എന്താണ് 'ബോയ് കിബിൾ'? യുവാക്കൾക്കിടയിൽ തരംഗമാകുന്ന ഈ സിമ്പിൾ ഡയറ്റ് ശരിക്കും ആരോഗ്യകരമാണോ?

പേര് കേട്ട് പേടിക്കണ്ട, ഇത് പട്ടികൾക്കുള്ള തീറ്റയല്ല! പക്ഷേ കാഴ്ചയിൽ ഏകദേശം അതുപോലെ ഇരിക്കുന്നത് കൊണ്ടാണ് സോഷ്യൽ മീഡിയ ഇതിന് 'ബോയ് കിബിൾ' എന്ന് പേരിട്ടത്. അധികം പണിയെടുക്കാതെ മസില് പെരുപ്പിക്കാൻ ആഗ്രഹിക്കുന്ന ജെൻ സി യുവാക്കൾക്കിടയിൽ ഇപ്പോൾ ഈ ഹൈ-പ്രോട്ടീൻ വിഭവം ഒരു തരംഗമായി മാറിയിരിക്കുകയാണ്. 

സോഷ്യൽ മീഡിയയിൽ ഓരോ ദിവസവും വിചിത്രമായ പേരുകളിലുള്ള ഭക്ഷണ രീതികൾ പ്രത്യക്ഷപ്പെടാറുണ്ട്. 2023-ൽ യുവതികൾക്കിടയിൽ തരംഗമായ 'ഗേൾ ഡിന്നറിന്' ശേഷം ഇപ്പോൾ ഇന്റർനെറ്റിൽ തരംഗമാകുന്നത് 'ബോയ് കിബിൾ' (Boy Kibble) ആണ്. ജെൻ സി യുവാക്കൾക്കിടയിൽ, പ്രത്യേകിച്ച് ജിമ്മിൽ പോകുന്നവർക്കിടയിൽ വലിയ സ്വീകാര്യത ലഭിക്കുന്ന ഈ ഭക്ഷണ രീതി യഥാർത്ഥത്തിൽ വളരെ ലളിതമായ ഒന്നാണ്. കുറഞ്ഞ ചിലവിൽ, അധികം പണിയെടുക്കാതെ ഉണ്ടാക്കാൻ കഴിയുന്ന ഒരു ഹൈ-പ്രോട്ടീൻ ഭക്ഷണമാണിത്. ബോഡി ബിൽഡിംഗിലും ഫിറ്റ്നസ്സിലും ശ്രദ്ധിക്കുന്ന യുവാക്കളാണ് ഈ ട്രെൻഡിന്റെ പ്രധാന വക്താക്കൾ.

പ്രധാനമായും രണ്ടു സാധനങ്ങളാണ് ഇതിൽ അടങ്ങിയിരിക്കുന്നത്: ഗ്രൗണ്ട് ബീഫ് അഥവാ ബീഫ് കൊത്തിയരിഞ്ഞതും വൈറ്റ് റൈസും. ഇവ രണ്ടും കൂടി മിക്സ് ചെയ്ത് കഴിക്കുന്ന രീതിയാണിത്. കാഴ്ചയിൽ മൃഗങ്ങൾക്ക് നൽകുന്ന കിബിൾ പോലെ ഇരിക്കുന്നത് കൊണ്ടാണ് ഇതിന് ഈ പേര് വന്നത്. ഹോട്ടലുകളിൽ പോയി വലിയ തുക ചിലവാക്കാതെയും പാചകത്തിന് അധികം സമയം കളയാതെയും ശരീരത്തിന് ആവശ്യമായ പ്രോട്ടീൻ കണ്ടെത്താൻ ഇത് സഹായിക്കുന്നുവെന്ന് യുവാക്കൾ അവകാശപ്പെടുന്നു.

പോഷകാഹാര വിദഗ്ധർ പറയുന്നതനുസരിച്ച്, 'ബോയ് കിബിളിൽ' ചില നല്ല വശങ്ങളുണ്ട്. ബീഫ് ഒരു സമ്പൂർണ്ണ പ്രോട്ടീനാണ്. ഇത് പേശികളുടെ വളർച്ചയ്ക്കും ശരീരത്തിലെ കോശങ്ങളുടെ അറ്റകുറ്റപ്പണികൾക്കും സഹായിക്കുന്നു. ബീഫിൽ ധാരാളമായി വിറ്റാമിൻ ബി12 അടങ്ങിയിട്ടുണ്ട്, ഇത് രക്തം വർദ്ധിപ്പിക്കുന്നതിനും നാഡീവ്യൂഹത്തിന്റെ ആരോഗ്യത്തിനും അത്യാവശ്യമാണ്. കൂടാതെ രോഗപ്രതിരോധ ശേഷി വർദ്ധിപ്പിക്കാൻ സഹായിക്കുന്ന സിങ്കും ശരീരത്തിൽ ഓക്സിജൻ എത്തിക്കുന്നതിന് ആവശ്യമായ അയണും ഇതിൽ ധാരാളമുണ്ട്. ഇതിലെ ചോറ് വർക്ക്ഔട്ടിന് ആവശ്യമായ ഊർജ്ജം നൽകുകയും ചെയ്യുന്നു.

എങ്കിലും ഈ ഭക്ഷണം ആരോഗ്യകരമാണെങ്കിലും, ദിവസവും മൂന്നു നേരം ഇത് തന്നെ കഴിക്കുന്നത് ഗുണത്തേക്കാൾ ഏറെ ദോഷം ചെയ്യുമെന്ന് ഡയറ്റീഷ്യൻമാർ മുന്നറിയിപ്പ് നൽകുന്നു. ചോറും മാംസവും മാത്രം കഴിക്കുമ്പോൾ ശരീരത്തിന് ആവശ്യമായ നാരുകൾ അഥവാ ഫൈബർ ലഭിക്കില്ല. ഇത് മലബന്ധം പോലുള്ള ദഹനപ്രശ്നങ്ങൾക്ക് കാരണമാകും. പച്ചക്കറികളും പഴങ്ങളും ഒഴിവാക്കി ഇത് മാത്രം കഴിച്ചാൽ വിറ്റാമിൻ സി, ഫോളേറ്റ്, ആന്റിഓക്സിഡന്റുകൾ എന്നിവയുടെ കുറവുണ്ടാകും. വൈറ്റ് റൈസ് ഒരു സിമ്പിൾ കാർബോഹൈഡ്രേറ്റ് ആയതിനാൽ അതിനു പകരം ബ്രൗൺ റൈസ് ഉപയോഗിക്കുന്നതാണ് കൂടുതൽ നല്ലത്.

കുറച്ച് മാറ്റങ്ങൾ വരുത്തിയാൽ 'ബോയ് കിബിൾ' ഒരു മികച്ച ഭക്ഷണമാക്കി മാറ്റാൻ സാധിക്കും. ബ്രോക്കോളി, ക്യാരറ്റ് അല്ലെങ്കിൽ ചീര എന്നിവ ഇതിൽ ചേർക്കുന്നത് നാരുകളും വിറ്റാമിനുകളും വർദ്ധിപ്പിക്കും. അതുപോലെ ചോറിന് പകരം ഇടയ്ക്ക് ഉരുളക്കിഴങ്ങ്, ക്വിനോവ അല്ലെങ്കിൽ ബാർലി എന്നിവ പരീക്ഷിക്കാവുന്നതാണ്. വെളുത്തുള്ളി പൊടി, ജീരകം അല്ലെങ്കിൽ സൽസ സോസ് എന്നിവ ചേർക്കുന്നത് രുചി വർദ്ധിപ്പിക്കുക മാത്രമല്ല, ശരീരത്തിന് ആവശ്യമായ ആന്റിഓക്സിഡന്റുകൾ നൽകുകയും ചെയ്യും. ചുരുക്കത്തിൽ, ജോലി കഴിഞ്ഞോ ജിം കഴിഞ്ഞോ വരുമ്പോൾ വേഗത്തിൽ കഴിക്കാൻ പറ്റുന്ന ഒരു ഹെൽത്തി ഓപ്ഷനാണ് ഇത്. എന്നാൽ വൈവിധ്യമാർന്ന ആഹാരരീതിയാണ് ആരോഗ്യത്തിന്റെ അടിസ്ഥാനമെന്ന് നാം മറക്കരുത്.