വിവോ ഫോണുകൾക്ക് വില കുതിച്ചുയർന്നു

വിവോയുടെ വി70, വൈ-സീരീസ് ഉൾപ്പെടെ നിരവധി സ്മാർട്ട്ഫോൺ മോഡലുകൾക്ക് 4,000 രൂപ വരെ വില വർധിച്ചു. ആഗോള ചിപ്പ് ക്ഷാമവും ഉൽപ്പാദന ചെലവിലെ വർധനവുമാണ് ഇതിന് കാരണമെന്ന് സൂചനയുണ്ടെങ്കിലും കമ്പനി ഔദ്യോഗികമായി പ്രതികരിച്ചിട്ടില്ല. പുതിയ വിലകൾ കമ്പനിയുടെ വെബ്സൈറ്റിൽ നിലവിൽ വന്നതായി റിപ്പോർട്ടുകൾ പറയുന്നു.

രാജ്യത്തെ സ്‍മാർട്ട്ഫോൺ വിപണിയിൽ വിലവർധനയുടെ പ്രവണത തുടരുന്നതിനിടെ വിവോയുടെ നിരവധി മോഡലുകൾക്കും പുതിയ വിലനിരക്കുകൾ നിലവിൽ വന്നതായി റിപ്പോർട്ടുകൾ. ഫ്ലാഗ്ഷിപ്പ് ശ്രേണിയിലെ വി70, വി70 എലൈറ്റ് സ്‍മാർട്ട്ഫോണുകൾക്കൊപ്പം വൈ-സീരീസിലെ ചില മോഡലുകൾക്കും വില ഉയർന്നതായാണ് വിവരം. വിവിധ മോഡലുകൾക്ക് 1,000 രൂപ മുതൽ 4,000 രൂപ വരെ വർധനവ് ഉണ്ടായിട്ടുണ്ടെന്നാണ് റിപ്പോർട്ടുകൾ സൂചിപ്പിക്കുന്നത്.

ടിപ്പ്സ്റ്റർ സഞ്ജു ചൗധരി സാമൂഹിക മാധ്യമ പ്ലാറ്റ്ഫോമായ എക്‌സിലൂടെ പങ്കുവെച്ച വിവരങ്ങൾ പ്രകാരം, വിവോ വി70 എലൈറ്റിന്റെ 8 ജിബി റാം + 256 ജിബി സ്റ്റോറേജ് പതിപ്പിന്റെ വില 54,999 രൂപയിൽ നിന്ന് 58,999 രൂപയായി ഉയർന്നു. അതേസമയം 12 ജിബി റാം + 256 ജിബി സ്റ്റോറേജ് പതിപ്പിന്റെ വില 59,999 രൂപയിൽ നിന്ന് 63,999 രൂപയായി വർധിച്ചു. ഇരു മോഡലുകൾക്കും 4,000 രൂപയുടെ വർധനവാണ് രേഖപ്പെടുത്തിയിരിക്കുന്നത്. സാധാരണ വി70 മോഡലിനും സമാനമായ വിലവർധന ബാധകമായിട്ടുണ്ട്. 8 ജിബി + 256 ജിബി പതിപ്പിന്റെ വില 49,999 രൂപയിൽ നിന്ന് 53,999 രൂപയായി ഉയർന്നപ്പോൾ, 12 ജിബി + 256 ജിബി പതിപ്പിന്റെ വില 53,999 രൂപയിൽ നിന്ന് 56,999 രൂപയായി വർധിച്ചു.

ഇടത്തരം വില വിഭാഗത്തിൽ ഉൾപ്പെടുന്ന വൈ-സീരീസ് ഫോണുകളിലും പുതിയ നിരക്കുകൾ പ്രാബല്യത്തിൽ വന്നിട്ടുണ്ട്. വിവോ വൈ21യുടെ 6 ജിബി + 128 ജിബി പതിപ്പിന്റെ വില 20,999 രൂപയിൽ നിന്ന് 21,999 രൂപയായി ഉയർന്നു. ഇതോടെ ഈ മോഡലിന് 1,000 രൂപയുടെ വർധനവാണ് ഉണ്ടായിരിക്കുന്നത്. വിവോ വൈ400 മോഡലിനും ശ്രദ്ധേയമായ വിലവർധനയാണ് റിപ്പോർട്ട് ചെയ്യപ്പെട്ടിരിക്കുന്നത്. 8 ജിബി + 128 ജിബി പതിപ്പിന്റെ വില 28,999 രൂപയിൽ നിന്ന് 31,999 രൂപയായപ്പോൾ, 8 ജിബി + 256 ജിബി പതിപ്പിന്റെ വില 31,999 രൂപയിൽ നിന്ന് 34,999 രൂപയായി ഉയർന്നു. കമ്പനിയുടെ നിലവിലെ നിരക്കുമാറ്റങ്ങളിൽ ഏറ്റവും വലിയ വർധനവുകളിൽ ഒന്നായി ഇതിനെ വിലയിരുത്തുന്നു.

അടുത്ത മാസങ്ങളിലായി വിവിധ സ്മാർട്ട്ഫോൺ നിർമ്മാതാക്കൾ വില വർധിപ്പിച്ച സാഹചര്യത്തിലാണ് വിവോയും പുതിയ നിരക്കുകൾ നടപ്പാക്കിയതെന്നാണ് വിലയിരുത്തൽ. ആർട്ടിഫിഷ്യൽ ഇന്റലിജൻസ് അടിസ്ഥാനമാക്കിയ ഡാറ്റാ സെന്ററുകളിലേക്കുള്ള ഉയർന്ന ആവശ്യകതയെ തുടർന്ന് മെമ്മറി ചിപ്പുകളുടെ ആഗോള ക്ഷാമവും ഉൽപ്പാദന ചെലവിലെ വർധനവും ഈ മാറ്റങ്ങൾക്ക് കാരണമായിരിക്കാമെന്നാണ് വിപണി നിരീക്ഷകരുടെ അഭിപ്രായം.

അതേസമയം, വിലവർധന സംബന്ധിച്ച് വിവോ ഔദ്യോഗിക വിശദീകരണം നൽകിയിട്ടില്ല. എങ്കിലും പുതിയ വിലകൾ കമ്പനിയുടെ ഔദ്യോഗിക വെബ്സൈറ്റിൽ പ്രത്യക്ഷപ്പെട്ടതായി റിപ്പോർട്ടുകൾ പറയുന്നു. വിഷയത്തിൽ കമ്പനിയുടെ പ്രതികരണത്തിനായി ടെക്ക് ലോകം കാത്തിരിക്കുകയാണ്.