലുണ്ട്. വൺപ്ലസ് നോർഡ് സിഇ 6 ലൈറ്റിൽ ഒക്ടാകോർ മീഡിയടെക് ഡൈമെൻസിറ്റി 7400 അപെക്സ് ചിപ്സെറ്റാണ് നൽകിയിരിക്കുന്നത്. 8 ജിബി റാമും 256 ജിബി വരെ യുഎഫ്എസ് 3.1 സ്റ്റോറേജുമുണ്ട്. 7,000 എംഎഎച്ച് ബാറ്ററിക്ക് 45 വാട്ട് വയേർഡ് ഫാസ്റ്റ് ചാർജിങ്, 10 വാട്ട് വയേർഡ് റിവേഴ്സ് ചാർജിങ് പിന്തുണയുണ്ട്.

ക്യാമറയിൽ മോട്ടോ ജി മാക്സിന് മുൻതൂക്കം

മോട്ടോ ജി മാക്സിൽ 50 മെഗാപിക്സൽ സോണി ലൈറ്റിയ 600 പ്രധാന ക്യാമറയും 8 മെഗാപിക്സൽ അൾട്രാ വൈഡ് ആംഗിൾ ക്യാമറയും ഉൾപ്പെടുന്ന ഡ്യുവൽ പിൻക്യാമറ സംവിധാനമാണുള്ളത്. മുൻവശത്ത് 32 മെഗാപിക്സൽ ക്യാമറയുണ്ട്. റിയൽമി 16എക്സ് 5ജിയിൽ 50 മെഗാപിക്സൽ പ്രധാന പിൻക്യാമറയും 8 മെഗാപിക്സൽ മുൻക്യാമറയുമാണ് ലഭിക്കുന്നത്. ഫോണിന്റെ ഭാരം 217 ഗ്രാം ആണ്. വൺപ്ലസ് നോർഡ് സിഇ 6 ലൈറ്റിൽ 50 മെഗാപിക്സൽ പ്രധാന ക്യാമറയും 2 മെഗാപിക്സൽ സെക്കൻഡറി ക്യാമറയും അടങ്ങുന്ന ഡ്യുവൽ ക്യാമറ സംവിധാനമാണുള്ളത്. 8 മെഗാപിക്സൽ മുൻക്യാമറയുമുണ്ട്. ഫോണിന്റെ ഭാരം ഏകദേശം 208 ഗ്രാം ആണ്.

വെള്ളവും പൊടിയും; റേറ്റിങ്ങിലും വ്യത്യാസം

മോട്ടോ ജി മാക്സിനും വൺപ്ലസ് നോർഡ് സിഇ 6 ലൈറ്റിനും ഐപി64 റേറ്റിങ്ങാണ് ലഭിച്ചിരിക്കുന്നത്. റിയൽമി 16എക്സ് 5ജിക്ക് ഐപി65 റേറ്റിങ്ങുണ്ട്. അതിനാൽ വെള്ളം, പൊടി എന്നിവയിൽ നിന്നുള്ള സംരക്ഷണത്തിന്റെ കാര്യത്തിലും റിയൽമി ഫോണിന് നേരിയ മുൻതൂക്കമുണ്ട്.

ഏത് ഫോൺ വാങ്ങണം?

വിലയും സവിശേഷതകളും പരിഗണിക്കുമ്പോൾ വൺപ്ലസ് നോർഡ് സിഇ 6 ലൈറ്റിന് ശക്തമായ പ്രോസസർ, കൂടുതൽ റാം, കൂടുതൽ സ്റ്റോറേജ് എന്നിവ ലഭിക്കുന്നുണ്ട്. മികച്ച പ്രകടനവും കൂടുതൽ സ്റ്റോറേജുമാണ് മുൻഗണനയെങ്കിൽ വൺപ്ലസ് പരിഗണിക്കാം. ഫോട്ടോഗ്രഫിക്കാണ് പ്രധാന പരിഗണനയെങ്കിൽ സോണി ലൈറ്റിയ 600 സെൻസറും 32 മെഗാപിക്സൽ മുൻക്യാമറയുമുള്ള മോട്ടോ ജി മാക്സ് മികച്ച ഓപ്ഷനാണ്. അതേസമയം ബാറ്ററി, ഫാസ്റ്റ് ചാർജിങ്, ബൈപാസ് ചാർജിങ് തുടങ്ങിയ സൗകര്യങ്ങൾ ഒരുമിച്ച് വേണമെങ്കിൽ റിയൽമി 16എക്സ് 5ജിയും പരിഗണിക്കാം.