റെഡ്‍മി നോട്ട് 17 ഇന്ത്യയിൽ; ലോഞ്ചിന് മുമ്പേ നിർണായക സൂചന

ഷവോമിയുടെ ഉപബ്രാൻഡായ റെഡ്‍മി, നോട്ട് 17 സ്മാർട്ട്ഫോൺ പരമ്പര ചൈനയിൽ അവതരിപ്പിക്കാൻ ഒരുങ്ങുകയാണ്. ഇതിനിടെ, ബ്യൂറോ ഓഫ് ഇന്ത്യൻ സ്റ്റാൻഡേർഡ്സ് (ബിഐഎസ്) ഡാറ്റാബേസിൽ റെഡ്‍മി നോട്ട് 17, പോക്കോ എം8 പ്ലസ് എന്നീ മോഡലുകൾ കണ്ടെത്തിയത് ഇന്ത്യയിലെ ലോഞ്ച് ഉടനുണ്ടാകുമെന്ന സൂചന നൽകുന്നു.  

ഷവോമിയുടെ സബ് ബ്രാൻഡായ റെഡ്‍മി ഈ മാസം ചൈനയിൽ റെഡ്‍മി നോട്ട് 17 സ്‍മാർട്ട്ഫോൺ സീരീസ് അവതരിപ്പിക്കാൻ ഒരുങ്ങുകയാണ്. ഇതിനിടെ, ഇന്ത്യയിലെ ലോഞ്ചിനെക്കുറിച്ചും സൂചനകൾ പുറത്തുവന്നു. ബ്യൂറോ ഓഫ് ഇന്ത്യൻ സ്റ്റാൻഡേർഡ്‍സ് (ബിഐഎസ്) സർട്ടിഫിക്കേഷൻ ഡാറ്റാബേസിൽ റെഡ്‍മി നോട്ട് 17-ന്റെയും പോക്കോ എം8 പ്ലസ്-ന്റെയും ആണെന്ന് കരുതുന്ന രണ്ട് മോഡൽ നമ്പറുകൾ കണ്ടെത്തി എന്നാണ് പുതിയ റിപ്പോർട്ടുകൾ. സർട്ടിഫിക്കേഷൻ ലഭിച്ചതോടെ ഈ ഫോണുകൾ ഉടൻ ഇന്ത്യൻ വിപണിയിൽ എത്തുമെന്ന പ്രതീക്ഷകൾ ശക്തമായിരിക്കുകയാണ്.

രണ്ട് മോഡൽ നമ്പറുകൾ ശ്രദ്ധയിൽ

റിപ്പോർട്ട് പ്രകാരം 2607ഡിആർഎ18ഐ എന്ന മോഡൽ നമ്പർ റെഡ്‍മി നോട്ട് 17-നെയും 2607ഡിപിസി18ഐ എന്ന മോഡൽ നമ്പർ പോക്കോ എം8 പ്ലസിനെയും സൂചിപ്പിക്കുന്നതാണ്. വ്യത്യസ്‍ത വിപണികളിൽ ഒരേ ഹാർഡ്‌വെയറുമായി റെഡ്‍മി, പോക്കോ ബ്രാൻഡുകളിൽ ഈ ഫോണുകൾ അവതരിപ്പിക്കുമെന്നാണ് സൂചന. എന്നാൽ സർട്ടിഫിക്കേഷൻ പട്ടികയിൽ ഫോണുകളുടെ സാങ്കേതിക സവിശേഷതകളെക്കുറിച്ചുള്ള വിവരങ്ങളൊന്നും നൽകിയിട്ടില്ല.

ഈ മാസം ചൈനയിൽ ലോഞ്ച്

റെഡ്‍മി നോട്ട് 17 സീരീസ് ഈ മാസം ചൈനയിൽ അവതരിപ്പിക്കുമെന്ന് കമ്പനി ഔദ്യോഗികമായി സ്ഥിരീകരിച്ചിട്ടുണ്ട്. റെഡ്‍മി നോട്ട് 17-നൊപ്പം റെഡ്‍മി നോട്ട് 17 പ്രോ, റെഡ്‍മി നോട്ട് 17 പ്രോ മാക്സ് എന്നീ മോഡലുകളും അവതരിപ്പിക്കും എന്നാണ് റിപ്പോർട്ടുകൾ.

റെഡ്‍മി നോട്ട് 15-ന്റെ പിൻഗാമി

ഈ വർഷം ജനുവരിയിൽ ഇന്ത്യയിൽ അവതരിപ്പിച്ച റെഡ്‍മി നോട്ട് 15-ന്റെ പിൻഗാമിയായാണ് പുതിയ മോഡൽ എത്തുക. 22,999 രൂപ പ്രാരംഭ വിലയിൽ എത്തിയ റെഡ്‍മി നോട്ട് 15-ൽ 120 ഹെർട്‍സ് റിഫ്രഷ് റേറ്റുള്ള 6.77 ഇഞ്ച് അമോലെഡ് ഡിസ്പ്ലേയും സ്‌നാപ്ഡ്രാഗൺ 6 ജനറേഷൻ 3 പ്രോസസറുമാണ് നൽകിയിരുന്നത്.

മികച്ച ക്യാമറയും വേഗത്തിലുള്ള ചാർജിങ്ങും

റെഡ്‍മി നോട്ട് 15-ൽ 108 മെഗാപിക്സൽ പ്രധാന ക്യാമറയും 8 മെഗാപിക്സൽ അൾട്രാ വൈഡ് ആംഗിൾ ക്യാമറയും ഉൾപ്പെടുന്ന ഇരട്ട പിൻ ക്യാമറ സംവിധാനമാണുള്ളത്. 20 മെഗാപിക്സൽ സെൽഫി ക്യാമറ, പൊടിയും വെള്ളവും പ്രതിരോധിക്കുന്ന ഐപി66 നിലവാരത്തിലുള്ള സംരക്ഷണം, 5,520 എംഎഎഎച്ച് ബാറ്ററി, 45 വാട്ട് ഫാസ്റ്റ് ചാർജിങ്, 18 വാട്ട് റിവേഴ്‌സ് ചാർജിങ് എന്നിവയും ഫോണിന്റെ പ്രധാന സവിശേഷതകളാണ്. റെഡ്മി നോട്ട് 17-ൽ ഇതിലും മികച്ച സവിശേഷതകൾ ഉൾപ്പെടുമെന്നാണ് പ്രതീക്ഷിക്കുന്നത്.