പനിയും ശ്വാസതടസവും, 10 വയസുകാരി ആശുപത്രിയിൽ; വാവറ അമ്പലം സ്വദേശിനിയെ രക്ഷിച്ചത് എസ്എടിയിലെ എക്മോ ചികിത്സ!
Synopsis
സര്ക്കാര് മേഖലയിലെ ശിശുരോഗ വിഭാഗത്തില് ശ്വാസകോശ സംബന്ധമായ അസുഖത്തിന് എക്മോ വിജയകരമാകുന്നത് ഇതാദ്യം ചിത്രം പ്രതീകാത്മകം
തിരുവനന്തപുരം:ഒക്ടോബര് 13നാണ് തിരുവനന്തപുരം വാവറ അമ്പലം സ്വദേശിയായ 10 വയസുകാരിയെ പനിയും ശ്വാസതടസവും കാരണമാണ് എസ്എടി ആശുപത്രിയിലെത്തിച്ചത്. പിന്നാലെ കുട്ടിയെ അഡ്മിറ്റ് ചെയ്തു. ശരീരത്തില് ഓക്സിജന്റെ അളവ് കുറവായതിനാല് ശ്വസിക്കാന് ബുദ്ധിമുട്ടുന്ന കുഞ്ഞിനെ വെന്റിലേറ്റര് സപ്പോര്ട്ട് നല്കി തുടര്ചികിത്സ ആരംഭിച്ചു. ഒടുവിൽ എക്മോ ചികിത്സയിലൂടെ അവളെ തിരികെ ജീവിതത്തിലേക്ക് കൈപിടിച്ച് കയറ്റി.
പറഞ്ഞതുപോലെ അത്ര എളുപ്പമായിരുന്നില്ല കാര്യങ്ങൾ, വെന്റിലേറ്ററിന്റെ സഹായം നല്കിയിട്ടും കുട്ടിയുടെ ശ്വാസകോശത്തിന് 65ശതമാനം ഓക്സിജനേ തലച്ചോറിലേക്കും മറ്റ് അവയവങ്ങളിലേയ്ക്കും എത്തിക്കാന് കഴിയുമായിരുന്നുള്ളൂ. അടുത്ത ഏതാനം മണിക്കൂറിനുള്ളില് കുട്ടിയുടെ മറ്റ് ശരീരാവയവങ്ങളുടെ പ്രവര്ത്തനങ്ങളും തകരാറിലാകാന് തുടങ്ങി. ഈ ഘട്ടത്തില് കൂട്ടിയുടെ ജീവന് രക്ഷിക്കാന് ചികിത്സിക്കുന്ന ഡോക്ടര്മാര്ക്ക് എക്മോ മാത്രമായിരുന്നു മുന്നിലുള്ള മാര്ഗം. എക്മോ ചികിത്സയില് ശരീരത്തില് നിന്ന് രക്തം പുറത്തെടുക്കുകയും ശരീരത്തിന് പുറത്ത് ഓക്സിജന് നല്കുകയും ശരീരത്തിലേയ്ക്ക് ഓക്സിജന് അടങ്ങിയ രക്തം മടക്കി നല്കുകയും ചെയ്യുന്നു.
13ന് രാത്രി 09.30ന് അഡ്മിറ്റായ കുട്ടിയ്ക്ക് 14ന് രാത്രി 11.30 മണിയോടു കൂടി എക്മോ ചികിത്സ ആരംഭിച്ചു. ശ്വാസകോശത്തിന്റെ കാര്യക്ഷമത പതുക്കെ മെച്ചപ്പെട്ടുവരുകയും 10 ദിവസത്തിന് ശേഷം എക്മോ ചികിത്സ നിര്ത്തുകയും ചെയ്തു. തുടര്ന്ന് വെന്റിലേറ്റര് ചികിത്സ 28 വരെ തുടരുകയും ചെയ്തു. പിന്നീട് കുട്ടിയുടെ ആരോഗ്യനില മെച്ചപ്പെടുകയും ഓക്സിജന് സഹായമില്ലാതെ ശ്വസിക്കാനും കഴിഞ്ഞു. പൂര്ണ ആരോഗ്യം വീണ്ടെടുത്ത കുട്ടിയെ ഉടന് ഡിസ്ചാര്ജ് ചെയ്യുന്നതാണ്.
സംസ്ഥാനത്ത് ഇതാദ്യമായാണ് സര്ക്കാര് മേഖലയില് ശിശുരോഗ വിഭാഗത്തില് ശ്വാസകോശ സംബന്ധമായ അസുഖത്തിന് എക്മോ വിജയകരമായി നടത്തുന്നത്. തിരുവനന്തപുരം എസ്എ ടി ആശുപത്രി അങ്ങനെ ഒരു ചരത്രത്തിന്റെ കൂടി ഭാഗമായി. സ്വകാര്യ ആശുപത്രികളില് 15 ലക്ഷത്തോളം ചെലവുവരുന്ന ചികിത്സ സര്ക്കാര് പദ്ധതിയിലൂടെ സൗജന്യമായാണ് എസ്എടിയില് ലഭ്യമാക്കിയത്. ചികിത്സയും പരിചരണവും നല്കിയ മുഴുവന് ടീം അംഗങ്ങളേയും ആരോഗ്യ വകുപ്പ് മന്ത്രി വീണാ ജോര്ജ് അഭിനന്ദിച്ചു.
Read more: സൗജന്യ ത്രീഡി പ്രിന്റഡ് കൃത്രിമ കൈകാലുകളുമായി കിംസ്ഹെൽത്ത്
എസ്.എ.ടി. ആശുപത്രി സൂപ്രണ്ട് ഡോ. എസ്. ബിന്ദുവിന്റെ ഏകോപനത്തില് പീഡിയാട്രിക് വിഭാഗം മേധാവി ഡോ. ജി.എസ്. ബിന്ദു, യൂണിറ്റ് ചീഫ് ഡോ. സനുജ സരസം, പീഡിയാട്രിക് ഇന്റന്സിവിസ്റ്റ് ഡോ. ഷീജ സുഗുണന്, ഡോ. രേഖാ കൃഷ്ണന്, ഐ.സി.യു.വിലെ സീനിയര്, ജൂനിയര് റെസിഡന്റുമാര്, കാര്ഡിയോളജി വിഭാഗം മേധാവി ഡോ. ലക്ഷ്മി, എസ്.എ.ടി. സി.വി.ടി.എസ്. ടീം, ഡോ. വിനു, ഡോ. നിവിന് ജോര്ജ്, ചീഫ് നഴ്സിംഗ് ഓഫീസര് അമ്പിളി ഭാസ്കരന്റെ നേതൃത്വത്തിലുള്ള പി.ഐ.സി.യുവിലേയും സി.വി.ടി.എസ്. ഐ.സി.യു.വിലേയും നഴ്സിംഗ് ഓഫീസര്മാര്, പെര്ഫ്യൂഷനിസ്റ്റുകള്, മറ്റ് ജീവനക്കാര് തുടങ്ങിയ എല്ലാവരുടേയും ആത്മാര്ത്ഥ പരിശ്രമമാണ് അത്യന്തം വെല്ലുവിളി നിറഞ്ഞ എക്മോ ചികിത്സ വിജയകരമായി പൂര്ത്തിയാക്കാന് സാധിച്ചത്.
ഏഷ്യാനെറ്റ് ന്യൂസ് വാർത്തകൾ തത്സമയം കാണാം
ഏഷ്യാനെറ്റ് ന്യൂസ് മലയാളത്തിലൂടെ Health News അറിയൂ. Food and Recipes തുടങ്ങി മികച്ച ജീവിതം നയിക്കാൻ സഹായിക്കുന്ന ടിപ്സുകളും ലേഖനങ്ങളും — നിങ്ങളുടെ ദിവസങ്ങളെ കൂടുതൽ മനോഹരമാക്കാൻ Asianet News Malayalam