വാട്‌സ്ആപ്പിൽ ആർബിഐയുടെ പേരിൽ സന്ദേശം ലഭിച്ചോ? എങ്കിൽ സൂക്ഷിക്കുക; അതൊരു കെണിയാണ്!

റിസർവ് ബാങ്ക് ഓഫ് ഇന്ത്യയുടെ (RBI) പേരിൽ വാട്‌സ്ആപ്പിലൂടെ പുതിയ തട്ടിപ്പ് വ്യാപകമാകുന്നു. അക്കൗണ്ട് മരവിപ്പിക്കുമെന്ന് ഭീഷണിപ്പെടുത്തി വ്യാജ എപികെ ഫയൽ ഡൗൺലോഡ് ചെയ്യിക്കുന്നതാണ് തട്ടിപ്പിന്റെ രീതി. ഇത്തരം സന്ദേശങ്ങൾ വിശ്വസിക്കരുതെന്നും വ്യക്തിഗത വിവരങ്ങൾ നൽകരുതെന്നും കേന്ദ്ര സർക്കാർ മുന്നറിയിപ്പ് നൽകുന്നു.

ഇന്ത്യയിൽ ഓൺലൈൻ തട്ടിപ്പുകൾ ദിനംപ്രതി വർധിച്ചുവരികയാണ്. പ്രത്യേകിച്ച് വാട്‌സ്ആപ്പ് പോലുള്ള സന്ദേശമാധ്യമങ്ങൾ ഉപയോഗിച്ച് നടക്കുന്ന ഫിഷിംഗ് ആക്രമണങ്ങൾ നിരവധി പേരെ സാമ്പത്തിക നഷ്ടത്തിലേക്ക് തള്ളിവിടുന്നുണ്ട്. ഇപ്പോൾ റിസർവ് ബാങ്ക് ഓഫ് ഇന്ത്യ (RBI)യുടെ പേരിൽ പ്രചരിക്കുന്ന പുതിയ തട്ടിപ്പിനെക്കുറിച്ച് കേന്ദ്ര സർക്കാർ മുന്നറിയിപ്പ് നൽകിയിരിക്കുകയാണ്.

സർക്കാരിന്റെ ഔദ്യോഗിക ഫാക്ട്-ചെക്ക് വിഭാഗമായ പിഐബി ഫാക്റ്റ് ചെക്ക് (PIB Fact Check) പ്രകാരം, തട്ടിപ്പുകാർ ആർബിഐയുടെ പേരിൽ വ്യാജ വാട്‌സ്ആപ്പ് സന്ദേശങ്ങൾ അയച്ച് ഉപയോക്താക്കളെ കുടുക്കുകയാണ്. ഈ സന്ദേശങ്ങളിൽ സാധാരണയായി ഒരു എപികെ ഫയൽ അറ്റാച്ച് ചെയ്തിട്ടുണ്ടാകും. അക്കൗണ്ടിൽ അസാധാരണ ഇടപാടുകൾ കണ്ടെത്തിയതായി അറിയിക്കുകയും സുരക്ഷാ കാരണങ്ങളാൽ ബാങ്ക് അക്കൗണ്ട് മരവിപ്പിക്കുകയോ നിയന്ത്രിക്കുകയോ ചെയ്യുമെന്ന് ഭീഷണിപ്പെടുത്തുകയും ചെയ്യുന്നു.

തുടർന്ന് സന്ദേശത്തിൽ നൽകിയിരിക്കുന്ന എപികെ ഫയൽ ഡൗൺലോഡ് ചെയ്യാനും ചില സന്ദർഭങ്ങളിൽ ബാങ്കിംഗ് വിവരങ്ങൾ നൽകാനും ഉപയോക്താക്കളോട് ആവശ്യപ്പെടുന്നു. എന്നാൽ ആർബിഐ ഇത്തരത്തിലുള്ള സന്ദേശങ്ങൾ വാട്‌സ്ആപ്പിലൂടെ അയയ്ക്കാറില്ല എന്നും വ്യക്തിഗത സാമ്പത്തിക വിവരങ്ങൾ ആവശ്യപ്പെടാറില്ല എന്നും പിഐബി വ്യക്തമാക്കി.

സൈബർ സുരക്ഷാ വിദഗ്ധരുടെ അഭിപ്രായത്തിൽ, ഇത്തരം തട്ടിപ്പുകളുടെ പ്രധാന ആയുധം ഭയവും അടിയന്തരതയും സൃഷ്ടിക്കുന്നതാണ്. ഉടൻ നടപടി സ്വീകരിച്ചില്ലെങ്കിൽ അക്കൗണ്ട് ബ്ലോക്ക് ചെയ്യും എന്ന തരത്തിലുള്ള മുന്നറിയിപ്പുകൾ നൽകി ആളുകളെ വേഗത്തിൽ പ്രതികരിക്കാൻ പ്രേരിപ്പിക്കുന്നു. ഉപയോക്താവ് എപികെ ഫയൽ ഇൻസ്റ്റാൾ ചെയ്താൽ, അതിലെ മാൽവെയർ ബാങ്കിംഗ് വിവരങ്ങൾ, പാസ്‌വേഡുകൾ, ഓടിപി സന്ദേശങ്ങൾ തുടങ്ങിയ സ്വകാര്യ വിവരങ്ങൾ കൈക്കലാക്കാൻ സാധ്യതയുണ്ട്.

ഇത്തരം തട്ടിപ്പുകളിൽ നിന്ന് രക്ഷപ്പെടാൻ ചില മുൻകരുതലുകൾ അനിവാര്യമാണ്. പരിചയമില്ലാത്ത ആളുകളിൽ നിന്ന് ലഭിക്കുന്ന എപികെ ഫയലുകൾ ഒരിക്കലും ഡൗൺലോഡ് ചെയ്യരുത്. വാട്‌സ്ആപ്പ്, എസ്‍എംഎസ്, ഇമെയിൽ എന്നിവ വഴി ലഭിക്കുന്ന സംശയാസ്പദമായ ലിങ്കുകളിൽ ക്ലിക്ക് ചെയ്യുന്നതും ഒഴിവാക്കണം. ബാങ്ക് അക്കൗണ്ടുമായി ബന്ധപ്പെട്ട ഏതെങ്കിലും മുന്നറിയിപ്പ് ലഭിച്ചാൽ, നേരിട്ട് ബാങ്കുമായി ബന്ധപ്പെട്ടു വിവരം സ്ഥിരീകരിക്കുന്നതാണ് ഏറ്റവും സുരക്ഷിതമായ മാർഗം.

കൂടാതെ, മൊബൈൽ ഫോണിന്റെയും ആപ്പുകളുടെയും സോഫ്റ്റ്‌വെയർ പതിവായി അപ്‌ഡേറ്റ് ചെയ്യണം. ഇത്തരത്തിലുള്ള സന്ദേശങ്ങൾ ലഭിച്ചാൽ ഉടൻ തന്നെ അയച്ചയാളെ ബ്ലോക്ക് ചെയ്ത് സന്ദേശം ഡിലീറ്റ് ചെയ്യുകയും, കുടുംബാംഗങ്ങളെയും സുഹൃത്തുക്കളെയും ഇതുസംബന്ധിച്ച് ജാഗ്രതപ്പെടുത്തുകയും വേണം.