കുട്ടികളിലെ ക്യാൻസറിന്റെ പ്രാരംഭ ലക്ഷണങ്ങൾ നേരത്തെ തിരിച്ചറിയാം

എച്ച്.ഐ.വി, എപ്‌സ്റ്റീൻ-ബാർ വൈറസ്, മലേറിയ തുടങ്ങിയ ചില ദീർഘകാല അണുബാധകൾ കുട്ടികളിലെ ക്യാൻസർ സാധ്യത വർദ്ധിപ്പിക്കുന്ന ഘടകങ്ങളാണ്. കുറഞ്ഞ, ഇടത്തരം വരുമാനമുള്ള രാജ്യങ്ങളിൽ ഇവയ്ക്ക് പ്രത്യേക പ്രാധാന്യമുണ്ട്. മറ്റ് ചില അണുബാധകൾ മുതിർന്നവരിൽ ക്യാൻസർ വരാനുള്ള സാധ്യതയും വർദ്ധിപ്പിച്ചേക്കാം.

ഇന്ത്യയിലെ ആകെ ക്യാൻസർ കേസുകളിൽ ഏകദേശം 4 ശതമാനവും കുട്ടികളിലെ ക്യാൻസറാണ്. പ്രതിവർഷം 52,000-ത്തോളം കുട്ടികൾക്ക് ഇവിടെ രോഗം സ്ഥിരീകരിക്കപ്പെടുന്നു. ആഗോളതലത്തിൽ 0 മുതൽ 14 വരെ പ്രായമുള്ള കുട്ടികളിൽ പ്രതിവർഷം ഏകദേശം 4,00,000 കേസുകളും റിപ്പോർട്ട് ചെയ്യപ്പെടുന്നുണ്ട്. യുകെയിൽ താരതമ്യേന അപൂർവ്വമാണെങ്കിലും 15 വയസ്സിൽ താഴെയുള്ള കുട്ടികളിൽ രോഗം മൂലമുണ്ടാകുന്ന മരണങ്ങളുടെ പ്രധാന കാരണങ്ങളിലൊന്നായി ബാല്യകാല ക്യാൻസർ തുടരുന്നു.

പ്രതിവർഷം 0 മുതൽ 14 വരെ പ്രായമുള്ള ഏകദേശം 1,900 കുട്ടികൾക്ക് ക്യാൻസർ സ്ഥിരീകരിക്കപ്പെടുന്നുണ്ടെന്ന് ക്യാൻസർ റിസർച്ച് യുകെ വ്യക്തമാക്കുന്നു. ഈ രോഗത്തിന്റെ പ്രാരംഭ ലക്ഷണങ്ങൾ സാധാരണ അസുഖങ്ങളുടേതിന് സമാനമായേക്കാമെന്നതിനാൽ അവ പലപ്പോഴും അവഗണിക്കപ്പെടാൻ സാധ്യതയുണ്ട്.

എച്ച്.ഐ.വി, എപ്‌സ്റ്റീൻ-ബാർ വൈറസ്, മലേറിയ തുടങ്ങിയ ചില ദീർഘകാല അണുബാധകൾ കുട്ടികളിലെ ക്യാൻസർ സാധ്യത വർദ്ധിപ്പിക്കുന്ന ഘടകങ്ങളാണ്. കുറഞ്ഞ, ഇടത്തരം വരുമാനമുള്ള രാജ്യങ്ങളിൽ ഇവയ്ക്ക് പ്രത്യേക പ്രാധാന്യമുണ്ട്. മറ്റ് ചില അണുബാധകൾ മുതിർന്നവരിൽ ക്യാൻസർ വരാനുള്ള സാധ്യതയും വർദ്ധിപ്പിച്ചേക്കാം.

ഹെപ്പറ്റൈറ്റിസ് ബി (കരൾ ക്യാൻസർ തടയാൻ), ഹ്യൂമൻ പാപ്പിലോമ വൈറസ് (ഗർഭാശയമുഖ ക്യാൻസർ തടയാൻ) എന്നിവയ്‌ക്കെതിരായ വാക്സിനേഷൻ എടുക്കുന്നതും ക്യാൻസറിന് കാരണമായേക്കാവുന്ന ദീർഘകാല അണുബാധകൾ നേരത്തേ കണ്ടെത്തി ചികിത്സിക്കുന്നതുപോലുള്ള നടപടികൾ സ്വീകരിക്കുന്നതും പ്രധാനമാണ്.

കുട്ടികളിലെ ക്യാൻസറിന്റെ പ്രാരംഭ ലക്ഷണങ്ങൾ എന്തെല്ലാമെന്ന് നോക്കാം.

കാരണമില്ലാതെയുള്ള ശരീരഭാരം കുറയൽ അല്ലെങ്കിൽ വിശപ്പില്ലായ്മയാണ് ആ​​ദ്യത്തെ ലക്ഷണം. സാധാരണ ചികിത്സകളോ ആന്റിബയോട്ടിക്കുകളോ ഫലിക്കാത്ത, ദീർഘകാലം നീണ്ടുനിൽക്കുന്നതോ ഇടയ്ക്കിടെ ആവർത്തിക്കുന്നതോ ആയ പനി.

വിശ്രമിച്ചിട്ടും മാറാത്ത നിരന്തരമായ ക്ഷീണം, ഊർജ്ജക്കുറവ് അല്ലെങ്കിൽ ചർമ്മത്തിന് ഉണ്ടാകുന്ന അസാധാരണമായ വിളർച്ചയാണ് മറ്റൊരു ലക്ഷണം. ഇടയ്ക്കിടെയുള്ള മൂക്കിൽ നിന്നുള്ള രക്തസ്രാവം, മോണയിൽ നിന്നുള്ള രക്തസ്രാവം, അല്ലെങ്കിൽ കാരണം വ്യക്തമല്ലാത്ത ചതവുകളും ചർമ്മത്തിൽ കാണപ്പെടുന്ന ചെറിയ ചുവന്നതോ വയലറ്റ് നിറത്തിലുള്ളതോ ആയ പാടുകളും പ്രധാനപ്പെട്ട ലക്ഷണമാണ്.

വേദനയില്ലാത്തതും എന്നാൽ വലുതാകുന്നതോ മാറാതെ നിൽക്കുന്നതോ ആയ മുഴകളോ വീക്കമോ; പ്രത്യേകിച്ച് കഴുത്ത്, നെഞ്ച്, കക്ഷം, വയർ അല്ലെങ്കിൽ തുടയിടുക്ക് എന്നിവിടങ്ങളിൽ. അസ്ഥി, സന്ധി, നടുവ് അല്ലെങ്കിൽ കൈകാലുകൾ എന്നിവിടങ്ങളിലുണ്ടാകുന്ന വിട്ടുമാറാത്ത വേദനയാണ് മറ്റൊന്ന്.