8,000mAh ബാറ്ററിയും പുതിയ ഡിസൈനും; ടെക്നോ പോവ 8 ജൂൺ 11ന് ഇന്ത്യയിൽ എത്തും

ടെക്നോ പോവ 8 സ്മാർട്ട്ഫോൺ ജൂൺ 11ന് ഇന്ത്യയിൽ അവതരിപ്പിക്കുമെന്ന് കമ്പനി സ്ഥിരീകരിച്ചു. 8,000mAh ബാറ്ററിയും നത്തിംഗ് ഫോണുകൾക്ക് സമാനമായ പിൻഭാഗത്തെ ലൈറ്റിംഗ് സംവിധാനവുമാണ് ഫോണിന്റെ പ്രധാന ആകർഷണങ്ങൾ. ഫ്ലിപ്കാർട്ട് വഴി വിൽപ്പനയ്‌ക്കെത്തുന്ന ഫോണിന് മീഡിയടെക് ഡൈമെൻസിറ്റി 7100 പ്രോസസർ ആയിരിക്കുമെന്നും സൂചനയുണ്ട്.

രാജ്യത്തെ സ്‍മാർട്ട്ഫോൺ പ്രേമികൾ ആകാംക്ഷയോടെ കാത്തിരിക്കുന്ന ടെക്നോ പോവ 8 (Tecno Pova 8) ഇന്ത്യയിൽ ജൂൺ 11ന് അവതരിപ്പിക്കുമെന്ന് കമ്പനി ഔദ്യോഗികമായി പ്രഖ്യാപിച്ചു. ജൂൺ 11ന് ഉച്ചയ്ക്ക് 12 മണിക്ക് നടക്കുന്ന ലോഞ്ച് പരിപാടിയിലൂടെയാണ് പുതിയ സ്മാർട്ട്ഫോൺ അവതരിപ്പിക്കുക. ഫ്ലിപ്‍കാർട്ടിലൂടെ ഈ ഫോൺ ഇന്ത്യയിൽ വിൽപ്പനയ്‌ക്കെത്തുമെന്നും കമ്പനി പുറത്തുവിട്ട ടീസറുകൾ സൂചിപ്പിക്കുന്നു.

ടെക്നോ പോവ 8ന്റെ പ്രധാന ആകർഷണങ്ങളിൽ ഒന്നായി 8,000mAh ശേഷിയുള്ള വമ്പൻ ബാറ്ററിയാണ് കമ്പനി സ്ഥിരീകരിച്ചിരിക്കുന്നത്. ദീർഘനേരം ബാറ്ററി ബാക്കപ്പ് നൽകുന്ന ഫോണുകളെ ഇഷ്ടപ്പെടുന്ന ഉപയോക്താക്കളെ ലക്ഷ്യമിട്ടാണ് ഈ നീക്കം. ഗ്രീൻ, സിൽവർ നിറങ്ങളിലുമായാണ് ഫോൺ വിപണിയിലെത്തുക എന്നാണ് റിപ്പോർട്ടുകൾ.

ഡിസൈനിന്റെ കാര്യത്തിൽ ടെക്നോ പോവ 7ന്റെ പിൻക്യാമറ ലേഔട്ടിനോട് സാമ്യമുള്ള രൂപകൽപ്പനയാണ് പോവ 8 നിലനിർത്തുന്നത്. എന്നാൽ പുതിയ മോഡലിൽ ക്യാമറ മൊഡ്യൂളിനുള്ളിൽ മാട്രിക്‌സ് ശൈലിയിലുള്ള ഡോട്ടഡ് ലൈറ്റിംഗ് സംവിധാനവും ഉൾപ്പെടുത്തിയിട്ടുണ്ട്. നത്തിംഗ് ഫോണുകളിലെ ഗ്ലിഫ് മാട്രിക്‌സ് സംവിധാനത്തോട് സാമ്യമുള്ള ഈ ഫീച്ചർ നോട്ടിഫിക്കേഷനുകളും മറ്റ് പ്രധാന വിവരങ്ങളും സ്‌ക്രീൻ ഓൺ ചെയ്യാതെ തന്നെ കാണാൻ സഹായിക്കും എന്നാണ് റിപ്പോർട്ടുകൾ.

അടുത്തിടെ ഗീക്ബെഞ്ച് ബെഞ്ച്മാർക്കിംഗ് പ്ലാറ്റ്ഫോമിൽ ഒരു ടെക്നോ ഡിവൈസ് പ്രത്യക്ഷപ്പെട്ടതായി റിപ്പോർട്ട് ചെയ്യപ്പെട്ടിരുന്നു. ഇത് ടെക്നോ പോവ 8 ആണെന്നാണ് വിലയിരുത്തൽ. മീഡിയടെക് ഡൈമെൻസിറ്റി 7100 പ്രോസസറും 6GB റാമും ആൻഡ്രോയിഡ് 16 ഓപ്പറേറ്റിങ് സിസ്റ്റവും ഈ ഫോണിൽ ഉണ്ടായിരിക്കുമെന്നാണ് റിപ്പോർട്ടുകൾ.

ഇതിനൊപ്പം, യുഎസ് ഫെഡറൽ കമ്മ്യൂണിക്കേഷൻസ് കമ്മീഷൻ (FCC) സർട്ടിഫിക്കേഷൻ ഡാറ്റാബേസിലും ടെക്നോ പോവ 8 പ്രത്യക്ഷപ്പെട്ടതായി റിപ്പോർട്ടുകളുണ്ട്. 45W വയർഡ് ഫാസ്റ്റ് ചാർജിങ് സപ്പോർട്ടോടെയായിരിക്കും ഫോൺ എത്തുക. 3G, 4G, 5G നെറ്റ്‌വർക്ക് പിന്തുണയ്‌ക്കൊപ്പം ബ്ലൂടൂത്ത്, വൈ-ഫൈ, ജിപിഎസ്, എൻഎഫ്‌സി കണക്റ്റിവിറ്റികളും ഫോണിൽ ലഭ്യമാകുമെന്നാണ് സൂചന. എന്നാൽ എൻഎഫ്‌സി ഫീച്ചർ എല്ലാ വിപണികളിലും ലഭ്യമാകണമെന്നില്ല.

സ്റ്റോറേജ് വിഭാഗത്തിൽ 6GB + 128GB, 8GB + 128GB, 8GB + 256GB എന്നീ മൂന്ന് വേരിയന്റുകളിൽ ഫോൺ അവതരിപ്പിക്കപ്പെടും എന്നാണ് ചോർന്ന വിവരങ്ങൾ നൽകുന്ന സൂചനകൾ. ഔദ്യോഗിക ലോഞ്ചോടെ വിലയും മറ്റ് സവിശേഷതകളും വ്യക്തമാകും.