കൊവിഡ് 19 ലോക്ക് ഡൗണ്; പലായനങ്ങളില് മരിച്ചുവീഴുന്നവര്...
First Published Mar 30, 2020, 10:10 AM ISTഓരോ രാജ്യത്തിന്റെയും ദൈനംദിന പ്രവര്ത്തികളെ ചാക്രികമായി നിലനിര്ത്തുന്നത്, സാമൂഹീകമായി തൊഴില് വിഭജനത്തില് ഏറ്റവും താഴേക്കടിയില് നില്ക്കുന്ന തൊഴിലാളി വിഭാഗമാണ്. അതുകൊണ്ട് തന്നെ പെട്ടെന്നൊരു ദിവസം രാജ്യത്ത് ലോക്ക് ഡൗണ് പ്രഖ്യാപിക്കുമ്പോള് തൊഴിലാളി വര്ഗ്ഗത്തിന്റെ ആശങ്കകളെ ഇല്ലാതാക്കേണ്ടത് ഭരണകൂടത്തിന്റെ ഉത്തരവാദിത്വമായി തീരുന്നു. പ്രത്യേകിച്ച്, സ്വന്തം അവകാശം സ്ഥാപിച്ചെടുക്കാന്, തങ്ങളാല് തെരഞ്ഞെടുക്കപ്പെട്ട് അധികാരത്തിലേറിയവര്ക്ക് മുന്നില് നൂറ്ക്കണക്കിന് കിലോമീറ്ററുകള് ലോങ്ങ് മാര്ച്ച് നടത്തേണ്ടിവരുന്ന, കര്ഷകരും തൊഴിലാളികളുമടങ്ങിയ ഇന്ത്യയെ പോലൊരു രാജ്യത്ത്.
എന്നാല്, ലോക്ക് ഡൌണ്പ്രഖ്യാപിക്കവേ തൊഴിലാളികളെ എങ്ങനെ അവരവരുടെ താമസസ്ഥങ്ങളില് തന്നെ നിലനിര്ത്താമെന്നതിനെ കുറിച്ച് ഉത്തരവാദിത്വപ്പെട്ടവര്ക്ക് യാതൊരു ധാരണയും ഉണ്ടായിരുന്നില്ലെന്ന് വേണം കരുതാന്. ലോക്ക് ഡൌണ് പ്രഖ്യാപനത്തിന് പുറകെ ജനങ്ങളുടെ ആശങ്കതീര്ക്കേണ്ടതും ഭരണകൂടത്തിന്റെ കടമയാണ്. എന്നാല് ഇവിടെ ജനം തെരുവിലിറങ്ങി നടക്കാന് തുടങ്ങിയതിന്റെ മൂന്നാം ദിനമാണ് സര്ക്കാര് ഇടപെടുന്നത്. മഹാമാരിയുടെ കാലത്ത് ഇത് ഗുരുതരമായ കൃത്യവിലോപം തന്നെയാണ്.
ഏഷ്യാനെറ്റ് ന്യൂസ് ക്യാമറാമാന് അരുണ് എസ് നായര് പകര്ത്തിയ, ദില്ലിയിലെ വാടകവീടുകളില് നിന്ന് തങ്ങളുടെ ഗ്രാമങ്ങളിലേക്ക് പോകാനായെത്തിയ ഇതരസംസ്ഥാനത്തൊഴിലാളികളുടെ ചിത്രങ്ങള് കാണാം.