വൺഡേ ട്രിപ്പ്; ഇതാ ഗഡിയേ മ്മടെ തൃശൂര്...

കേരളത്തിന്റെ പല ജില്ലകളിലും കാണാൻ കാഴ്ചകളേറെയാണ്. അത്തരത്തിൽ വ്യത്യസ്തമായ കാഴ്ചകൾ കാണണമെങ്കിൽ തൃശൂർ ജില്ലയിലേയ്ക്ക് പോകാം. സാംസ്കാരികപരമായും പ്രകൃതിഭംഗിയാലും സമ്പന്നമായ തൃശൂരിൽ കാണേണ്ട കാഴ്ചകൾ എന്തൊക്കെയാണെന്ന് നോക്കാം.

അതിരപ്പിള്ളി

അതിരപ്പിള്ളി പഞ്ചായത്തിൽ സ്ഥിതി ചെയ്യുന്ന അതിമനോഹരമായ ഒരു വെള്ളച്ചാട്ടമാണിത്. ഇന്ത്യയുടെ നയാഗ്ര എന്നാണ് അതിരപ്പിള്ളി അറിയപ്പെടുന്നത്. പച്ചപുതച്ച കാടിനുള്ളിൽ നിന്ന് ചിന്നിച്ചിതറി താഴേയ്ക്ക് പതിക്കുന്ന വെള്ളച്ചാട്ടത്തിന്റെ കാഴ്ച ആരുടെയും മനംമയക്കും.

ഔവർ ലേഡി ഓഫ് ഡോളേഴ്സ്

ഇന്ത്യയിലെ ഏറ്റവും വലിയ പള്ളികളിലൊന്നായാണ് ഔവർ ലേഡി ഓഫ് ഡോളേഴ്സ് അറിയപ്പെടുന്നത്. 25,000 ചതുരശ്ര അടി വിസ്തീർണവും 261 അടി ഉയരവും ഇതിനുണ്ട്. ക്രിസ്തുവിന്റെ ജീവിതത്തിലെ വിവിധ ഘട്ടങ്ങൾ ചിത്രീകരിക്കുന്ന ചുവർ ചിത്രങ്ങളോട് കൂടിയ ബൈബിൾ ടവർ ഇവിടുത്തെ പ്രധാന സവിശേഷതയാണ്.

പുന്നത്തൂർ കോട്ട

ഗുരുവായൂർ ക്ഷേത്രത്തിൽ നിന്ന് 2 കി.മീ അകലെ സ്ഥിതി ചെയ്യുന്ന ഒരു ആനത്താവളമാണ് പുന്നത്തൂർ കോട്ട. ആനക്കോട്ട എന്നും ഇവിടം അറിയപ്പെടുന്നു. വിനോദസഞ്ചാരികൾക്കും തീർത്ഥാടകർക്കും ഒരുപോലെ ആസ്വദിക്കാൻ സാധിക്കുന്ന അന്തരീക്ഷമാണ് ഇവിടെയുള്ളത്. 50ൽ കൂടുതൽ ആനകൾ പുന്നത്തൂർ കോട്ടയിലുണ്ട്. 

ശക്തൻ തമ്പുരാൻ കൊട്ടാരം

തൃശൂരിലെ ചരിത്ര സ്മാരകങ്ങളിലൊന്നാണ് ശക്തൻ തമ്പുരാൻ കൊട്ടാരം. കേരള-ഡച്ച് വാസ്തുവിദ്യയിൽ പണി കഴിപ്പിച്ച ഈ കൊട്ടാരം പ്രശസ്തമായ വടക്കുംനാഥ ക്ഷേത്രത്തിന് സമീപമാണ് സ്ഥിതി ചെയ്യുന്നത്. ഇവിടെയൊരു പുരാവസ്തു മ്യൂസിയം ഗ്യാലറിയുണ്ട്. അക്കാലത്തെ പുരാതന വസ്തുക്കൾ കൊട്ടാരത്തിൽ പ്രദർശിപ്പിച്ചിട്ടുണ്ട്. ശാന്തമായ അന്തരീക്ഷം ആഗ്രഹിക്കുന്നവർക്കും ചരിത്രാന്വേഷികൾക്കും ഇവിടം ഒരുപോലെ ആസ്വദിക്കാൻ സാധിക്കും.

വടക്കുംനാഥ ക്ഷേത്രം

തൃശൂരിന്റെ നഗരമധ്യത്തിലുള്ള തേക്കിൻകാട് മൈതാനത്താണ് ദക്ഷിണ കൈലാസം എന്നറിയപ്പെടുന്ന വടക്കുംനാഥ ക്ഷേത്രം സ്ഥിതി ചെയ്യുന്നത്. പരശുരാമനാണ് ഇവിടെ പ്രതിഷ്ഠ നടത്തിയതെന്ന് വിശ്വസിക്കപ്പെടുന്നു. തനതായ വാസ്തുവിദ്യ, അതിശയിപ്പിക്കുന്ന ചുവർ ചിത്രങ്ങൾ എന്നിവ കേരളത്തിന്റെ സംസ്കാരവും പൈതൃകവും എടുത്തുകാണിക്കുന്നു. പൂരങ്ങളുടെ പൂരമായ തൃശൂർ പൂരം വടക്കുംനാഥ സന്നിധിയിലാണ് നടക്കുന്നത്.

ചാവക്കാട് ബീച്ച്

സമാധാനപരമായി ഒരു ബീച്ച് എക്സ്പ്ലോർ ചെയ്യാൻ ആഗ്രഹിക്കുന്നവർക്ക് അനുയോജ്യമായ ഇടമാണ് ചാവക്കാട് ബീച്ച്. നദി കടലുമായി ചേരുന്ന അഴിമുഖമാണ് ഇവിടുത്തെ പ്രധാന ആകർഷണം. ഫോട്ടോഗ്രാഫർമാർക്കും സൺസെറ്റ് പ്രേമികൾക്കുമെല്ലാം ഇവിടം മികച്ച ഓപ്ഷനാണ്.